Onlad karga

ALIGEN SO PANANISIA RA | JONATAN

‘Nagmaliw Iran Maapit a Sankaaro’

‘Nagmaliw Iran Maapit a Sankaaro’

Asumpal lay laban, tan marendeen lad Lawak na Elah. Say sankarengel labat ed saman ya ngarem et say kalasakas na saray tolda na sundalo lapud mapalayupoy so dagem. Impatawag nen Arin Saul so amin a sundalo to. Wadman so panguloan ya anak ton si Jonatan, tan wadman met so sakey ya kabataan a managpastol ya eksayted a mangiistorya. Say ngaran na kabataan et David. Maligligsa tan mabilabilay ton iyiistorya so agawa ed saman ya agew. Ondedengel ya maong si Saul pian anggapoy napalampas to. Si Jonatan ey? Dakel lay apanaloan ton guerra diad kabayag na panlilingkor to ed armada nen Jehova. Balet aliwan sikato natan so nampanalo ed laban; sakey ya kabataan so inusar nen Jehova. Pinatey nen David so higanten si Goliat! Dakel so manbilib ed si David. Kasin manimon si Jonatan?

Ompan nabigla kad reaksion nen Jonatan. Onia so nabasa tayo: “Kayari na impitongtong nen David ed si Saul, nagmaliw a maapit a sankaaro si Jonatan tan si David, tan sikatoy inaro nen Jonatan a singa ed sarili to.” Inter nen Jonatan ed si David iray uusaren ton piguerra, pati say pana to​—espisyal itan ya regalo, ta kabkabat ya maong a managpana si Jonatan. Insan ira nanggawa na paknaan kanian nagmaliw iran maapit ya sankaaro—​nansipanan iran dua ya suportaan dan lanang so sakey tan sakey, antokaman so nagawa.​—1 Samuel 18:1-5.

Diad saman ginmapo so sakey ed saray sankaapitan a pankakaaro ya akarekord ed Biblia. Importante so nawalaan na tuan kakaaro pian mansiansian mabiskeg so pananisia tayo. No pilien tayon maong iray kakaaro tayo tan no gawaen tayo met so anggaay nayarian tayon magmaliw ya masuporta tan matoor ya kaaro, napabiskeg tayoy pananisia na sakey tan sakey diad sarayan panaon ya nabilang labat so tuan kaaro. (Proverbio 27:17) Amtaen tayo sirin no anto ray naaralan tayod si Jonatan nipaakar ed pikakaaro.

Say Pundasyon na Pankakaaro

Akin et agangganon nagmaliw ya sankaaro si Jonatan tan David? Say ebat et walay koneksion tod pundasyon o basiyan na pankakaaro da. Onia so agawa: Mair-irap so situasyon nen Jonatan ed saman. Anguma-uman so ugali na ama to, si Arin Saul, tan diad ilalabas na panaon et lalon onloloor ni ingen. Dati et mapaabeba, maunor, tan mabiskeg so pananisia nen Saul, balet natan et nagmaliw lan mapaatagey tan agto la uunoren si Jehova.—1 Samuel 15:17-19, 26.

Seguradon naermenan ya maong si Jonatan ed impanguman nen ama to, ta maap-apit irad sakey tan sakey. (1 Samuel 20:2) Anganko, sankanonot nen Jonatan no anto kasi pansumpalan na bansan pinili nen Jehova lapud aliwliwan gagawaen nen Saul. Kasin lapud agpanmamatoor na ari da et nabalang met na saray Israelita so pabor nen Jehova? Seguradon mair-irap man ya panaon ed si Jonatan, ta sikatoy matoor ed Dios.

Makatulong itan ya impormasyon pian natalosan tayo no akin ya inmapit so liknaan nen Jonatan ed si David. Anengneng nen Jonatan so mabiskeg ya pananisia nen David. Aliwan singa saray sundalo nen Saul, si David et ag-ataktakot ed kabaleg nen Goliat. Anggano kompleto so armas nen Goliat, kombinsido si David ya sikatoy mas makapanyari ta milaban diad ngaran nen Jehova.​—1 Samuel 17:45-47.

