Onlad karga

Onlulusob iray pulis na Russia—ya walay awit dan armas tan maso—ed sakey ed saray 31 ya abung ya ni-raid diad syudad na Nizhniy Novgorod nen Hulyo 2019

AGOSTO 7, 2019
RUSSIA

Masulok Lan 600 ya Abung na Saray Tasi Diad Russia so Nilusob na Saray Pulis

Masulok Lan 600 ya Abung na Saray Tasi Diad Russia so Nilusob na Saray Pulis

Diad apalabas ya 18 bulan, nilusob odino ni-raid na saray pulis tan saray Federal Security Service (FSB) agent na Russia so 613 ya abung na saray agagi tayo. Manlapu nen Enero 2019 et 322 ya abung na agagi so nilusob na saray autoridad​—mas dakel la itan nen samay 281 ya abung ya ni-raid ed interon 2018.

Diad imbebeneg iran bulan, mas lalon naaaruman so bilang na saray agagi tayon ni-raid na saray pulis. Nen Hunyo, walay 71 ya ni-raid, tan nen Hulyo, walay 68​—baleg so inyatagey na satan no ikompara ed 23.4 ya average a bilang na saray ni-raid kada bulan legan na 2018.

Saray autoridad na Russia ya onlulusob ed sakey ya abung diad Nizhniy Novgorod

Diad kaslakan ya raid, biglan onlusob ed sakey ya abung odino apartment so grupo na saray pulis ya asakoban so lupa ra tan dakdakel so armas da. No akaloob la ra, wala ray agawa ya tinutukan day paltog iray Tasi, anggan saray ugugaw tan maedad la, ya singa ra mauge-uges ya kriminal. Agla pankelawan ya miabobon so arum nin eksperto ed imbaga nen Dr. Derek H. Davis, say datin direktor na J.M. Dawson Institute of Church-State Studies diad Baylor University. Oniay imbaga to: “Lapud maruksan pamapasegsegang na Russia ed sakey ya marendeen a grupo ya singa Saray Tasi nen Jehova et ompapaway ya sikara so ‘extremist.’”

Makapaermen ta legan ya naaaruman so bilang na saray raid, naaaruman met iray kason kriminal ya iyaakusa da ed saray agagi tayo. Wala la natan so 244 ya agagin lalaki tan bibii ya naakusaan ya akagawa na krimen diad Russia tan diad Crimea. Satan a bilang et mas dakel ni nen say doblin bilang manlapu la nen Disyembre 2018, ya walay 110 kaso ya agni asumpal. Diad 244 ya agagin walay kaso, 39 so akapriso, 27 so walad house arrest, tan masulok ya 100 so walaan na nanduruman restriksion.

Anggano tuloytuloy ya pupuntiryaen na saray autoridad na Russia iray agagi tayo, ‘anggapod sikatayo so onkapuy lapud sarayan kairapan.’ Imbes, napapaseseg itayo no narerengel tayo iray report ya mansiasiansian matoor tan mansusungdo iray agagi tayo. Kanian idadayew tan pisasalamatan tayo si Jehova lapud eebatan to iray dakdakel ya pikakasi tayo parad sikara, tan mas lalon ombibiskeg so talek tayo ya tuloytuloy ton gawaen itan.​—1 Tesalonica 3:3, 7.