Onlad karga

Siopa o Anto Iratay Anghel?

Siopa o Anto Iratay Anghel?

Say ebat na Biblia

Saray anghel et mas mabiskeg tan mas dakel so nagawaan da nen saray totoo. (2 Pedro 2:​11) Wala rad tawen odino diad kawalaan na saray espiritu, pasen ya mas atagey nen say nanenengneng ya uniberso. (1 Arari 8:​27; Juan 6:​38) Kanian tinawag met iran espiritu.​—1 Arari 22:21; Salmo 18:10.

Iner so nanlapuan na saray anghel?

Saray anghel et ginawa na Dios panamegley nen Jesus, ya tinawag na Biblia ya “panguloan na amin a pinalsa.” Oniay ibabaga na Biblia no panon ya inusar na Dios si Jesus diad impamalsa: “Diad panamegley [nen Jesus] et apalsa so amin ni ran bengatlan walad tawen tan walad dalin, saray bengatlan nanengneng tan agnanengneng,” kaiba iray anghel. (Colosas 1:​13-​17) Saray anghel et agmangaasawa tan agmanaanak. (Marcos 12:25) Imbes, sansakey ya ginawa irayan “ananak na tuan Dios.”​—Job 1:6.

Abaybayag lan ginawa na Dios iray anghel antis ton ginawa so dalin. Nen ginawa na Dios so dalin, “inmeyag ed liket” iray anghel.​—Job 38:​4-7.

Pigaran amin so anghel?

Anggapoy imbaga na Biblia ya eksakton bilang da, balet nabasa ditan ya dakdakel ira. Alimbawa, panamegley na milagro et anengneng nen apostol Juan so nilasus milyon ya anghel.—Apocalipsis 5:​11.

Kasin walay ngaran na kada anghel tan nandurumay personalidad da?

On. Nabasad Biblia so ngaran na duaran anghel: si Miguel tan si Gabriel. (Daniel 12:1; Lucas 1:​26) * Inamin na arum ya anghel ya walay ngaran da, balet agda impaamta.​—Genesis 32:29; Ukom 13:17, 18.

Nandurumay personalidad na saray anghel. Makapantatalosan ira. (1 Corinto 13:1) Walay abilidad dan mannonot tan mangibalikas na saray panangirayew ed Dios. (Lucas 2:​13, 14) Sarag da met so mandesisyon ya manggaway duga odino aliwa, ya singa nen nankasalanan so arum ed sikara nen pinmanig irad si Satanas a Diablo diad impanrebelde to ed Dios.​—Mateo 25:41; 2 Pedro 2:4.

Wala kasi nanduruman rangko na saray anghel?

On. Say anghel ya sankamakapanyarian tan walaan na sankatageyan ya autoridad et si Miguel, say arkanghel. (Judas 9; Apocalipsis 12:7) Saray serapin et anghel ya atagey so rangko da ya walad paliber na trono nen Jehova. (Isaias 6:​2, 6) Saray kerubin et anghel ya atagey met so rangko da tan wala ray espisyal ya responsabilidad da. Singa bilang, saray kerubin so nan-guardia ed dalan ya paloob ed hardin na Eden nen apalayas si Adan tan Eva.​—Genesis 3:​23, 24.

Kasin tutulongan na saray anghel iray totoo?

On, uusaren na Dios iray matoor ya anghel to pian tulongan iray totoo natan.

  • Uusaren na Dios iray anghel legan ton igigiya iray lingkor to diad pangipupulong da na maong a balita na Panarian na Dios. (Apocalipsis 14:​6, 7) Lapud saya, natutulongan iray manpupulong tan saray ondedengel ed maong a balita.​—Gawa 8:​26, 27.

  • Ontutulong iray anghel pian mansiansian malinis so kongregasyon na saray Kristiano tan ag-itan nalaokan na mauges iran totoo.​—Mateo 13:49.

