Onlad karga

AGOSTO 15, 2019
POLAND

Warsaw, Poland—2019 ‘Say Aro Agbalot Mangangga’! Internasyonal a Kombension

Warsaw, Poland—2019 ‘Say Aro Agbalot Mangangga’! Internasyonal a Kombension
  • Petsa: Agosto 9-11, 2019

  • Lugar: Municipal Stadium na Legia Warsaw tan Torwar Hall, Warsaw, Poland

  • Lenguahe na Programa: English, Polish

  • Inmatendi: 32,069

  • Abautismoan: 190

  • Bilang na Imbitadon Delegate: 6,892

  • Imbitadon Branch: Central Europe, Chile, Ecuador, Finland, France, Georgia, Hungary, Japan, Korea, Moldova, Romania, Ukraine, United States

  • Eksperiensya: Oniay insulat nen Mr. Kamil Kaźmierkiewicz, say general manager na Four Points by Sheraton Warsaw Mokotów (sakey ed saray hotel ya nampundoan na saray delegate): “Anggapon balot so problemak ed sikayo​—komon ta dakel ni magmaliw ya bisitak ya singa sikayo ya maomaong tan positibon totoo. Sankanengneng so malet ya aroan tan pankakasakey yo. . . . Saludo ak ed inkauksoy na sayan okasyon.”

    Onia met so imbaga nen Mr. Kamil Lubański, say akanggawa na KL team, sakey a kompanya na bus ya kinontrata ya luganan na saray delegate: “Manlapu lad gapo na impikimeyan mi ed Saray Tasi nen Jehova, anengneng ko la ya seguradon balibali tan maayos so pansumpalan. Talagan organisado tan propesyonal iran totoo. Implano tan imparaan dan maong iyan baleg ya okasyon. Asali la na kompanya mi so akapikimeyan ed saray sikat ya kliyente, pati diad saray empleyado na gobierno, ya nan-organisa la na saray event diad nanduruman lugar ed bansa tan ed arum nin bansa ed Europe. Balet mataltalag so makalmoy kliyente ya talagan organisado tan akaparaan a maong. Saray driver mi tan arum ya mantratrabaho ed sikami et positibon amin so ibabaga da nipaakar ed saray Tasi nen Jehova. Komon ta diad arapen et makapaniba tayo lamet.”

 

Malikeliket ya in-welcome iray delegate diad airport

Saray inmatendi ya paloob ed venue nen Biernes na kabuasan

Say itsura na sakey ed saray venue na kombension manlapud tagey, say Municipal Stadium na Legia Warsaw

Si Brother Gerrit Lösch na Mananguley ya Ulop legan ton ipapaliwawa so sampot ya parte nen Biernes

Taloran balon agagi legan iran babautismoan nen Sabado

Madengedengel iray agagi ed programa na kombension

Saray delegate ya akasulong na tradisyonal ya kawes ya manpapalitrato ed paway na stadium

Diad Simba, legan ya walad abay na stage iray agagin walad special full-time, kinansion da so sampot ya kansion kabansag iray audience

Sakey ya grupo na bibiin kabataan legan dan kakansionan iray delegate diad evening gathering

Onsasayaw iray agagi na tradisyonal ya sayaw na Poland diad evening gathering