Onlad karga

Anto so Paskua?

Anto so Paskua?

Say ebat na Biblia

Say Paskua et selebrasyon na saray Judio nipaakar ed impangibulos na Dios ed saray Israelita manlapud panangaripen na Ehipto nen 1513 B.C.E. Ingganggan na Dios iray Israelita ya nodnonoten itan ya importantin inkagawa kada taon diad koma-14 ya agew na bulan diad kalendaryo na saray Judio ya Abib, a diad kaunoran et tinawag ya Nisan.​—Exodo 12:42; Levitico 23:5.

Akin et tinawag itan ya Paskua?

Say salitan “Paskua” et nanlapud Hebreon salita ya mankabaliksay “nilabsanan.” Ontutukoy itan ed panaon sanen inliktar na Dios iray Israelita manlapud salot ya amatey ed amin a panguloan diad Ehipto. (Exodo 12:27; 13:15) Antis ya idapo na Dios so makapatey a salot, imbaga tod saray Israelita ya manpakger ira na kordero o kanding tan iwalsik day dala ed saray puerta ra. (Exodo 12:21, 22, paimanod leksab) No nanengneng na Dios iyan tanda tan “labsanan” toy abung da tan agto pateyen so panguloan da.​—Exodo 12:​7, 13.

Panon ya seselebraan so Paskua nen panaon na Biblia?

Inikdan na Dios na instruksion iray Israelita no panon dan selebraan so unonan Paskua. * Walad leksab so pigaran gagawaen ed Paskua ya abitlad Biblia.

  • Bagat: Manpili iray pamilya na sakey taon a kordero (odino kanding) diad komasamplon agew na Abib (Nisan), tan diad koma-14 ya agew, pateyen da itan. Diad unonan Paskua, mangiwalsik na daiset a dala iray Judio diad saray lusek na puerta ra tan diad bandad tagey na puerta ra, ikalot dan intero so ayep, insan da kanen.​—Exodo 12:​3-9.

  • Pangdeman: Likud ed kordero (odino kanding), mangan iray Israelita na andi-lebaduran tinapay tan ampait a bulobulong bilang kabiangan na pangdem parad Paskua.​—Exodo 12:8.

  • Piesta: Seselebraan na saray Israelita so Piesta na Andi-lebaduran Tinapay diad loob na pitoran agew kayari Paskua, balet legan na satan et ag-ira mamangan na alebaduraan a tinapay.​—Exodo 12:17-​20; 2 Awaran 30:21.

  • Edukasyon: Uusaren na saray ateng so Paskua pian ibangat iray anak da nipaakar ed si Jehova a Dios.​—Exodo 12:25-27.

  • Biahe: Sinmabi panaon, saray Israelita et ombiabiahe paonlad Jerusalem pian selebraan so Paskua.​—Deuteronomio 16:​5-7; Lucas 2:​41.

  • Arum nin kustombre: Diad panaon nen Jesus, kaibad selebrasyon ed Paskua so alak tan panagkansion.​—Mateo 26:19, 30; Lucas 22:15-​18.

Lingon pakatalos nipaakar ed Paskua

Lingon pakatalos: Inakan na saray Israelita so pangdem parad Paskua nen Nisan 15.

Katuaan: Ingganggan na Dios iray Israelita ya pateyen so kordero kaselek na agew diad Nisan 14 tan kanen da ed satan lanlamang a labi. (Exodo 12:​6, 8) Diad saray Israelita, onggagapoy sanagew manlapud kaselek na agew ya anggad onsublay ya kaselek na agew. (Levitico 23:32) Kanian pinatey na saray Israelita so kordero tan inakan day pangdem parad Paskua diad kagapo na Nisan 14.

Lingon pakatalos: Nepeg ya selebraan na saray Kristiano so Paskua.

Katuaan: Kayarin sinelebraan nen Jesus so Paskua nen Nisan 14, 33 C.E., inggapo to so balon selebrasyon: say Pangdem na Katawan. (Lucas 22:19, 20; 1 Corinto 11:20) Atan so sinmalat ed Paskua, lapud nonodnonoten ed satan so bagat na “Kristo a kordero parad Paskua.” (1 Corinto 5:7) Say dondon bagat nen Jesus et superyor nen say bagat parad Paskua lapud ibulos na satan so amin a totoo manlapud panangaripen na kasalanan tan patey.​—Mateo 20:28; Hebreo 9:​15.

^ par. 7 Balet diad inlabas na panaon, wala ray ginawan pananguman. Alimbawa, sinelebraan na saray Israelita so Paskua ya ‘apuraan’ lapud kaukolan da lay manparaan pian ontaynan ed Ehipto. (Exodo 12:11) Balet kasabi dad Insipan a Dalin, agda la kaukolan ya apuraen ya selebraan itan.