Say ebat na Biblia

 Say antikristo et aglabat ontutukoy ed sakey ya too odino sakey ya grupo ta ibabaga na Biblia ya ‘dakel so antikristo.’ (1 Juan 2:18) Say terminon “antikristo” et nanlapud Griegon salita ya mankabaliksay “kontra ed (odino kunwarin) Kristo.” Kanian nibaga ya antikristo so sakey no:

•   Ibuburi to odino agto awaten ya si Jesus et Kristo (Mesias), odino agmanisia ya si Jesus et Anak na Dios.—1 Juan 2:22.

•   Kokontraen toy Kristo, say Nilanaan na Dios.—Salmo 2:1, 2; Lucas 11:23.

•   Mankunkunwarin sikato so Kristo.—Mateo 24:24.

•   Papasegsegangen o papairapen to iray papatumbok nen Kristo. Ta parad si Jesus no papairapen iray patumbok to, sikato lanlamang so papairapen.—Gawa 9:5.

•   Ibabaga ton sikatoy sakey a Kristiano pero manggagawa balet na kaugsan tan managpalikdo.—Mateo 7:22, 23; 2 Corinto 11:13.

 Saramay indibidual ya manggagawa ed anggan dinan ed saratan et tatawagen ya antikristo, pero amin da bilang kabuoan et tatawagen met na Biblia bilang “antikristo.” (2 Juan 7) Say antikristo et ginmapo ed panaon na saray apostol ya angga lad panaon tayo natan. Impropesiya la na Biblia ya nagawa itan.—1 Juan 4:3.

Panon ya naamtaan no siopa ray antikristo?

•   Mangibabangat ira na katilaan nipaakar ed si Jesus. (Mateo 24:9, 11) Singa bilang, saramay mangibabangat na Trinidad odino mangibabagan si Jesus so Makapanyarin Dios et kokontraen da may bangat nen Jesus ya: “Say Ama et mas baleg nen say siak.”—Juan 14:28.

•   Ag-aawaten na saray antikristo may imbaga nen Jesus nipaakar ed gawaen na Panarian na Dios. Diad tua, wala ray lider na relihyon ya mangibabagan mikikimeyan kuno so Kristo ed gobierno na too. Pero kontra itan ed samay imbangat nen Jesus ya: “Say Panarian ko et agkabiangan na sayan mundo.”—Juan 18:36.

•   Ibabaga ran si Jesus so Katawan da, balet agda uunoren iray ganggan to, singa say pangipulong na maong a balita na Panarian.—Mateo 28:19, 20; Lucas 6:46; Gawa 10:42.