Skip to content

Skip to secondary menu

Skip to table of contents

ਯਹੋਵਾਹ ਦੇ ਗਵਾਹ

ਪੰਜਾਬੀ

ਜਾਗਰੂਕ ਬਣੋ!  |  ਜਨਵਰੀ 2015

 ਪਰਿਵਾਰ ਦੀ ਮਦਦ ਲਈ| ਵਿਆਹੁਤਾ ਜੀਵਨ

ਸਮਝੌਤਾ ਕਿਵੇਂ ਕਰੀਏ?

ਸਮਝੌਤਾ ਕਿਵੇਂ ਕਰੀਏ?

ਚੁਣੌਤੀ

ਤੁਹਾਡੀ ਅਤੇ ਤੁਹਾਡੇ ਜੀਵਨ ਸਾਥੀ ਦੀ ਕਿਸੇ ਗੱਲ ਬਾਰੇ ਆਪਣੀ-ਆਪਣੀ ਪਸੰਦ ਹੈ। ਦੇਖਿਆ ਜਾਵੇ, ਤਾਂ ਤੁਹਾਡੇ ਸਾਮ੍ਹਣੇ ਤਿੰਨ ਰਾਹ ਹਨ:

  1. ਤੁਸੀਂ ਆਪਣੀ ਗੱਲ ਮਨਵਾਉਣ ਲਈ ਆਪਣੀ ਜ਼ਿੱਦ ’ਤੇ ਅੜੇ ਰਹਿ ਸਕਦੇ ਹੋ।

  2. ਤੁਸੀਂ ਆਪਣੇ ਸਾਥੀ ਦੀ ਮਰਜ਼ੀ ਸਾਮ੍ਹਣੇ ਝੁਕ ਸਕਦੇ ਹੋ।

  3. ਤੁਸੀਂ ਦੋਵੇਂ ਸਮਝੌਤਾ ਕਰ ਸਕਦੇ ਹੋ।

ਤੁਸੀਂ ਸ਼ਾਇਦ ਕਹੋ: ‘ਪਰ ਮੈਨੂੰ ਸਮਝੌਤਾ ਕਰਨਾ ਪਸੰਦ ਨਹੀਂ ਕਿਉਂਕਿ ਨਾ ਤਾਂ ਮੇਰੀ ਗੱਲ ਪੂਰੀ ਹੋਣੀ ਤੇ ਨਾ ਹੀ ਉਹ ਦੀ!’

ਯਕੀਨ ਰੱਖੋ ਕਿ ਸਮਝੌਤਾ ਕਰਨ ਨਾਲ ਤੁਹਾਨੂੰ ਦੋਹਾਂ ਨੂੰ ਖ਼ੁਸ਼ੀ ਮਿਲ ਸਕਦੀ ਹੈ। ਪਰ ਇਹ ਜਾਣਨ ਤੋਂ ਪਹਿਲਾਂ ਕਿ ਸਮਝੌਤਾ ਕਿਵੇਂ ਕਰੀਏ, ਤੁਹਾਨੂੰ ਸਮਝੌਤੇ ਬਾਰੇ ਕੁਝ ਗੱਲਾਂ ਪਤਾ ਹੋਣੀਆਂ ਚਾਹੀਦੀਆਂ ਹਨ।

