Nuu pa gi pädi te huxkua

Ma ha rä índice

Yä testigo rä Jehová

Huahni rä idioma ñätho

 NT’UDI 9

¿Ankja da zo da poho ri miní?

¿Ankja da zo da poho ri miní?

1. ¿Ó petsite da nthähti ʼna, kjangú i mä yä ndä?

Jehová kʼa Tsi Mähkí Tá i ndo̱ poho, de gege ba ihi yä nto̱de ra zo, nihi i ne ge yä miní da mpohmu̱ (1 Timoteo 1:11). Gege bi o̱te kʼa me̱tʼo nthähti. Mu̱ ʼna kjäʼni da nthähti kjangú i mä yä ndä, da mu̱di da kja kʼa ra zo pa ge ro miní da ʼmu̱i ra zo, nihi pa da ʼni ra zo yo bähtsi. Yu̱ i te̱ni ro Kristo petsite da ʼyo̱htehu̱ yo hmända de yu̱ ndä pa da hutsihu̱ yo nthähti. Xödi Lucas 2:1, 4, 5.

Mu̱ ʼna ʼño̱ho̱ ko ʼna ʼbehña i nthähtiui, rä Tsi Mähkí Tá i to̱ʼmi ge zäi da ʼmu̱bi. Gege i ne ge nu̱ ʼño̱ho̱ ko nu̱ ʼbehña hin da hñötiui (Hebreos 13:4). Jehová i dahta tsʼo mu̱ yu̱ xi nthähti i kjaui ʼna tsuhkuä pa da ʼue̱geui (Malaquías 2:16). Pe rä Tsi Mähkí Tá hä i he̱gi ge ʼna kjäʼni da petsi ʼna tsuhkuä pa da zo da ʼue̱ge ʼne pi da zo da nthähti mu̱ ko kʼa xi nthähtiui xi ʼyöbi ko maʼna. Xödi Mateo 19:3-6, 9.

2. ¿Ankja da ʼmu̱bi ʼna ʼño̱ho̱ ko ro ʼbehña?

Jehová bi o̱te nu̱ ʼño̱ho̱ ko ʼna ʼbe̱fí i ntsöui ko ro ʼbe̱fí nu̱ ʼbehña, nsohtho mu̱ da nthähtiui da mföxiui (Génesis 2:18). Nu̱ ʼño̱ho̱ genkʼa ña de ʼna miní, genkʼa me̱tʼo petsite da mpexke pa da hioní ku̱ ntʼo̱te i thoní ha ro nguu, ʼne nihi genkʼa me̱tʼo da uhtibi ro miní yä ntʼo̱te de rä Tsi Mähkí Tá. Nihi nu̱ ʼño̱ho̱ petsite da kja yä ntʼo̱te pa da uhtibi ro ʼbehña ge i mädi, maʼke i tso ra tsi ʼu̱. Yu̱ xi nthähti petsite da nmädiui, ʼne yohmi da hñaui nguenda pa hi te da kjaui da nsentiui. Nu̱ Biblia i mä: “Pe kada ʼna de nukehu̱ gi mädihu̱ ri ʼbehña kjangú gi nmädisehu̱; nihi nu̱ ’behña da ndo̱ ʼyo̱htebi ro ʼño̱ho̱” (Efesios 5:33). Pe nge yohmi hi i kjaui ra ndo̱ zo goʼtho yä ntʼo̱te, petsite da däbeni kʼa hi i kjaui ra zo, pa da zo da mpohmi. Nu̱ Biblia i uni gehna ntʼsofo: “Ma ra zo gi nkjahu̱ yä chala kjäʼni, nihi gi nmädihu̱ ʼraa ko maʼra, nihi ʼraa ko maʼra gi nde däbenihu̱ ri tsʼohkihu̱” (Efesios 4:32). Xödi Efesios 5:22-25 ʼne 1 Pedro 3:7.

 3. ¿Kja ra zo da guadi ʼna nthähti hi i poho?

