Habu̱ ma gi tini te hutsʼi

Habu̱ ma dä xiʼi te hutsʼi

 RÄ NTHEKE 39

Rä mu̱di rey ha Israel

Rä mu̱di rey ha Israel

Jeoba xki hñutsˈi yä nzaya pa dä gu̱hni rä hnini Israel, pe mäske njabu̱, nuˈu̱ mi ne dä me̱ˈtsi nˈa rä rey. Hänge nuˈu̱ bi ˈñembäbi rä profeta Samuel: «Gatˈho nuˈu̱ märˈa yä dähni pe̱ˈtsi nˈa rä rey, po rängeˈä nuje ˈnehe di nehe nˈa rä rey». Pe Samuel xa himbi ho näˈä mi adiˈu̱ ˈne nguntˈä bi xatuäbi rä Zi Dada Jeoba. ¿Gi pädi te bi dädi Jeoba? Näˈä bi ˈñembäbi Samuel: «Rä hnini hingo xä rechazaˈi, go di rechazagi. ˈÑembäbiˈu̱ ge dä za dä me̱ˈtsi nˈa rä rey, pe näˈä rey ma dä yˈapäbi ndunthi yä tˈo̱tˈe». Mäske njabu̱, yä israelita bi dädi: «¡Hindi mporta! ¡Nuje di nehe gä pe̱ˈtsihe nˈa rey!».

Nubye̱, Jeoba bi mändabi Samuel dä ma ha Ramá ˈne dä huahni nˈa rä rey. ¿Gi pädi te mi rä thuhu näˈä rä mu̱di rey? Hää, mi rä thuhu Saúl. Rä profeta Samuel bi xiˈspäbi rä aseite ha rä ñäxu Saúl ˈne njabu̱ bi fädi ge Jeoba go xki hñutsˈi de gä rey.

Mˈe̱fa, Samuel bi muntsˈi gatˈho yä israelita pa dä ˈñutiˈu̱ toˈo xki huahni Jeoba de gä rey. Pe mi da ngue̱nda Samuel, Saúl himi joˈoni. ¿Gi pädi por hanja? Ngeˈä näˈä xki ñˈägi. Nuˈmu̱ bi thini, bi ju̱ki de habu̱ xki ñˈägi ˈne bi tsˈitsˈi ante rä thandi gatˈho rä hnini. ¿Gi pädi? Saúl mänˈa mi xä ñhetsˈi de gatˈho ˈne xa mi mähotho. Nubye̱ Samuel bi ˈñembäbi rä hnini: «Hyanthu̱ toˈo xä huahni Jeoba». Yä israelita nguntˈä bi mafi: «¡Dä mˈu̱i pa nzäntho rä rey!».

Nuˈmu̱ ja xki thutsˈi de gä rey, Saúl mi o̱te rä profeta Samuel ˈne mi pe̱fi gatˈho näˈä mi mändabi rä Zi Dada Jeoba. Pe mˈe̱fa ya hinä. Nˈa rä pa, Samuel bi ˈñembäbi Saúl ge xä do̱ˈmi asta xä zo̱niˈä pa go xä uni yä sacrificio. Rä rey himi pe̱ˈtsi rä se̱ki pa go dä uni yä sacrificio. Pe ya mi bi ndee ˈne rä profeta Samuel tobe himi tso̱nitho, hänge Saúl go bi uni yä sacrificio. ¿Gi pädi te bi xipäbi Samuel? Näˈä bi ˈñembäbi: «Nuˈi ngi pädi ge pe̱ˈtsi te gi yˈo̱te Jeoba, pe hingä pe̱fi njabu̱». ¿Gi kamfri ge Saúl nubye̱ hää ma xä yˈo̱te Jeoba?

Mˈe̱fa, Saúl bi ma bä ntunkui yä amalequita, ˈne Samuel bi mändabi ge xä hyo gatˈho. Pe, Saúl himbi hyo rä rey Agag. Nubye̱, Jeoba bi  ˈñembäbi Samuel: «Saúl xä ˈuege de geki, näˈä ya hingi o̱tkägi». Samuel xa bi durämu̱i ˈne bi ˈñembäbi Saúl: «Jeoba ma dä huahni mä nˈa rä rey, ngeˈä nuˈi ya hingi o̱te». Oraˈä, Samuel bi gu̱ rä ˈñuu pa dä mengi ha rä nguu, pe Saúl himi ne dä hye̱gi dä ma, hänge bi pe̱ntˈi de rä mahe ˈne bi tu̱mbäbi. Nubye̱, Samuel bi ˈñembäbi Saúl: «Geˈä ma dä me̱fi Jeoba kongeˈi». Hää, Jeoba ya himi numäñho Saúl. Jeoba ma xä huahni nˈa rä jäˈi näˈä hää di pe̱ˈspäbi rä tˈekˈei ˈne rä hogä yˈo̱de, pa go xä hñutsˈi de gä rey ha Israel.

«Mänˈa xä ñho gä o̱dehu̱ ke nˈa rä sacrificio» (1 Samuel 15:22).