ਤੁਹਾਨੂੰ ਕੀ ਪਤਾ ਹੋਣਾ ਚਾਹੀਦਾ

ਦੋਵਾਂ ਲਈ ਮਿਲ ਕੇ ਸਮਝੌਤਾ ਕਰਨਾ ਜ਼ਰੂਰੀ ਹੈ। ਵਿਆਹ ਤੋਂ ਪਹਿਲਾਂ ਤੁਸੀਂ ਸ਼ਾਇਦ ਸਾਰੇ ਫ਼ੈਸਲੇ ਆਪ ਹੀ ਕਰਦੇ ਸੀ। ਪਰ ਹੁਣ ਹਾਲਾਤ ਬਦਲ ਗਏ ਹਨ। ਤੁਸੀਂ ਦੋਵੇਂ ਆਪਣੀ-ਆਪਣੀ ਪਸੰਦ ’ਤੇ ਅੜੇ ਰਹਿਣ ਦੀ ਬਜਾਇ ਆਪਣੇ ਵਿਆਹੁਤਾ ਰਿਸ਼ਤੇ ਨੂੰ ਜ਼ਿਆਦਾ ਅਹਿਮੀਅਤ ਦਿਓ। ਸਮਝੌਤਾ ਕਰਨ ਦੇ ਫ਼ਾਇਦਿਆਂ ਬਾਰੇ ਸੋਚੋ ਨਾ ਕਿ ਨੁਕਸਾਨਾਂ ਬਾਰੇ। ਐਲੇਗਜ਼ੈਂਡਰਾ ਨਾਂ ਦੀ ਪਤਨੀ ਕਹਿੰਦੀ ਹੈ: “ਇਕ ਦੀ ਬਜਾਇ ਦੋਵੇਂ ਜਣੇ ਇਕੱਠੇ ਵਿਚਾਰ ਕਰ ਕੇ ਆਪਣੀ ਸਮੱਸਿਆ ਦਾ ਵਧੀਆ ਹੱਲ ਲੱਭ ਸਕਦੇ ਹਨ।”

ਗੱਲ ਸੁਣਨ ਲਈ ਤਿਆਰ ਹੋਣਾ ਜ਼ਰੂਰੀ ਹੈ। ਵਿਆਹੁਤਾ ਜ਼ਿੰਦਗੀ ਦਾ ਸਲਾਹਕਾਰ ਜੌਨ. ਐੱਮ. ਗੌਟਮਨ ਲਿਖਦਾ ਹੈ: “ਤੁਹਾਨੂੰ ਆਪਣੇ ਸਾਥੀ ਦੀ ਹਰ ਗੱਲ ਨਾਲ ਸਹਿਮਤ ਹੋਣ ਦੀ ਲੋੜ ਨਹੀਂ ਹੈ, ਪਰ ਤੁਹਾਨੂੰ ਉਸ ਦੀਆਂ ਗੱਲਾਂ ’ਤੇ ਸੋਚ-ਵਿਚਾਰ ਕਰਨ ਲਈ ਤਿਆਰ ਰਹਿਣਾ ਚਾਹੀਦਾ ਹੈ। ਜੇ ਤੁਹਾਡਾ ਜੀਵਨ ਸਾਥੀ ਤੁਹਾਡੇ ਨਾਲ ਕਿਸੇ ਮਸਲੇ ਬਾਰੇ ਗੱਲ ਕਰਦਾ ਹੈ ਅਤੇ ਤੁਸੀਂ ਚੁੱਪ ਵੱਟ ਕੇ ਬੈਠੇ ਰਹਿੰਦੇ ਹੋ ਤੇ ਸਿਰਫ਼ ਨਾ ਵਿਚ ਹੀ ਆਪਣਾ ਸਿਰ ਹਿਲਾਉਂਦੇ ਹੋ (ਜਾਂ ਨਾਂਹ ਕਹਿਣ ਬਾਰੇ ਸੋਚਦੇ ਹੋ), ਤਾਂ ਤੁਹਾਡੀ ਗੱਲਬਾਤ ਕਿਸੇ ਸਿਰੇ ਨਹੀਂ ਲੱਗਣੀ।” *

