Noe

Abraan ˈne Sara

Moises

Ñhesukristo

Ndunthi yä jäˈi huyämu̱i ge yä testigo rä Jeoba nˈa rˈayˈo relijion näˈä ja xä mu̱di. Pe ya thogi 2,700 yä je̱ya dende nuˈmu̱ bi tˈembi yä «testigo» nuˈu̱ yä ˈme̱go näˈä Zi Dada xa mäjuäni (Isaías 43:10-12). Änte de näˈä rä je̱ya 1931, mi tˈengägihe Estudiantes de la Biblia. Nuˈmu̱, ¿por hanja dä huahnihe bi tˈengägihe yä testigo rä Jeoba?

Nunä thuhu testigo rä Jeoba, udi toˈo mä Zi Dadahe. Rˈa yä he̱ˈmi nuˈu̱ bi tˈofo dende mäyaˈmu̱ udi ge rä thuhu Äjuä, Jeoba, hutsˈi ngu 7,000 yä mˈiki ha rä Mäkä Tˈofo. Ha ndunthi yä Mäkä Tˈofo xä thäkuäbi rä thuhu Jeoba ˈne ho̱nse̱ xä tˈofo Äjuä o Zi Dada. Pe näˈä Zi Dada xa mäjuäni bi xipäbise̱ Moises ge näˈä pe̱ˈtsi nˈa rä thuhu: Jeoba. Bi ˈñembäbi: «Nunä gehnä mä thuhu pa nzäntho» (Éxodo 3:15). Njabu̱, Jeoba udi ge näˈä nˈañˈo de gatˈho nuˈu̱ yä zidada hingä mäjuäni. Pa nuje nˈa däta nsu gä hñämpäbihe rä thuhu rä Zi Dada Jeoba.

Nunä thuhu testigo rä Jeoba, udi te di pe̱fihe. Xä mˈu̱i ndunthi yä jäˈi nuˈu̱ xä ungä ntˈo̱de de rä Zi Dada Jeoba. Bi mu̱di ko Abel, ˈne mˈe̱fa ngu bi thogi yä je̱ya, märˈa yä ˈme̱go Äjuä ngu Noe, Abraan, Sara, Moises, Dabid, bi yu̱tˈi ˈnehe ha näˈä däta mhuntsˈi de gä testigo (Hebreos 11:4–12:1). Nuje xtä huahnihe gä mäñhe näˈä mäjuäni de rä Zi Dada Jeoba ja ngu di ja nˈa testigo näˈä pa ha nˈa tsˈu̱tˈhui pa dä mää näˈä mäjuäni ˈne njabu̱ dä ñäni nˈa jäˈi näˈä hinte mä thai tu.

Nuˈmu̱ di hñämpäbihe rä thuhu Jeoba, di te̱mbäbihe rä kˈoi rä Hesu. Rä Mäkä Tˈofo mää ge rä Hesu geˈä testigo näˈä yˈo mänjuäntho ha rä ˈñuu Äjuä ˈne nzäntho «mängä nuˈä mäjuäni» (Apocalipsis [Revelación] 3:14). Rä Hesu bi mää ge näˈä bä ehe pa bi ˈñuti yä jäˈi näˈä rä thuhu rä Dada. ˈNehe pa bi «xipä yä jäˈi näˈä mäjuäni» de rä Zi Dada Jeoba (Juan 17:26; 18:37). Nuˈu̱ xa mäjuäni yä de̱ni rä Hesu pe̱ˈtsi te dä hñä ˈne dä ungä ntˈo̱de rä thuhu Jeoba. Hänge yä testigo rä Jeoba o̱tˈe ntsˈe̱di po dä me̱fi njabu̱.

  • ¿Por hanja nuˈu̱ yä Estudiantes de la Biblia bi huahni dä tˈembäbi testigo rä Jeoba?

  • ¿Dende hämˈu̱ xä me̱ˈtsi Jeoba yä testigo nuua ha rä Xiˈmhai?

  • De gatˈho nuˈu̱ yä testigo xä me̱ˈtsi Jeoba, ¿toˈo näˈä mänˈa xa rä däta de gatˈho?