  • Igigiya tan proprotektaan na saray anghel iray matoor ed Dios.​—Salmo 34:7; 91:10, 11; Hebreo 1:​7, 14.

  • Saray anghel et magano lan milaban a kaiba nen Jesu-Kristo pian deralen iray mauges, kanian nainawaan la iray totoo.​—2 Tesalonica 1:​6-8.

Kasin walay anghel dela guardia na kada sakey ed sikatayo?

Anggano ontutulong iray anghel parad espiritual ya pankaabigan na saray lingkor na Dios, agto labay ya ibagan mangibabaki so Dios na sakey ya anghel ya manbantay ed kada Kristiano. * (Mateo 18:10) Agproprotektaan na saray anghel iray lingkor na Dios ed amin ya subok odino tukso. Ibabaga na Biblia ya no nasusubok so sakey a too, say Dios et ‘manggawa na dalan a pawayan’ to, ya ikdan To na karunongan tan biskeg pian makapansungdo.​—1 Corinto 10:12, 13; Santiago 1:​2-5.

Lingon pakatalos nipaakar ed saray anghel

Lingon pakatalos: Amin ya anghel et maong.

Katuaan: Ibabaga na Biblia ya wala ray “mauges ya espiritu” tan wala ray “anghel a nankasalanan.” (Efeso 6:​12; 2 Pedro 2:4) Sarayan mauges ya anghel et demonyo, ya pinmanig ed si Satanas diad impanrebelde to ed Dios.

Lingon pakatalos: Saray anghel et ag-ompatey.

Katuaan: Saray mauges ya anghel, pati si Satanas a Diablo, et naderal.​—Judas 6.

Lingon pakatalos: Magmaliw ya anghel iray totoo no ompatey ira.

Katuaan: Ginawa na Dios iray anghel; aliwa iran totoo ya binilay lamet. (Colosas 1:​16) Saray totoo ya bilayen lamet na Dios ya manayam ed tawen et ikdan to na imortal ya bilay. (1 Corinto 15:53, 54) Diman et mas atagey so posisyon da nen saray anghel.​—1 Corinto 6:3.

Lingon pakatalos: Say rason no akin ya wala ray anghel et pian serbian da iray totoo.

Katuaan: Say uunoren na saray anghel et say ibaga na Dios, aliwan say ibaga tayo. (Salmo 103:20, 21) Say kinerewan nen Jesus na tulong et diad Dios, aliwan diad saray anghel.​—Mateo 26:53.

Lingon pakatalos: Sarag tayoy manpikasi ed saray anghel pian tulongan da tayo.

Katuaan: Say pampikasi ed Dios et kabiangan na panagdayew tayo, ya para labat ed si Jehova a Dios. (Apocalipsis 19:10) Say Dios labat so nepeg tayon pampikasian, ya ipadalan tayod si Jesus.​—Juan 14:6.

^ par. 10 Diad Isaias 14:12, inusar na arum ya bersion na Biblia so salitan “Lucifer.” Iisipen na arum ya ngaran itan na anghel ya nagmaliw ya Satanas a Diablo. Balet, say labay ya ibaga na orihinal ya Hebreon salita ya inusar ed satan ya bersikulo et “maliwawan bitewen.” Base ed arum ya bersikulo, ag-itan ontutukoy ed si Satanas, noagta ontutukoy ed dinastiya na Babilonia, ya ipaabeba na Dios lapud inkalastog na satan. (Isaias 14:​4, 13-​20) Inusar so “maliwawan bitewen” pian kantiawan so dinastiya na Babilonia nen binmagsak itan.

^ par. 21 Diad samay salaysay ya nibulos ed prisoan si Pedro, iisipen na arum ya walay anghel dela guardia to. (Gawa 12:​6-​16) Balet nen imbaga na saray disipulo so tungkol ed “anghel [nen Pedro],” inisip da ya say linmad sikara et anghel ya mangirerepresenta ed si Pedro, pero diad tua et si Pedro iman ya mismo.