Pigaran taon antis to iya, ontan met so alikna nen Jonatan. Wala may inkagawa ya sikato tan say manag-awit na armas to labat so linmusob ed grupo na saray armadon sundalon kalaban​—lapud inisip to ya sarasarag dan taloen irayan kalaban! Akin? “Anggapoy makasbel ed si Jehova,” so kuan nen Jonatan. (1 Samuel 14:6) Kanian baleg so pamparehoan nen Jonatan tan David: mabiskeg so pananisia ra tan inar-aro dan maong si Jehova. Atan so rason no akin ya nagmaliw iran malet ya sankaaro. Anggano si Jonatan et sakey ya makapanyarin prinsipe, ya manga 50 años to la, tan si David et sakey ya mapaabeban managpastol ya anggapo ni 20 to, saratan balet ya pandumaan da et ag-akaamper ed impankaaro da. *

Samay impansipanan nen Jonatan tan David so nagmaliw ya garantiya ya mansiansia ran sankaaro. Akin? Ta diad tua, amta nen David ya sikato so pinili nen Jehova ya onsublay ya man-ari ed Israel! Kasin insekreto to itan ed si Jonatan? Andi! Pian mansiansian malet so pankakaaro, importante so komunikasyon, anggapoy nepeg ya isekreto odino iyamot. Anto kasi alikna nen Jonatan nen naamtaan ton si David manaya so onsublay ya ari? Panon to no abayag met la manayan iisipen nen Jonatan ya marakep komon no sikato lay manuley ya ari pian nipetek to ray aliwliwan gagawaen nen ama to? Anggapoy nabasad Biblia ya tinmabang tan asakitan si Jonatan; say nabasa labat et nanmatoor si Jonatan tan nansiansian mabiskeg so pananisia to. Anengneng ton say espiritu nen Jehova et walad si David. (1 Samuel 16:1, 11-13) Kanian tinoor nen Jonatan so sipan to ed si David; nansiansian maong ya kaaro, aliwan sakey ya karibal. Labay nen Jonatan ya nagawa so linawa nen Jehova.

Inar-aro nen Jonatan tan David si Jehova tan mabiskeg so pananisia ra ed sikato

Nanresulta ed baleg a bendisyon so pankakaaro da. Antoy naaralan tayo ed pananisia nen Jonatan? Maabig no say sakey ya lingkor na Dios et pablien to ray kaaro to. Anggano arawi so edad odino kipapasen na bilay na kaaro tayo, baleg so nitulong dad sikatayo no walaan ira na tuan pananisia. Aminpigapiga ya pinabiskeg tan pinaseseg nen Jonatan tan David so sakey tan sakey. Tan kaukolan da itan ya dua, ta onsabi panaon ya lalo nin nasubok so pankakaaro da.

Siopa so Pilien nen Jonatan ya Panmatooran?

Diad primero, labalabay nen Saul si David tan tinuro ton mangidaulo ed saray sundalo to. Balet ag-abayag, ag-alabanan nen Saul so liknaan ya ag-alikna nen Jonatan—say imon. Nantutumbokan so impanalo nen David diad impiguerra tod saray Filisteo, say kalaban na Israel. Kanian sikatoy irarayew tan panbiliban na totoo. Onia ni ingen so kinansion na arum ya Israelitan bibii: “Nilibo so pinatey nen Saul, tan samplon libolibo so pinatey nen David.” Inmalitengteng so layag nen Saul! “Manlapud saman ya agew et naynay lan pansususpetsaan nen Saul si David.” (1 Samuel 18:7, 9) Natatakot si Saul ya ompan samsamen nen David so inkaari. Aliwa man ya iisipen to. Tua, amta nen David ya sikato so onsublay ya ari, balet agton balot inisip ya ekalen ed puesto so ari ya nilanaan nen Jehova!

