Onlad karga

Kasin Kasalanan so Panagsugal?

Kasin Kasalanan so Panagsugal?

Say ebat na Biblia

Anggano aliwan detalyadon nabasa ed Biblia so nipaakar ed panagsugal, naamtaan tayo ed saray prinsipyo na Biblia ya ipapasen na Dios so panagsugal ya kasalanan.​—Efeso 5:​17. *

  • Say panagsugal et gagawaen na totoo lapud agum, ya kabusol na Dios. (1 Corinto 6:9, 10; Efeso 5:3, 5) Saray mansusugal et labay dan naalay kuarta na arum, pero kokondenaen na Biblia so pampilalek ed antokaman ya kayarian na arum.​—Exodo 20:17; Roma 7:7; 13:​9, 10.

  • Say panagsugal, anggan parad melag labat ya kantidad, et nayarin manresulta ed makaderal ya panangaro ed kuarta.​—1 Timoteo 6:​9, 10.

  • Saray mansusugal et maslak ya manisia ed saray pamahiin o suerte. Balet ipapasen na Dios ya idolatriya iratan tan agmanepeg ed panagdayew ed sikato.—Isaias 65:11.

  • Imbes ya pilaleken so nawalaan na bengatlan agmo nansagpotan, ibabaga na Biblia ya kaukolan tayoy makulin mankimey. (Eclesiastes 2:​24; Efeso 4:​28) Saramay uunoren da iyan bilin na Biblia et “kanen da imay nansagpotan da.”—2 Tesalonica 3:10, 12.

  • Say panagsugal et nayarin panlapuan na panlalaslasan, ya kokondenaen na Biblia.—Galacia 5:26.

^ par. 3 Say panagsugal et tinukoy labat ed Biblia sanen saray Romanon sundalo et nampapalaranan day kawes nen Jesus lapud sankanonot day napinabangan da.—Mateo 27:35; Juan 19:23, 24.