Ndunthi yä jäˈi mbeni ge rä ponza, geˈä nˈa rä simbolo de yä relijion yä kristianu. Mäske yä testigo rä Jeoba drä kristianuhe, hindi usahe rä ponza nixi hindi ndänehe, ¿por hanja hinä?

Rä Mäkä Tˈofo hingi udi ge rä Hesu bi du ha nˈa rä ponza, udi ge bi du ha nˈa rä zaa näˈä xmä njuänitho. ˈNehe, ha rä Mäkä Tˈofo ehe nunä mhända pa yä kristianu: «Ogri nsundahu̱ yä kˈoi. ˈUegehu̱ de nuˈä rä nzäiˈä». Nunä mhända ne dä mää ge hingi debe gä usahe rä ponza, pa gä xo̱kämbenihe Äjuä (1 Corintios 10:14; 1 Juan 5:21).

Rä Hesu bi mää hanja ma xä nheki nuˈu̱ xä mäjuäni yä kristianu nuˈmu̱ bi ˈñenä: «Mu̱ gi mädihu̱ nˈa ngu mänˈaa, nuˈmu̱ njabu̱ dä bädi gatˈho yä jäˈi ge mäjuäni mä nxadiˈihu̱» (Juan 13:34, 35). Hänge di nheki toˈo xä mäjuäni yä kristianu po näˈä rä mhäte udi po märˈaa, hingä po di usa rä ponza o märˈa yä imagen.