Habu̱ ma gi tini te hutsʼi

Habu̱ ma dä xiʼi te hutsʼi

Yä testigo rä Jeoba

Huahni nʼa idioma Ñañu

 RÄ NTHEKE 1

¿Toˈo nuje yä testigo rä Jeoba?

¿Toˈo nuje yä testigo rä Jeoba?

Dinamarca

Taiwán

Venezuela

India

¿Hängu yä testigo rä Jeoba gi pädi? Zäi ge rˈa de gekhe di ˈmu̱he getbu̱ de ha gi ˈmu̱i, di mpe̱fihe mähye̱gi ko nuˈi, di pahu̱ nˈatˈä skuela o zäi ge xtä ñähe nˈa rä pa kongeˈi de rä Mäkä Tˈofo. ¿Toˈo xa mäjuäni nuje ˈne por hanja di ñähe ko yä jäˈi de näˈä xtä pädihe ha rä Mäkä Tˈofo?

Nuje di ˈmu̱ihe ja ngu gatˈho yä jäˈi. Nuje xti ˈñehe de ndunthi yä luga ˈne nˈañˈo näˈä mä mˈu̱i xtä pe̱ˈtsihe. Rˈa de nuje ndi pe̱ˈtsihe märˈa yä relijion, märˈa de gekhe hingä ndi kamfrihe Äjuä. Pe änte gä ntestigohe, gatˈho dä ˈuekehe de mä tiempohe pa dä nxadihe xä ñho rä Mäkä Tˈofo (Hechos 17:11). Nuje dä huahnihe gä ˈmu̱ihe ja ngu di mända Äjuä ˈnehe dä huahnise̱he gä xo̱kämbenihe rä Zi Dada Jeoba.

Nuje di hänihe yä ñho de gä nxadihe rä Mäkä Tˈofo. Ja ngu gatˈho yä jäˈi, nuje ˈnehe di pe̱ˈtsihe yä xuñha ˈne rä tsˈoki. Pe nuje xtä handihe hanja mä mˈu̱ihe mänˈa xä hogi ngeˈä di o̱tˈehe ntsˈe̱di po gä pe̱fihe ha gatˈho mä mˈu̱ihe nuˈu̱ yä tsˈofo uni rä Mäkä Tˈofo (Salmo 128:1, 2). Hänge po rängeˈä di xipäbihe märˈa yä jäˈi de nuˈu̱ yä hogä tˈo̱tˈe xtä pädihe ha rä Mäkä Tˈofo.

Nuje di ˈmu̱ihe ja ngu di mända Äjuä. Nuˈu̱ yä tsˈofo xtä pädihe ha rä Mäkä Tˈofo faxkägihe pa gä pe̱ˈtsihe nˈa rä hogä mˈu̱i. ˈNehe xtä pädihe ge mähyoni gä ñhojäˈihe, gä udihe rä tˈekˈei, ˈne ge hingä hatˈihe yä jäˈi. Nuˈu̱ yä tsˈofo uni rä Mäkä Tˈofo faxkägihe gä pe̱ˈtsihe nˈa hogä nzaki, nˈa hogä familia, ˈne nˈa mˈu̱i xä ntˈaxi ha yä da Äjuä. ˈNehe utkägihe ge mähyoni gä fatsˈihe nuˈu̱ yä jäˈi habu̱ di ˈmu̱ihe. Di pädihe xä ñho ge «Äjuä hingi huahni yä jäˈi rˈa ko märˈaa». Hänge po rängeˈä, nuje di ntsitsˈihe xä ñho ngu nˈadä rä familia ko nuˈu̱ mä kuhe de gatˈho rä Xiˈmhai, ˈne hinte mä rasa nixi hinte mä hnini di hegägihe. Yä testigo rä Jeoba ˈmu̱i ha nˈa hnini näˈä nˈañˈo de gatˈho, pe mäske njabu̱ nuje di pädihe ge hingä mänˈa di pe̱ˈtsihe rä nsu ke märˈa yä jäˈi (Hechos 4:13; 10:34, 35).

  • ¿Te mä mˈu̱i pe̱ˈtsi yä testigo rä Jeoba ja ngu gatˈho yä jäˈi?

  • ¿Te mä hogä tsˈofo xä bädi yä testigo rä Jeoba de rä Mäkä Tˈofo?