ਆਪਣੀ ਗੱਲ ਛੱਡਣ ਲਈ ਤਿਆਰ ਹੋਣਾ ਜ਼ਰੂਰੀ ਹੈ। ਕੋਈ ਵੀ ਅਜਿਹੇ ਜੀਵਨ ਸਾਥੀ ਨਾਲ ਰਹਿਣਾ ਪਸੰਦ ਨਹੀਂ ਕਰੇਗਾ ਜੋ ਇਹ ਕਹੇ “ਜੋ ਮੈਂ ਚਾਹੁੰਦਾ ਉਹੀ ਹੋਣਾ ਚਾਹੀਦਾ।” ਕਿੰਨਾ ਵਧੀਆ ਹੋਵੇਗਾ ਜੇ ਦੋਵੇਂ ਜਣੇ ਇਕ-ਦੂਜੇ ਦੀ ਮੰਨਣ ਲਈ ਤਿਆਰ ਰਹਿਣ। ਜੂਨ ਨਾਂ ਦੀ ਪਤਨੀ ਕਹਿੰਦੀ ਹੈ: “ਕਦੇ-ਕਦੇ ਮੈਂ ਆਪਣੇ ਪਤੀ ਦੀ ਗੱਲ ਮੰਨ ਕੇ ਉਨ੍ਹਾਂ ਨੂੰ ਖ਼ੁਸ਼ ਕਰ ਦਿੰਦੀ ਹਾਂ ਤੇ ਕਦੇ-ਕਦੇ ਉਹ ਮੇਰੀ ਗੱਲ ਮੰਨ ਕੇ ਮੈਨੂੰ ਖ਼ੁਸ਼ ਕਰ ਦਿੰਦੇ ਹਨ। ਪਤੀ-ਪਤਨੀ ਦੇ ਰਿਸ਼ਤੇ ਵਿਚ ਇੱਦਾਂ ਹੀ ਹੋਣਾ ਚਾਹੀਦਾ ਹੈ। ਵਿਆਹੁਤਾ ਰਿਸ਼ਤੇ ਵਿਚ ਸਿਰਫ਼ ਲੈਣਾ ਹੀ ਨਹੀਂ ਹੁੰਦਾ, ਸਗੋਂ ਦੇਣਾ ਵੀ ਹੁੰਦਾ ਹੈ।”

 ਤੁਸੀਂ ਕੀ ਕਰ ਸਕਦੇ ਹੋ?

ਸਹੀ ਤਰੀਕੇ ਨਾਲ ਗੱਲ ਸ਼ੁਰੂ ਕਰੋ। ਅਕਸਰ ਤੁਸੀਂ ਜਿਸ ਲਹਿਜੇ ਵਿਚ ਗੱਲ ਸ਼ੁਰੂ ਕਰਦੇ ਹੋ, ਉਸੇ ਲਹਿਜੇ ਵਿਚ ਗੱਲ ਖ਼ਤਮ ਹੁੰਦੀ ਹੈ। ਜੇ ਤੁਸੀਂ ਚੁਭਵੇਂ ਲਫ਼ਜ਼ਾਂ ਨਾਲ ਗੱਲਬਾਤ ਸ਼ੁਰੂ ਕਰਦੇ ਹੋ, ਤਾਂ ਸ਼ਾਇਦ ਸ਼ਾਂਤੀ ਨਾਲ ਸਮਝੌਤਾ ਨਾ ਹੋਵੇ। ਇਸ ਲਈ ਬਾਈਬਲ ਦੀ ਇਸ ਸਲਾਹ ਮੁਤਾਬਕ ਚੱਲੋ: ‘ਹਮਦਰਦੀ, ਦਇਆ, ਨਿਮਰਤਾ, ਨਰਮਾਈ ਤੇ ਧੀਰਜ ਨੂੰ ਕੱਪੜਿਆਂ ਵਾਂਗ ਪਹਿਨ ਲਓ।’ (ਕੁਲੁੱਸੀਆਂ 3:12) ਅਜਿਹੇ ਗੁਣ ਤੁਹਾਨੂੰ ਬਹਿਸਬਾਜ਼ੀ ਕਰਨ ਤੋਂ ਬਚਾਉਣਗੇ ਅਤੇ ਸਮੱਸਿਆ ਦਾ ਹੱਲ ਲੱਭਣ ਵਿਚ ਤੁਹਾਡੀ ਮਦਦ ਕਰਨਗੇ।—ਬਾਈਬਲ ਦਾ ਅਸੂਲ: ਕੁਲੁੱਸੀਆਂ 4:6.

