Onlad karga

Say District Court Bratislava I et sakey ed saray korte ya nan-absuelto ed Saray Tasi nen Jehova ya asentensiaan diad apalabas lapud agda labay so mansundalo.

SETYEMBRE 27, 2018
BALITA ED INTERON MUNDO

Inabsuelto na Saray Korte na Czech Republic tan Slovakia so Kaso na Saray Agagi Tayo

Inekal Lan Amin so Pigaran Dekada ya Rekord na Saramay Impasen ya Kriminal Lapud Agda Labay so Mansundalo

Inabsuelto na Saray Korte na Czech Republic tan Slovakia so Kaso na Saray Agagi Tayo

Diad agano ni ran taon, inabsuelto na saray korte na Czech Republic tan Slovakia iray kaso na saray agagi tayo ya asentensiaan nensaman bilang kriminal lapud agda labay so mansundalo odino lapud mibibiang irad panagpulong a kimey​—saray kimey ya natan et agla ipapasen ya krimen. Say sakey et kaso na agin asentensiaan nen 1925 tan inabsuelto diad agano ni labat. (Nengnengen so istoryay bilay nen Brother Martin Boor, ya indeklaran not guilty kayari 90 taon na impakasentensia to.) Inmabobon so korte ya walay kanepegan na saray agagi tayo ya gawaen iray papanisiaan da lapud relihyon da.

Manlapu la nen Mayo 2017, kinansela na Korte Suprema na Czech Republic so sentensia ed 45 ya agagi tayo ya ag-akibiang ed pansundalo legan na uley na Komunista kanian sikaray inakusaan tan senentensiaan. Nen Oktubre 2017, inabsuelto met na Korte Suprema so kaso nen Brother Martin Magenheim ya asentensiaan nen 1978 lapud pampupulong to.

Diad Slovakia, inabsuelto na District Court na Bratislava I so apatiran agagi tayo ed “krimen” ya agda pansundalo, tan ontan met so ginawa na Regional Court na Trenčín ed sakey nin agi tayo. Si Eva Borošová, sakey a sister, ya asentensiaan nen 1974 lapud pampupulong to et inabsuelto na District Court na Rimavská Sobota. Nen Enero 9, 2018, kinansela na District Court na Michalovce so desisyon ed kaso nen Brother Miloš Išky Janík nen 1993, ya aminpigan asentensiaan ta agto labay so mantrabaho para ed gobierno lapud ag-itan naawat na konsiensia to.

Oniay imbaga nen André Carbonneau, say abogado ya mangirerepresenta ed Saray Tasi nen Jehova: “Dakel ya Tasi so asentensiaan diad dakel ya taon ta agnaako na konsiensia ra so pansundalo odino lapud pampupulong da. Nen inawat na saray korte ya aliwan duga ya sentensiaan iray Tasi, impanengneng na saray korte ya rerespetoen da so manunan katuaan ya kada too et walay karapatan ton manpili na panisiaan tan pandayewan to. Say pansasagpot na sarayan korte ya ipetek so aliwan mahustisya ya impantrato ed saramay agmalabay ya mansundalo tan ed saramay manpupulong, sanen agni bibidbiren na dakel a gobierno so karapatan na too, so angiter na maong ya alimbawa parad arum nin bansa ya agni manrerespeto ed karapatan na kada too. Ontan met, akatulong iray korte pian nalinisan so reputasyon na saray inosente ya kapara tayon mandadayew ed Dios. Misalsalamat tayon maong ed satan, lapud ibabaga na Biblia ya mabmabli so maabig ya ngaran.”​—Eclesiastes 7:1.