Onlad karga

Antoy Labay na Dios ya Gawaen Ko?

Antoy Labay na Dios ya Gawaen Ko?

Say ebat na Biblia

Labay na Dios ya sikatoy nakabat mon maong, magmaliw kan kaaro to, insan aroen tan dayewen mo ed interon pusom. (Mateo 22:37, 38; Santiago 4:8) Pian naamtaan mo no panon mon gawaen so labay na Dios, aral moy bilay tan bangat nen Jesus. (Juan 7:16, 17) Aglabat imbaga nen Jesus ed arum so labay na Dios—ginawa to met itan. Diad tua, imbaga nen Jesus ya say gagala na bilay to et ‘pian gawaen so linawa na samay angibaki ed sikato, aliwan say linawa to.’—Juan 6:38.

Kaukolan ko kasi espisyal ya tanda pian naamtaan koy labay na Dios ya gawaen ko?

Andi, lapud wala lad Biblia so mensahe na Dios parad totoo. Wadtan iray kaukolan mo pian magmaliw kan “akaparaan a maong parad amin a maabig a gawa.” (2 Timoteo 3:16, 17) Labay na Dios ya usaren moy Biblia tan say ‘pakayarim ya mankatunongan’ o manrason pian naamtaan mo no antoy labay ton gawaen mo.—Roma 12:1, 2; Efeso 5:17.

Talaga kasin sarag kon gawaen so labay na Dios?

On, sarag mo, ta ibabaga na Biblia ya: “Aliwan mairap ya onuren iray ganggan to.” (1 Juan 5:3, Maung a Balita) Aglabay ya ibaga na satan ya lanang lan mainomay ya unoren iray ganggan na Dios. Pero parad pankaabigan mo lanlamang kanian sulit no unoren mo iratan. Imbagan mismo nen Jesus: “Maliket iray ondedengel ed salitay Dios tan oonuren da!”—Lucas 11:28, MB.