ਦੇਖੋ ਕਿ ਤੁਸੀਂ ਕਿਹੜੀਆਂ ਗੱਲਾਂ ’ਤੇ ਸਹਿਮਤ ਹੋ। ਜੇ ਸਮਝੌਤਾ ਕਰਨ ’ਤੇ ਬਹਿਸਬਾਜ਼ੀ ਹੁੰਦੀ ਹੈ, ਤਾਂ ਸ਼ਾਇਦ ਇਸ ਦਾ ਮਤਲਬ ਹੈ ਕਿ ਤੁਸੀਂ ਦੋਵੇਂ ਆਪਣੇ ਮਤਭੇਦਾਂ ’ਤੇ ਬਹੁਤ ਜ਼ਿਆਦਾ ਧਿਆਨ ਦੇ ਰਹੇ ਹੋ। ਇਸ ਦੀ ਬਜਾਇ, ਦੇਖੋ ਕਿ ਤੁਸੀਂ ਕਿਨ੍ਹਾਂ ਗੱਲਾਂ ’ਤੇ ਸਹਿਮਤ ਹੋ। ਇਸ ਤਰ੍ਹਾਂ ਕਰਨ ਲਈ ਇਹ ਤਰੀਕਾ ਅਜ਼ਮਾਓ:

ਤੁਸੀਂ ਦੋਨੋਂ ਆਪੋ-ਆਪਣੇ ਕਾਗਜ਼ ’ਤੇ ਆਪਣੇ ਵਿਚਾਰ ਲਿਖੋ। ਇਕ ਪਾਸੇ ਲਿਖੋ ਕਿ ਕਿਸੇ ਮਸਲੇ ਬਾਰੇ ਤੁਹਾਡੇ ਵਿਚਾਰ ਕਿਉਂ ਸਹੀ ਹਨ। ਦੂਜੇ ਪਾਸੇ ਲਿਖੋ ਕਿ ਤੁਸੀਂ ਕਿਨ੍ਹਾਂ ਗੱਲਾਂ ਕਰ ਕੇ ਸਮਝੌਤਾ ਕਰਨ ਲਈ ਤਿਆਰ ਹੋ। ਫਿਰ ਦੋਵੇਂ ਇਨ੍ਹਾਂ ਗੱਲਾਂ ’ਤੇ ਚਰਚਾ ਕਰੋ। ਤੁਸੀਂ ਦੇਖੋਗੇ ਕਿ ਤੁਹਾਡੀ ਇਕ-ਦੂਜੇ ਨਾਲ ਰਾਇ ਕਿੰਨੀ ਮਿਲਦੀ ਹੈ! ਇਸ ਤਰ੍ਹਾਂ ਤੁਹਾਡੇ ਲਈ ਸਮਝੌਤਾ ਕਰਨਾ ਮੁਸ਼ਕਲ ਨਹੀਂ ਹੋਵੇਗਾ। ਜੇ ਤੁਹਾਡੀ ਰਾਇ ਨਹੀਂ ਵੀ ਮਿਲਦੀ, ਤਾਂ ਵੀ ਸਾਰੀਆਂ ਗੱਲਾਂ ਲਿਖ ਕੇ ਤੁਸੀਂ ਉਸ ਮਸਲੇ ਬਾਰੇ ਇਕ-ਦੂਜੇ ਦੇ ਵਿਚਾਰਾਂ ਨੂੰ ਚੰਗੀ ਤਰ੍ਹਾਂ ਜਾਣ ਸਕੋਗੇ।

