Habu̱ ma gi tini te hutsʼi

Habu̱ ma dä xiʼi te hutsʼi

 RÄ NTHEKE 79

Rä Hesu o̱the ndunthi yä jäˈi

Rä Hesu o̱the ndunthi yä jäˈi

Rä Hesu bä ehe ha rä Xiˈmhai pa dä ungä ntˈo̱de yä hogä noya de rä Tsˈu̱tˈhui Äjuä. ˈNehe, rä Zi Dada Jeoba bi umbäbi rä mäkä tsˈe̱di pa dä yˈo̱tˈe yä milagro, ˈne njabu̱ bi ˈñudi te gatˈho ma dä me̱fi xti zo̱ho̱ dä Nrey. Rä Hesu mi tsa dä hñäki gatˈho yä hñeni. Hänge habu̱räza mi pa, nuˈu̱ yä zi jäˈi mi hñeni mi pa mi nuu pa dä yˈo̱the. Hää, rä Hesu bi yˈo̱the yä zi goda, yä zi gogu ˈne asta nuˈu̱ yä zi jäˈi himi tsa dä ñˈo. Rˈa yä jäˈi mi hogi de yä hñeni ko ho̱nse̱ mi thambäbi rä ñäni rä hee rä Hesu. Pe hingä ho̱nse̱ˈä, rä Hesu ˈnehe mi e̱ni yä u̱xjua de rä ndoyˈo yä jäˈi. ¿Gi pädi? Rä Hesu nzäntho bi hyombäbi yä ñho yä jäˈi, mäske rˈabu̱ xa xki zabi.

Nˈa rä mˈiki, rä Hesu bä tsˈimpäbi nˈa rä zi jäˈi näˈä himi tsa dä ñˈo. Pe ko rä ndunthi nuˈu̱ yä jäˈi xki muntsˈi, himi tsa dä tˈetˈi asta mbo de rä nguu habu̱ mi hudi rä Hesu. ¿Gi pädi te bi me̱fi yä jäˈi? Bi xoˈspäbi rä njoˈmi näˈä rä nguu pa njabu̱ bi za bi tˈetˈi näˈä zi jäˈi himi tsa dä ñˈo. Rä Hesu bi ˈñembäbi: «Nangi ˈne fu̱di gi yˈo». ¿Gi pädi te bi thogi? Näˈä bi mu̱di bi ñˈo, ˈne nuˈu̱ yä jäˈi mi ˈmahni himi tsa dä gamfri näˈä mi handi.

Mä nˈa rä pa, rä Hesu ya ma xä zo̱ni ha nˈa rä hnini, ˈne 10 yä ñˈo̱ho̱ mi tsu̱ rä lepra bi maˈti dende yabu̱ ˈne bi ˈñembäbi: «¡Hesu, faxkägihe!». Rä Ley mi proibi ge yä leproso dä joni ko nuˈu̱ yä jäˈi himi hñeni. ˈNehe mi mää ge yä leproso mi tsa dä ma ha templo, asta xti hogi de yä hñeni. Hänge rä Hesu bi ˈñembäbiˈu̱ dä ma ha rä templo. Mientra mi yˈo ˈñuu, nuˈu̱ yä  leproso bi hogi de yä hñeni. Pe ho̱nse̱ nˈa de geˈu̱ bi mengi pa bi umbäbi njamädi rä Hesu ˈne bi nsunda Äjuä.

Mä nˈa rä mˈiki, nˈa rä ˈme̱hñä näˈä mi pe̱ˈtsi 12 yä je̱ya mi hñeni, bi yu̱tˈi entre yä jäˈi ˈne bi dambäbi rä ñäni rä hee rä Hesu. ¿Gi pädi te bi thogi oraˈä? ¡Nguntˈä bi hogi de rä hñeni! Nubye̱ rä Hesu bi ñˈani: «¿Toˈo bi dani rä ñäni mä hee?». Näˈä rä zi ˈme̱hñä xa bi ntsu, pe mäske njabu̱ bi joni ko rä Hesu ˈne bi metuäbi gatˈho näˈä mi thogi. Rä Hesu bi hoˈti ˈne bi ˈñembäbi: «Zi iha, ri jamfri bi jaˈi gä hogi. Gi ma temäˈentho».

Nˈa rä gobernante mi rä thuhu Jairo, bi ˈñembäbi rä Hesu: «Guä ehe ha mä nguu. Mä zi nxutsi xa di hñeni». Rä Hesu bi me̱ui Jairo ha rä nguu, pe mi zo̱ni, rä zi nxutsi ya xki du. Rä Hesu bi hyandi ge nuˈu̱ yä jäˈi xa mi zoni. Hänge bi ˈñembäbiˈu̱: «Ogi zonihu̱. Näˈä zi nxutsi hinxä du, ho̱nse̱ ähätho». Oraˈä, rä Hesu bi mipäbi rä yˈe̱ näˈä zi nxutsi ˈne bi ˈñembi: «Zi nxutsi, ¡nangi!». Oraˈä, näˈä zi nxutsi nguntˈä bi nangi. ˈNepu̱ rä Hesu bi ˈñembäbi nuˈu̱ yä dada ge dä ˈuini. ¿Dä za gi imäjinä hängu rä johya bi senti Jairo ˈne rä ˈme̱hñä?

«Äjuä bi umbä rä mäkä ndähi rä Hesu [...] pa bi yˈo̱tˈä rä ñho, ˈne bi yˈo̱the gatˈho nuˈu̱ mi hñeni ˈne mi pe̱ˈtsä yä tsˈondähi» (Hechos 10:38).