Wala ray implano nen Saul pian ompatey ed guerra si David, balet siansian mananalo si David. Kanian lalon naar-aro na saray Israelita tan mas binmaleg so respeto dad sikato. Ag-abayag, kinatongtong nen Saul so amin ya aripen to tan si Jonatan tan imbaga tod sikara ya labay ton pateyen si David. Kinombinse to ra ya suportaan da ed sayan plano to! Seguradon mansyodot tan inmaburidon maong si Jonatan ed plano na ama to! (1 Samuel 18:25-30; 19:1) Sikatoy matoor ya anak, balet matoor met ya kaaro. Pero, kaukolan to la natan so manpili no siopa so panmatooran to.

Nansalita si Jonatan: “Agkomon mankasalanan so ari ed si David a lingkor to, ta sikatoy agnankasalanan ed sika tan agunggonaan ka ed saray ginawa to parad sika. Inrisga toy bilay to pian pateyen to imay Filisteo, kanian inter nen Jehova ed interon Israel so baleg a pananalo. Anengneng mo itan, tan agaylay liket mo. Kanian akin et mankasalanan ka ed dala ya andiay kasalanan diad pamatey mod si David ya anggapoy makasengeg?” Apaisip si Saul ed imbaga nen Jonatan tan dinengel toy anak to. Insamba to ni ingen ya agton balot ipapatey si David. Balet agtinoor nen Saul so imbaga to. Nen nantutumbokan lamet so impanalo nen David, talagan agla apokpokan nen Saul so imon to​—tinira toy gayang si David! (1 Samuel 19:4-6, 9, 10) Balet alikiran itan nen David tan batik pian makatakas.

Asalim met la ya kaukolan moy manpili no siopay panmatooran mo? Nayarin mair-irap tan ambelat ed liknaan. Wala ray situasyon ya ompan ibagad sika na arum ya kaukolan mon iyuna so pamilyam anggan antoy nagawa. Balet amta nen Jonatan ya aliwa itan. Akin et pilaan toy ama to anta amta to ya si David et matoor tan maunor ya lingkor nen Jehova? Kanian nandesisyon si Jonatan base ed katooran to ed si Jehova. Indepensa toy David ed ama to. Pero siempre, anggaman say unonan panmamatooran nen Jonatan et si Jehova, impanengneng to nin siansia so katooran tod ama to. Imbes ya say ibaga to et no antoy labay ya narengel nen Saul, sinimbawa toy ama to. Maong so resulta na saray desisyon tayo no aligen tayoy katooran ya impanengneng nen Jonatan.

Say Kasalat na Katooran

Sinali lamet nen Jonatan ya tulongan si Saul ya makapikareenan ed si David, balet natan et aglan talaga ondengel si Saul. Pasekreton nila nen David si Jonatan, tan imbaga ton natatakot lapud napepeligro so bilay to. “Asingsingger ak lad patey!” so kuan tod kaaro to. Imbaga nen Jonatan ya likasen to no kasin labay nen ama to so mikareenan tan ipaamta to itan ed si David. Legan ya akaamot si David, ipaamta ed sikato nen Jonatan so ebat panamegley na pangikena to ed pana to. Insan walay kinerew nen Jonatan ya sambaan nen David: “Agmon balot eekalen so matoor a panangarom ed sankaabungan ko, anggan sano upoten nen Jehova so amin a kalaban mo ed tapew na dalin.” Insipan nen David ya lanang ton asikasoen tan protektaan so pamilya nen Jonatan.​—1 Samuel 20:3, 13-27.

Diad impitongtong nen Jonatan ed si Saul, maong iray imbaga to nipaakar ed si David, balet pinmetang so ulo na ari! Imbaga tod Jonatan ya sikatoy “anak na rebelyoson bii” tan mangiiter kuno na kababaingan ed pamilya ra ta pipilaan toy David. Insan to sinalin kombinsien si Jonatan ya nonoten to met so sarili to. Imbaga nen Saul ed anak to: “Legan a manbibilay ed dalin so anak nen Jesse, sika tan say inkaarim et agniletneg a malet.” Agnampaapekto si Jonatan. Imbes, akikasi lamet ed ama to: “Akin et kaukolan a sikatoy ompatey? Antoy ginawa to?” Sinmabo so dala nen Saul! Anggano masiken lad saman, siansia nin mabiskeg ya sundalo. Tinira toy gayang so anak to! Balet anggano marundunong ya mangikena, agnakna si Jonatan. Asakitan ya maong so liknaan nen Jonatan tan abaibaingan, kanian inmalis.​—1 Samuel 20:24-34.