ਮਸਲੇ ਦੇ ਹੱਲ ਲਈ ਇਕ-ਦੂਜੇ ਨੂੰ ਆਪਣੇ ਸੁਝਾਅ ਦਿਓ। ਕੁਝ ਮਸਲੇ ਆਸਾਨੀ ਨਾਲ ਸੁਲਝਾਏ ਜਾ ਸਕਦੇ ਹਨ। ਪਰ ਔਖੇ ਮਸਲਿਆਂ ਦਾ ਇਕੱਲਿਆਂ ਹੱਲ ਲੱਭਣਾ ਮੁਸ਼ਕਲ ਹੁੰਦਾ ਹੈ, ਇਸ ਲਈ ਜ਼ਰੂਰੀ ਹੈ ਕਿ ਪਤੀ-ਪਤਨੀ ਉਸ ਬਾਰੇ ਇਕ-ਦੂਜੇ ਨੂੰ ਸੁਝਾਅ ਦੇਣ। ਇੱਦਾਂ ਕਰਨ ਨਾਲ ਉਨ੍ਹਾਂ ਦਾ ਰਿਸ਼ਤਾ ਮਜ਼ਬੂਤ ਹੁੰਦਾ ਹੈ।ਬਾਈਬਲ ਦਾ ਅਸੂਲ: ਉਪਦੇਸ਼ਕ ਦੀ ਪੋਥੀ 4:9.

ਆਪਣਾ ਨਜ਼ਰੀਆ ਬਦਲਣ ਲਈ ਤਿਆਰ ਰਹੋ। ਬਾਈਬਲ ਦੱਸਦੀ ਹੈ: “ਤੁਸੀਂ ਸਾਰੇ ਆਪਣੀਆਂ ਪਤਨੀਆਂ ਨਾਲ ਇਸ ਤਰ੍ਹਾਂ ਪਿਆਰ ਕਰੋ ਜਿਸ ਤਰ੍ਹਾਂ ਤੁਸੀਂ ਆਪਣੇ ਨਾਲ ਪਿਆਰ ਕਰਦੇ ਹੋ; ਨਾਲੇ ਪਤਨੀ ਨੂੰ ਆਪਣੇ ਪਤੀ ਦਾ ਗਹਿਰਾ ਆਦਰ ਕਰਨਾ ਚਾਹੀਦਾ ਹੈ।” (ਅਫ਼ਸੀਆਂ 5:33) ਜਦ ਪਤੀ-ਪਤਨੀ ਇਕ-ਦੂਜੇ ਨੂੰ ਪਿਆਰ ਤੇ ਆਦਰ ਦਿੰਦੇ ਹਨ, ਤਾਂ ਦੋਵੇਂ ਇਕ-ਦੂਜੇ ਦੀ ਗੱਲ ’ਤੇ ਗੌਰ ਕਰਨ ਲਈ ਹੀ ਨਹੀਂ, ਸਗੋਂ ਆਪਣਾ ਮਨ ਬਦਲਣ ਲਈ ਵੀ ਤਿਆਰ ਹੋ ਜਾਂਦੇ ਹਨ। ਕੇਮਰਨ ਨਾਂ ਦਾ ਪਤੀ ਕਹਿੰਦਾ ਹੈ: “ਹੋ ਸਕਦਾ ਹੈ ਕਿ ਤੁਹਾਨੂੰ ਕੁਝ ਕੰਮ ਕਰਨੇ ਪਸੰਦ ਨਾ ਹੋਣ, ਪਰ ਆਪਣੇ ਜੀਵਨ ਸਾਥੀ ਦੀ ਖ਼ਾਤਰ ਤੁਸੀਂ ਉਹ ਕੰਮ ਕਰਨ ਲੱਗ ਪਓ ਅਤੇ ਬਾਅਦ ਵਿਚ ਤੁਹਾਨੂੰ ਉਹ ਕੰਮ ਚੰਗੇ ਲੱਗਣ।”ਬਾਈਬਲ ਦਾ ਅਸੂਲ: ਉਤਪਤ 2:18. ▪ (g14-E 12)

^ ਪੈਰਾ 12 ਇਹ ਗੱਲ ਵਿਆਹੁਤਾ ਜ਼ਿੰਦਗੀ ਨੂੰ ਸਫ਼ਲ ਬਣਾਉਣ ਲਈ ਸੱਤ ਅਸੂਲ (ਅੰਗ੍ਰੇਜ਼ੀ) ਨਾਂ ਦੀ ਕਿਤਾਬ ਵਿੱਚੋਂ ਲਈ ਗਈ ਹੈ।