Kayari na masulok ya 26 ya taon, naawat na Saray Tasi nen Jehova ed Germany so parehon status ya iiter ed saray manunan relihyon ed bansa. Nen Enero 27, 2017, inter na North Rhine-Westphalia, say sampot ed 16 ya states na Germany, so public law status (pamidbir ed relihyoson organisasyon bilang sakey ya korporasyon) ed Saray Tasi nen Jehova. Importante iyan desisyon ed saray Tasi ta anggano masulok la ran 100 ya taon ya walad Germany, say national headquarters da tan saray nilibon kongregasyon ed bansa et ag-ipapasen ya saksakey ya relihyoson asosasyon. Natan ya bibidbiren la na amin ya states na Germany so public law status na saray Tasi, ipapasen la ran saksakey ya relihyoson asosasyon tan nanaawat da lay probisyon na sayan status.

Nen 1921 so unonan inkarehistro na Saray Tasi nen Jehova ed Germany diad probisyon na private law. Nen nankasakey lay Germany nen 1990, nan-aplay iray Tasi nen Jehova na public law status pian naawat da met iray probisyon ya iter na satan ed saray relihyoson organisasyon.

Pian nirehistro so relihyoson organisasyon bilang public law corporation ed interon bansa, kaukolan ya naawat day public law status ed state na Germany ya kawalaan da. Insan la rad satan man-aplay parad 15 nin states na Germany. Nen 1990, say relihyoson asosasyon ya Jehovas Zeugen in Deutschland (Saray Tasi nen Jehova ed Germany) et inmunan nan-aplay ed state na Berlin, ta wadtan so opisina ra. Maslak ed saray relihyoson organisasyon et maples ya naikdan na public law status, manga sakey o duaran taon labat. Balet, agni inikdan na gobierno na Berlin iray Tasi nen Jehova na public law status diad loob na dakel ya taon. Say sakey ya rason ya ibabaga na gobierno et lapud ag-omboboto iray Tasi no eleksion. Balet, aliwa itan ya dugan rason ta unong ed batas, ag-oobligaen iray citizen na Germany ya omboto, imbes, boluntaryo iya.

Sayan isyu et insegep ed korte. Nen Marso 24, 2005, say Higher Administrative Court diad Berlin so nandesisyon a Saray Tasi nen Jehova ed Germany et nepeg a bidbiren bilang “corporation na public law.” Apalabas so masulok ya sakey taon, say state na Berlin so pinmayag ya ikdan na public law status iray Tasi nen Jehova, kayari na 16 ya taon ya impanalagar da.

Insan, nan-aplay iray Tasi nen Jehova parad public law status ed 15 nin states na Germany. Nen 2009, walay 11 ya states ya angiyabuloy na public law status; insan tinmumbok so 3 nin states kayari pigaran taon; tan say sampot ya state, say North Rhine-Westphalia, so angiyabuloy na public law status ed Saray Tasi nen Jehova nen Enero 27, 2017. Say impasyan impansagpot na Saray Tasi nen Jehova pian nawalaan na parehon status ya iiter ed saray manunan relihyon ed Germany et asumpal ya siansia kayari na 26 ya taon.

Say opisina tan say masulok ya 2,000 a kongregasyon na Saray Tasi nen Jehova ed Germany et manpa-function la natan bilang saksakey ya korporasyon. Nensaman, lapud ipapasen so kada kongregasyon bilang sakey ya korporasyon, kakaukolanen na batas na state ya man-submit so kada kongregasyon na tinaon ya report tan tax returns. No walay pananguman ed kongregasyon, kaukolan met ya ireport ed gobierno, singa say pakaturo ed balo iran elder, pangaliw na balo iran property, odino panguman na ngaran tan pan-merge na saray kongregasyon. Kanian matrabaho tan maabak na panaon iraya ed kimey na saray elder ed kongregasyon, balet natan et mas akapokus la ra ed pangasikaso ed saray membro na kongregasyon. Nen agni ira naikdan na public law status, kaukolan met ya manbayar iray kongregasyon parad panproseso na report. Oniay imbaga na abayag lan elder ed sakey ya kongregasyon: “Mas nauusar mi la natan so pundo na donasyon parad publikon ministeryo na saray membro na kongregasyon mi.”

No anggapoy legal ya status na public law, agbidbiren iray Tasi nen Jehova bilang manunan relihyon, anggano walay manga 274,000 ya Tasi tan arum ni iran onaatendi ed pantitipon da diad Germany. Oniay imbaga nen Armin Pikl, attorney ed branch office na Saray Tasi nen Jehova diad Germany: “Legan na masulok ya 26 ya taon na impangilaban mi pian naala so status bilang korporasyon na public law, dakdakel iray ibabalita na media ya aliwan tua tan makaderal ed relihyon mi, no maminsan et sinimba ni ingen. Natan et ondadaiset la.” Onia so imbaga nen Werner Rudtke, ya abayag lan Tasi: “Lapud kaukolan ya maunor ed batas so relihyoson asosasyon ya labay toy magmaliw ya public law corporation, nidepensa la natan iray palson akusasyon kontra ed saray Tasi.” Onia met so imbaga na sakey nin Tasi, si Petra, ed apalabas iran problema ya aarapen na saray maneeskuelan Tasi: “Akatulong ed saray maneeskuela iyan impamidbir. Ta anggad natan et duma ni so panagtrato ed saray estudyante ya Tasi lapud palson alegasyon ya membro ira na sakey ya ‘sekta,’ imbes na sakey ya relihyon.”

Maliket iray Tasi nen Jehova ed Germany ta binidbir la na gobierno so relihyoson kimey da. Tinmulong iya pian onkualipika ira parad public law status. Iilaloan da ya sayan impamidbir et ontulong ed apalabas iran problema ra tan makagunggona bilang indibidual tan bilang sakey ya relihyon.