Pinaneknekan nen Jonatan ya talagan agmakasarili

Diad kaimbuasan, linmay Jonatan ed alog ya asingger ed panaamotan nen David. Singa apantongtongan dan dua, inkena nen Jonatan so pana to pian ipaamtad si David ya talagan desidido si Saul ed pamatey ed sikato. Insan imbaki nen Jonatan so lingkor to ya onlad syudad. Kanian walay tsansa ra nen David ya mantongtong ya magano. Manakis iran dua, tan maermen ya nampatanir si Jonatan ed sayan kabataan ya kaaro to. Manlapu lad saman et kaukolan la nen David so manamot-amot.​—1 Samuel 20:35-42.

Diad sayan mair-irap ya situasyon, pinaneknekan nen Jonatan ya talagan matoor tan agmakasarili. Si Satanas, ya kalaban na amin a matoor a totoo, et labalabay ton magmaliw met ya maambisyon si Jonatan ya singa si Saul. Tandaan, labalabay nen Satanas ya usaren so makasarilin liknaan pian natukso tayon manggawa na aliwa. Atukso toy Adan tan Eva, say inmunan atateng tayo. (Genesis 3:1-6) Balet agto atukso si Jonatan. Seguradon adismayan maong si Satanas! Kasin labanan moy panutukso to? Manbibilay tayod panaon ya maslak a totoo et makasarili. (2 Timoteo 3:1-5) Kasin aligen moy inkamasakripisyo tan inkamatoor nen Jonatan?

Lapud matoor ya kaaro si Jonatan, pinasakbayan toy David pian agnipeligro so bilay to

“Pinabpabli Ta Ka”

Agaylay pambusol nen Saul ed si David, ya anggad sinmabid punto ya say sankanonot to lan lanang et say pamatey tod David. Anggapoy nagawaan nen Jonatan legan ton sankanengneng so ama to ya singa la natatapis. Tinipon nen Saul iray sundalo to tan indaulo to ra pian anapen ed interon Israel so sakey ya inosentin too ya labay ton pateyen. (1 Samuel 24:1, 2, 12-15; 26:20) Kasin akila si Jonatan? Agbalot abitla ed Biblia ya akila si Jonatan. Agton balot itan gawaen ta sikatoy matoor ed si Jehova tan ed si David, tan labay ton tooren imay insipan tod kaaro to.

Agbalot anguman so panangaro nen Jonatan ed si David. Kanian nanggawa na paraan pian makapannengneng ira lamet. Nannengneng irad Hores, ya say labay ton ibaga et “Kakiewan.” Say Hores et walad pasen ya katakelan tan nipalandey, manga pigaran kilometro bandad southeast na Hebron. Akin et inrisga nen Jonatan so bilay to pian labat makapinengneng ed sayan manaamot-amot ya kaaro to? Ibabaga na Biblia ya labay ton tulongan si David ya “ombiskeg so panagmatalek to ed si Jehova.” (1 Samuel 23:16) Panon ya pinabiskeg nen Jonatan si David?

“Agka natatakot,” so kuan nen Jonatan ed kaaro to. Insan to imbaga: “Agka naromog nen Saul ya amak.” Akin et segsegurado si Jonatan? Lapud mabiskeg so pananisia to ya talagan nagawa so imbaga nen Jehova. Imbaga ni nen Jonatan ed si David: “Magmaliw kan ari na Israel.” Pigaran taon lay apalabas, si propetan Samuel so angibaga ed saratan ya balikas, tan natan et ipapanonot nen Jonatan ed si David ya tooren a lanang nen Jehova so ibabaga To. No si David so magmaliw ya ari, anto balet so iisipen nen Jonatan ya nagawad sikato? Imbaga to: “Onkokomadua ak ed sika.” Talagan mapaabeba iyan too! Maliket si Jonatan ya manpasakop ed sayan laki ya mas ugaw ed sikato na 30 ya taon, tan kontento la ed isuporta tod kaaro to! Diad sampot et imbaga nen Jonatan: “Amta met itan nen Saul ya amak.” (1 Samuel 23:17, 18) Amta pa nen Saul diad puso to ya anggapoy laban tod si David ta si Jehova ya mismo so nampili ed sikaton onsublay ya ari!

