Habu̱ ma gi tini te hutsʼi

Habu̱ ma dä xiʼi te hutsʼi

 RÄ NTHEKE 19

¿Toˈo näˈä tˈembi rä hogä ˈme̱go rä yˈo̱de ˈne xa ja rä mfeni?

¿Toˈo näˈä tˈembi rä hogä ˈme̱go rä yˈo̱de ˈne xa ja rä mfeni?

Gatˈho di hänihu̱ yä ñho de näˈä ñhuni de rä Noya Äjuä

Rˈa yä pa änte de xä du rä Hesu, bi ñäui nˈambu̱se̱ goho de nuˈu̱ yä apostol: Pedro, Santiago, Juan ˈne Andres. Nuˈmu̱ rä Hesu bi mää näˈä rä señä ma xä ˈñudi hämˈu̱ ma xä mˈu̱kua ha yä gäxä pa, bi ja nunä ntˈani: «¿Toˈo näˈä hogä ˈme̱go rä yˈo̱de ˈne xa ja rä mfeni näˈä xä huahni rä hmuu pa dä supäbi nuˈu̱ märˈa yä ˈme̱go ˈne dä umbäbi rä ñhuni näˈä ora mähyoni?» (Mateo 24:3, 45, NM; Marcos 13:3, 4). Ko nuya yä noya, rä Hesu ngu nˈa hmuu, bi ˈñenä ge ha nuya yä gäxä pa, ma xä hñutsˈi nˈa muntsˈi yä jäˈi pa njatˈä xä umbäbi näˈä ñhuni de rä Noya Äjuä nuˈu̱ yä de̱ni rä Hesu. ¿Toˈo nuˈu̱ yä jäˈi ma xä zo̱ho̱ xä yu̱tˈi ha näˈä mhuntsˈi tˈembi rä hogä ˈme̱go?

Geˈu̱ rˈa de nuˈu̱ xa mäjuäni yä de̱ni rä Hesu xä huahni Äjuä ko rä mäkä tsˈe̱di. Näˈä «hogä ˈme̱go» umbäbi rä ñhuni de rä Noya Äjuä nuˈu̱ märˈa yä ku di xo̱kämbeni Jeoba. Nunä ñhuni uni ha näˈä ora mähyoni. Nuju̱ di honihu̱ de nunä hogä ˈme̱go pa dä rˈakägihu̱ nˈa «tˈe̱ni rä ñhuni ha näˈä ora mähyoni» (Lucas 12:42NM).

Supäbi rä ngu Äjuä (1 Timoteo 3:15NM). Rä Hesu bi zokuäbi nuni rä hogä ˈme̱go nˈa däta ˈme̱fi: dä supäbi näˈä rä hnini Jeoba ˈmu̱kua ha rä Xiˈmhai. Di gu̱tˈi rä ˈñuu pa ungä ntˈo̱de rä Noya Äjuä, utkägihu̱ po mäde de yä mhuntsˈi, ˈne di su gatˈho nuˈu̱ yä tˈo̱tˈe pe̱ˈtsi rä hnini Äjuä. Hänge pa dä rˈakägihu̱ näˈä jakägihu̱ mˈe̱di ˈne nuˈmu̱ mähyoni, näˈä «hogä ˈme̱go rä yˈo̱de ˈne xa ja rä mfeni» uni rä ñhuni de rä Noya Äjuä po mäde de nuˈu̱ yä he̱ˈmi ˈne yä mfistˈofo di hñähu̱ nuˈmu̱ di ungä ntˈo̱dehu̱ ˈne po mäde de nuˈu̱ yä thoˈtsi tˈuni ha yä mhuntsˈi ˈne ha yä däta mhuntsˈi.

Näˈä «hogä ˈme̱go» rä yˈo̱de ko näˈä udi rä Mäkä Tˈofo ˈne di kumpli ko näˈä rä ˈme̱fi de di ungä ntˈo̱de nuˈu̱ yä rˈayˈo hogä noya. Näˈä «hogä ˈme̱go» xa ja rä mfeni ngeˈä ko rä mfädi su xä ñho gatˈho näˈä pe̱ˈtsi rä Hesu nuua ha rä Xiˈmhai (Hechos 10:42). Rä Zi Dada Jeoba di jäpi ndunthi nunä ˈme̱fi hänge yˈo ri ndunthi nuˈu̱ yä testigo rä Jeoba ˈne näˈä ñhuni de rä Noya Äjuä (Isaías 60:22; 65:13).

  • ¿Toˈo bi huahni rä Hesu pa dä umbäbi näˈä ñhuni de rä Noya Äjuä nuˈu̱ yä de̱ni?

  • ¿Por hanja näˈä «hogä ˈme̱go» tˈembi rä yˈo̱de ˈne xa ja rä mfeni?