Onlad karga

Mas onloloor so panamasegsegang ed saray agagi tayo ya manaayam diad pigaran pasen ed rehyon na Donetsk tan Luhansk, ya walad eastern Ukraine. Sakey ya Kingdom Hall diad teritorya na Luhansk so nilooban, dineral, tan pinoolan nen Mayo 30, 2018.

OKTUBRE 15, 2018
UKRAINE

Sinebelan na “Donetsk People’s Republic” Iray Tasi nen Jehova

Sinebelan na “Donetsk People’s Republic” Iray Tasi nen Jehova

Nen Setyembre 26, 2018, indeklara na Korte Suprema na “Donetsk People’s Republic” (DPR) ya “extremist” so relihyoson grupo na Saray Tasi nen Jehova, kanian insebel da iray aktibidad tayo. Ag-anggan kinonsulta na general prosecutor, say angigapo na impangakusa ed organisasyon tayo, ontan met na Korte so anggan siopa ed Saray Tasi nen Jehova legan na panaglitis. Say panamasegsegang ed Saray Tasi nen Jehova et mas lalon ondadakel diad sayan rehyon. Sayan pananebel so sankabaloan ya paraan na panamasegsegang diman.

Say situasyon na saray agagi tayo ya manaayam diad pigaran pasen ed saray rehyon na Donetsk tan Luhansk, diad eastern Ukraine, et mas onloloor ni manlapu la nen indeklara na Korte Suprema na DPR nen kapegleyan na 2017 ya arum ed saray publikasyon tayo et “extremist.” Legan na satan a taon, walay ginawan interogasyon na saray pulis ed masulok ya 170 a Tasi. Nantutumbokan ya organisadon sinamsam na saray autoridad ed saratan ya rehyon iray Kingdom Hall. Manlapu nen Agosto 29, 2018, walay 16 iran Kingdom Hall ya akompiska.

Anggaman nasesebelan so panagdayew na saray agagi tayo diad sarayan teritorya, tuloytuloy ni ran manmamatalek ed “Dios na kilalaban.”​—Salmo 18:46.