Pinabiskeg nen Jonatan si David diad panaon ya kakkaukolan to

Diad tinmumbok iran taon, seguradon sankanonot nen David iman ya impantongtong dan sankaaro. Diad tua, aglan balot man naulit. Makapaermen ta aglan balot nagawa imay iilaloan nen Jonatan ya sikatoy magmaliw ya onkokomadua ed si David.

Akiguerra si Jonatan tan si Saul ed saray Filisteo, ya kalaban na Israel. Malinis so konsiensia nen Jonatan ya milaban kaibay ama to, ta agton balot inabuloyan ya naapektoan so panlilingkor tod si Jehova anggano wala ray lingo nen ama to. Makpel tan matoor ya akilaban, ya singa lanang ton gagawaen, pero atalo nin siansia so Israel. Agaylay uges la nen Saul ed saman, ya akibiang ni ingen ed espiritismo, sakey ya seryoson kasalanan ya ibabaga na Ganggan na Dios ya makanepegan na ipapatey. Kanian anggapo lad si Saul so bendisyon nen Jehova. Diad saman ya guerra, taloran ananak a lalaki nen Saul so inatey, kaiba lay Jonatan. Asugatan si Saul insan pinatey toy sarili to.​—1 Samuel 28:6-14; 31:2-6.

“Magmaliw kan ari na Israel,” so kuan nen Jonatan, “tan onkokomadua ak ed sika.”​—1 Samuel 23:17.

Agaylay ermen nen David! Sayan maomaong tan maperdona ya too et nanermenan to ni ingen so impatey nen Saul, say lakin sengegan na irap tan panaamot-amot to! Nanggawa na kansion si David nipaakar ed ermen tod impatey nen Saul tan Jonatan. Diad satan ya kansion, say talagan makapatenyeg na liknaan et samay liriko nipaakar ed inar-aro ton kuya tan kaaro: “Agaylay ermen ko lapud sika, agik a Jonatan; pinabpabli ta ka. Mas makapadinayew so panangarom ed siak nen say panangaro na saray bibii.”—2 Samuel 1:26.

Agbalot nilingwanan nen David so sipan tod si Jonatan. Kayari pigaran taon, inanap tan inasikaso to so walay kapansanan ya anak nen Jonatan, si Mefiboset. (2 Samuel 9:1-13) Seguradon dakel so naaralan nen David ed si Jonatan—say katooran to, say determinasyon ton gawaen so duga, tan say tuloytuloy ya isuporta ed kaaro anggano aliwan mainomay. Anto met so naaralan tayo? Kasin say aanapen tayon kaaro et samay singa si Jonatan? Sikatayo ey, anton klase tayon kaaro? No tulongan tayo ray kakaaro tayo ya ombiskeg so pananisia rad si Jehova, no say Dios so manunan panmatooran tayo, tan no mansiansia tayon matoor imbes ya unaen so sarili tayon pankaabigan, magmaliw tayon singa si Jonatan. Tan naalig tayoy pananisia to.

^ par. 10 Nen unonan abitla si Jonatan ed salaysay na Biblia, diad gapo na uley nen Saul, sikatoy komander na armada kanian nayarin manga 20 años to. (Numeros 1:3; 1 Samuel 13:2) Nanuley si Saul ed 40 ya taon. Kanian nen inatey si Saul, manga 60 lay Jonatan. Si David et 30 años nen inatey si Saul. (1 Samuel 31:2; 2 Samuel 5:4) Kanian mapatnag ya panguloan na manga 30 ya taon si Jonatan ed si David.