Nen Hulyo 1948, diad syudad na Kassel diad Germany, inorganisa na Saray Tasi nen Jehova so sankabalegan ya pantitipon na saray Tasi ed Europe kayari na World War II. Walay ginawan exhibit na Saray Tasi nen Jehova diad Kassel pian selebraan so koma-70 ya anibersaryo na satan ya kombension. Diad loob na 12 ya agew na exhibit, masulok ya 2,000 ya totoo so inmatendi. Say okasyon et imbalita met diad sakey ya istasyon na telebisyon tan ed pigaran dyaryo ed Germany.

Say agnalinglingwanan ya kombension ed Kassel et inatendian na 23,150 a totoo, kaiba la ray 1,200 ya nampabautismo. Maslak ed saray espiker ed saman tan dakel ed saray inmatendi et akaliktar ed saray panamairapan ya kampo. Pian bidbiren iratan ya agawa, nansalita ed panangilukas ya seremonya na exhibit so direktor na Breitenau Concentration Camp Memorial Site ya si Dr. Gunnar Richter, tan impaliwawa to so impanirap na Saray Tasi nen Jehova legan na impanuley na Nazi.

Nanengneng ed saray litraton aka-display ed exhibit ya aderal lawari so Kassel lapud saray panlalaban nen World War II. Kanian nen inorganisa na saray agagi so kombension, say alenleneg a pasen ya naala dan pankombensionan et sakey ya alog ya napnoy angkabaleg ya abot lapud bomba. Oniay impaneskribe nen Brother Kurt Rex, ya akaatendi ed kombension, ed ngalngali apatiran simba ya impankimey da pian iparaan so lugar ya pankombensionan: “Makapakesaw iman ya kimey. Angusar kami ni ray timba pian ekalen so danum ya atipon ed saray angkabaleg ya abot lapud bomba. Insan kami ni labat akagapon nankimey tan tinambakan mi na bato tan arum ni ran akera ed saray aderal-deral ya abung ed kaliberliber. Agaylay irap met ya plastadoen so dalin, ta anggapoy angkabaleg ya makina odino kagawaan ya nausar ed pamplastado. Lanang ya onuuran ed saman kanian lanang kamin ambasa.” Anggano tuloytuloy so uran, manga 10,000 cubic meters (13,080 cu yd) so karakel na bato tan sementon nanlapud geray so naulor na saray agagi tayo.

Diad sakey ya paliwawa ed gapo na exhibit, indeskribe nen Wolfram Slupina, sakey a representative na branch office na Saray Tasi nen Jehova ed Germany, so awawey tan liknaan na saray agagi legan dan manpreprepara parad kombension: “Kayari iran nibulos ed saray panamairapan ya kampo, agda kaskasian so sarili da tan ag-ira nanem-em na sakit na linawa. . . . Apakiwas iran makulin mankimey lapud bulos la ra.”

Diad mensahe to ed saray linmad exhibit, oniay impaliwawa na city councilor tan representative na administrasyon na munisipyo na Kassel ya si Esther Kalveram: “Agnalinglingwanan iman ya kombension, aliwa labat ya parad Saray Tasi nen Jehova noagta para met ed syudad na Kassel.”

Say kombension ed Kassel nen 1948 tan say exhibit parad koma-70 taon ya anibersaryo na satan nen 2018 et paneknek ya determinado iray totoo nen Jehova ya mantitipon pian naaralan so Biblia anggano mair-irap itan ya gawaen.​—Salmo 35:18.