Onlad karga

Antoy Itsura nen Jesus?

Antoy Itsura nen Jesus?

Say ebat na Biblia

Anggapoy makaamta ed eksakton itsura nen Jesus ta ag-itan adeskribe ed Biblia. Labay ton ibaga, aliwan importante so itsura nen Jesus. Balet, makaala tayoy ideya ed ibabaga na Biblia no antoy itsura to.

  • Lupa: Judio si Jesus tan nayarin kalupa toy nanay to ya Hebreo. (Hebreo 7:14) Aliwan nikadkaduma so itsura nen Jesus. Aminsan et nambiahe manlapud Galilea ya anggad Jerusalem ya anggapoy akabirbir ed sikato. (Juan 7:10, 11) Tan agmet nikadumay itsura to ed saray disipulo to. Diad tua, nen si Jesus et arestoen na armadon lalaki, kaukolan nin milay Judas Iscariote ed sikara pian amta da no siopay arestoen da.—Mateo 26:47-49.

  • Karukey na buek: Imposible ya andukey so buek nen Jesus ta ibabaga na Biblia ya “no andukey so buek na sakey a laki et kabandayan itan ed sikato.”​—1 Corinto 11:14.

  • Balbas: Walay balbas nen Jesus. Inunor toy ganggan na saray Judio ya bawal ed saray lalaki ya “katlien so nguro na balbas” da. (Levitico 19:27; Galacia 4:4) Tan abitla met ed Biblia so balbas nen Jesus diad sakey a propesiya tungkol ed panirap to.—Isaias 50:6.

  • Impanlaman: Mapatpatnag ya maong so impanlaman nen Jesus. Legan na ministeryo to, ararawi inakar to. (Mateo 9:35) Amidua ton pinaekal iray negosyante ed templo na saray Judio, ya imbabalintuag to ray lamisaan na saray managsalat na kuarta, tan aminsan et nanggaway panagsiplat iran lubir pian papawayen iray karnero tan baka. (Lucas 19:45, 46; Juan 2:14, 15) Oniay imbaga na McClintock and Strong’s Cyclopedia: “Naamtaan tayod interon ebanghelyo ya mabiskeg tan mapaot so laman [nen Jesus].”​—Volume IV, pahina 884.

  • Ekspresyon na lupa: Maaro tan mapangasi si Jesus, tan seguradon napatnagan itan ed ekspresyon na lupa to. (Mateo 11:28, 29) Amin ya klase na totoo et onaasingger ed sikato pian onkerew na tulong tan naligliwa. (Lucas 5:12, 13; 7:37, 38) Pati saray ugugaw et labalabay day Jesus.—Mateo 19:13-15; Marcos 9:35-37.

Saray lingon iisipen tungkol ed itsura nen Jesus

Lingon iisipen: Ibabaga na arum ya posiblin African so lahi nen Jesus ta diad libro na Puyan o Apocalipsis et nikompara so buek to ed bagoy karnero tan saray sali to et singa “gansan pinoolan.”—Puyan 1:14, 15, Maung a Balita.

Katuaan: Say libro na Puyan o Apocalipsis et impaamta ed si apostol Juan panamegley na “saray simbolo.” (Apocalipsis 1:1) Say impangideskribe ed buek tan sali nen Jesus et isisimbolo to iray kualidad nen Jesus nen wala lad tawen, tan ag-itan ontutukoy ed itsura to nen wadiad dalin. Diad samay nabasad Apocalipsis 1:14 ya “say ulo to tan saray buek to et amputi a singa kaputi na bagoy karnero, singa niebe,” say idadanet to et kolor na buek, aliwan no kasin kulet odino unat. Isisimbolo na satan so karunongan to lapud inkatatken to.—Apocalipsis 3:14.

Saray sali nen Jesus et “singa puron gansa a masmasnag sano walad hurnoan.” (Apocalipsis 1:15) Tan say lupa to et “singa agew sano onsisinag a masmasnag.” (Apocalipsis 1:16) Anggapoy lahi ya ontan so kolor na baog da, kanian simboliko itan sirin ya mangidedeskribe ed si Jesus ya “manaayam ed agnaasinggeran a liwawa” kapawil tod tawen.—1 Timoteo 6:16.

Lingon iisipen: Maletey so laman nen Jesus.

Katuaan: Lakin-laki so kiwas nen Jesus. Alimbawa, makpel ya inmarap ed saramay armadon lalaki ya nan-aresto ed sikato. (Juan 18:4-8) Seguradon mabiskeg tan mapaot si Jesus ta say trabaho to et karpentero tan angusar na manu-mano tan ambelat iran kagawaan.—Marcos 6:3.

Akin balet et kaukolan nen Jesus so tulong nen sinakbat to may panamairapan ya poste? Tan akin ya mas akaunan inatey nen saramay kaiba ton akapasak? (Lucas 23:26; Juan 19:31-33) Antis ya inaresto si Jesus, naknaksawan lay laman to. Sanlabin agla naugip, nayarin lapud pakakagonigon to. (Lucas 22:42-44) Nen naaresto la, minaltrato na saray Judio, insan kaimbuasan to et pinairap na saray Romano. (Mateo 26:67, 68; Juan 19:1-3) Nayarin saratan so rason no akin ya akaunan inatey.

Lingon iisipen: Lanang ya seryoso tan maermen si Jesus.

Katuaan: Perpekton impanengneng nen Jesus iray kualidad na Ama tod tawen ya si Jehova, ya diad Biblia et adeskribe ya “maliket a Dios.” (1 Timoteo 1:11; Juan 14:9) Diad tua, imbangat nen Jesus ed totoo no panon iran magmaliw ya maliket. (Mateo 5:3-9; Lucas 11:28) Nibaga tayo sirin ya nanengneng so liket nen Jesus ed ekspresyon na lupa to.