Onlad karga

Siopa o Anto so “Alfa tan say Omega”?

Siopa o Anto so “Alfa tan say Omega”?

Say ebat na Biblia

Say “Alfa tan say Omega” et si Jehova a Dios, say Makapanyarin-amin. Amitlon abitla itan ya termino diad Biblia.​—Apocalipsis 1:8; 21:6; 22:13. *

Akin ya tinawag na Dios so sarili to ya “Alfa tan say Omega”?

Say alfa tan omega so unaan tan unor ya letra ed alphabet na Griego, say lenguahe ya inusar pian isulat so parte na Biblia ya kaslakan a tatawagen ya Balon Sipan, tan kaiba ditan so libron Apocalipsis. Inusar irayan letra pian ipanengneng ya si Jehova labat so gapo tan sampot. (Apocalipsis 21:6) Sikato so Makapanyarin-amin a Dios manlapu nensaman tan ag-itan manguman ya anggad angga. Sikato labat so Dios “manlapud andi-anggaan ya anggad andi-anggaan.”​—Salmo 90:2.

Siopa so “unaan tan say unor”?

Diad Biblia, ontutukoy itan ed si Jehova a Dios tan ed Anak to, si Jesus, pero diad mandumaan ya paraan. Imanoen so duaran alimbawa.

  • Diad Isaias 44:6, kuan nen Jehova: “Siak so unaan tan siak so unor, anggapo lay arum a Dios nilikud ed siak.” Indanet dia nen Jehova ya sikato so tuan Dios ya anggad angga; anggapo lay arum nilikud ed sikato. (Deuteronomio 4:​35, 39) Kanian diad saya et pareho so labay ya ibaga na “unaan tan say unor” tan say “Alfa tan say Omega.”

  • Nabasa met so terminon “Unaan [pro’tos, aliwan alfa] tan say Unor [e’skha·tos, aliwan omega]” diad Apocalipsis 1:​17, 18 tan 2:8. Diad konteksto na saratan ya bersikulo, nanengneng ya say tutukoyen na satan et sakey ya persona ya inatey insan binilay lamet. Kanian ag-itan ontutukoy ed Dios ta sikatoy agbalot ompatey. (Habacuc 1:​12) Pero si Jesus et inatey insan pinaoli o binilay lamet. (Gawa 3:​13-​15) Sikato so unaan ya too ya pinaoli bilang imortal ya espiritu ed tawen, tan diman la so panaayaman to natan ya “anggad angga.” (Apocalipsis 1:​18; Colosas 1:​18) Insan manlapu lad inkioli nen Jesus, amin ya impamaoli et agawa panamegley to, pati say nagawan kioli ed arapen. (Juan 6:​40, 44) Kanian sikato so unor ya direktan pinaoli nen Jehova. (Gawa 10:40) Kanian duga labat ya tawagen si Jesus ya “Unaan tan say Unor.”

Kasin ipapanengneng na Apocalipsis 22:13 ya si Jesus so “Alfa tan say Omega”?

Andi. Ag-abitla no siopay mansasalita ed Apocalipsis 22:13, tan nanduruma so mansasalita ed satan ya kapitulo. Oniay imbaga nen Professor William Barclay tungkol ed kapitulo 22 na Apocalipsis: “Mapatnag ya ag-itan insulat base ed malinew ya pantutumbokan; . . . tan mair-irap ya naamtaan no siopan talagay mansasalita.” (The Revelation of John, Volume 2, Revised Edition, pahina 223) Kanian nibaga tayo ya say “Alfa tan say Omega” ed Apocalipsis 22:13 et pareho ed samay tutukoyen na arum nin bersikulo ed Apocalipsis ya akan-titulo ed satan—si Jehova a Dios.

^ par. 3 Diad Biblia ya King James Version, amipat itan ya abitla, amay sakey et diad Apocalipsis 1:​11. Balet inekal itan ed dakel ya modernon patalos na Biblia ta anggapo itan ed daan iran Griegon manuskrito tan mapatnag ya inyarum labat itan ed balo ni ran kopya na Kasulatan.