Mu̱ yu̱ xi nthähti i thogi yä ntʼo̱te ra nthi, yohmi petsite da mpexke pa da nmädiui (1 Corintios 13:4, 5). I ʼbu̱i yä dumu̱i ha nu̱ nthähti, nsohtho yu̱ xi nthähti, mu̱ da petsiui yä dumu̱i, hi ra zo da ʼue̱geui pa da thege yo dumu̱i, genkʼa i mä ro Hñä rä Tsi Mähkí Tá. Xödi 1 Corintios 7:10-13.

4. ¿Té i ne rä Tsi Mähkí Tá pa yu̱ bähtsi?

Jehová i ne ge yä bähtsi da mpohmu̱. Nsohtho gege i uhtiku̱ ankja da zo da mu̱fu̱ ma ra zo mu̱ yo bähtsithohu̱. ʼNe i ne ge yu̱ bähtsi da bädihu̱ yä ntʼo̱te i uhtibi yo tá, pe nihi de ku̱ ʼmu̱i xi thogiku̱ (Colosenses 3:20). Nihi rä Tsi Mähkí Tá i ne ge yu̱ bähtsi da pe̱hmu̱ pa gege ʼne pa ro Tʼu̱ nge nkjanu̱ da mpohmu̱. Nu̱ Biblia i uni gehna ntʼsofo: “Nuyá gi beni kʼa tó bi o̱teki ra ndo̱ zo, ha yu̱ mpa gro bähtsitho, ante da zo̱ho̱ ku̱ mpa ra nthi” (Eclesiastés 12:1). Xödi Mateo 19:13-15 ʼne 21:15, 16.

5. ¿Té da zo da pe̱hmu̱ yu̱ tá pa da mpohmu̱ yo bähtsi?

Yu̱ tá petsite da ndo̱ mpexke pa da uni té da zihu̱, ʼna nguu pa da mu̱fu̱, ʼne té da ngo̱dehu̱ (1 Timoteo 5:8). Pe hin gi ho̱nseku̱. Nihi petsite da uhtibihu̱ ankja da zo da mädihu̱ ʼne ankja da te̱nihu̱ ro nkʼoi rä Tsi Mähkí Tá (Efesios 6:4). Mu̱ yu̱ tá i ndo̱ mädihu̱ rä Tsi Mähkí Tá i ndo̱ fötsihu̱ yo bähtsihu̱ nge i nkjahu̱ ʼna chala nkʼoi pa gegehu̱. Mu̱ yu̱ tá i nzohmu̱ yo bähtsi ko ro Hñä rä Tsi Mähkí Tá, da zo da fötsihu̱ pa da mbödi yo mfeni pa kʼa ra zo. Xödi Deuteronomio 6:4-7 ʼne Proverbios 22:6.

Yu̱ bähtsi i hioníhu̱ ge da nthsifí ko yä chala hñä ge kʼa i pe̱hmu̱ ra zo, nihi i hioníhu̱ ge da tʼuni tse̱dí ko yä hñä. Pe i ʼbu̱i yä mpa abu̱ nihi ra zo ge yu̱ tá da zu̱yhu̱ yo bähtsi mu̱ hi xi pe̱hmu̱ ra zo ʼna ntʼo̱te, pa nkjanu̱ yä bähtsi hin da kjahu̱ yä ntʼo̱te ra ntsʼo da kjahpihu̱ da ntsʼoni yo nzahkihu̱ (Proverbios 22:15). Pe yu̱ tá, mu̱ da nzohmu̱ yo bähtsihu̱, hin da kjahu̱ ko ndunthi kue̱ nindi da u̱nihu̱. Nu̱ Biblia i mä: “Nukehu̱ Tá, hin gi nde gi kjahu̱ da nkue̱hu̱ ri bähtsihu̱, pa hin da nsentihu̱” (Colosenses 3:21).

Yä testigo rä Jehová xi hutsihu̱ ndunthi yä he̱ʼmi pa yu̱ tá ʼne pa yu̱ bähtsi. Goʼtho yu̱ i mä gehya he̱ʼmi xi nkju̱hki ha nu̱ Biblia. Xödi Salmo 19:7, 11.