Onlad karga

OKTUBRE 16, 2017
ARMENIA

Sinuportaan na European Court of Human Rights so Karapatan na Saramay Agnaawat na Konsiensia ra so Mansundalo Diad Armenia

Sinuportaan na European Court of Human Rights so Karapatan na Saramay Agnaawat na Konsiensia ra so Mansundalo Diad Armenia

Nen Oktubre 12, 2017, nandesisyon so European Court of Human Rights (ECHR) ya aliwan patas so sentensia na apatiran Tasi nen Jehova diad Armenia. Impriso iraman ya Tasi lapud agnaawat na konsiensia ra so alternatibon serbisyo ya kontrolado na militar. Diad desisyon na ECHR, imbaga ran saray apatiran kabataan ya lalaki et impriso ya anggapoy kasalanan lapud ag-akapangiter so Armenia ed sikara na dugan alternatibon civilian service.

Say kaso ya Adyan and Others v. Armenia et tungkol ed si Artur Adyan, Vahagn Margaryan, Harutyun Khachatryan, tan Garegin Avetisyan, ya impriso nen summer na 2011 ed loob na duara tan kapalduan taon. Nandesisyon so ECHR ya say impan-akusa tan impangipriso ed sarayan kabataan et kontra ed karapatan dan mandesisyon base ed konsiensia tan relihyon. Satan a karapatan et iyaabuloy na Article 9 na European Convention on Human Rights (Convention). Ingganggan so Armenia ya manbayar na EUR 12,000 (USD 14,200) ed kada aplikante bilang bayar ed impanirap da.

Sarayan kabataan et impriso kayarin nandesisyon so Grand Chamber na ECHR ed samay kaso na Bayatyan v. Armenia (2011) ya protektado na Convention so karapatan na saramay agnaako na konsiensia ra so mansundalo. * Lapud sayan karapatan ya protektado natan, kaukolan ya mangiter so Armenia na alternatibon serbisyo parad saramay agnaako na konsiensia ra so mansundalo. Balet, say alternatibon serbisyo ya iiter na Armenia ed saman et agmakakatumbok ed international standard lapud say serbisyo et direktan kontrolado na militar. Sarayan apatiran kabataan ya agda naako so ontan ya alternatibon serbisyo et impriso, a singa saray arum nin kaagian da. Diad kaso ya Adyan, nandesisyon so ECHR ya saramay agnaawat na konsiensia ra so mansundalo et nepeg ya ikdan na Armenia na “alternatibon serbisyo ya talagan parad civilian service, ya aliwan singa panagparusa.”

Diad bandad unor na 2013, sanen nibulos so apatiran kabataan ed kaso ya Adyan, impatupad ya siansia na Armenia so tudtuan alternatibon civilian service ya aliwa lan kontrolado na militar. Bilang resulta, agla ipripriso iray Tasi nen Jehova ed Armenia ya agnaawat na konsiensia ra so pansundalo lapud panutumbok dad nipasal ed Biblia ya konsiensia ra. Misasalamat iran maong ed sayan niiter ed sikara ya tudtuan alternatibon serbisyo.

^ par. 3 Bayatyan v. Armenia [GC], no. 23459/03, ECHR 2011