Habu̱ ma gi tini te hutsʼi

Habu̱ ma dä xiʼi te hutsʼi

 RÄ NTHEKE 7

¿Te dä za gi pe̱fi mu̱ gi tsu ʼne gi tsa ge gi ʼmu̱se̱?

¿Te dä za gi pe̱fi mu̱ gi tsu ʼne gi tsa ge gi ʼmu̱se̱?

¿Gi handi nuni zi tʼu̱kä bätsi huxkua ha rä kʼoi? Nuni zi bätsi di nheki ge ʼmu̱se̱ ʼne ja te xä pidi, ¿hänge hää? ¿Xkä thogi njabu̱ nʼa rä pa?... Gatʼho xtä thogihu̱ njabu̱. Ha rä Mäkä Tʼofo mää ge rʼa yä amigo rä Zi Dada Jeoba, bi zo̱ho̱ bi ntsu ʼne bi za ge mi ʼmu̱se̱. Nʼa de geʼu̱ mi rä thuhu Elias. Ma gä handihu̱ te bi thogi.

Jesabel mi ne dä hyo Elias

O̱tʼe xi ndunthi yä je̱ya, Elias mi ʼmu̱i ha rä hnini Israel, änte de dä mʼu̱i rä Hesu. Ha nuʼu̱ yä paʼu̱, näʼä rey mi rä thuhu Akab, ʼne rä ʼme̱hñä mi rä thuhu Jesabel. Akab ʼne Jesabel hingä mi xo̱kämbeni Jeoba, näʼä rä Zi Dada xa mäjuäni. Nuyu̱ mi xo̱kämbeni näʼä hyate zidada mi rä thuhu Baal. Ndunthi de nuʼu̱ yä israelita, bi mu̱di ʼnehe bi xo̱kämbeni Baal. Näʼä reinä Jesabel xa mi nda tsʼomʼu̱i ʼne mi ne dä hyo gatʼho nuʼu̱ yä jäʼi mi xo̱kämbeni Jeoba. Hää, ¡mi ne dä hyo ʼnehe Elias! ¿Gi pädi te bi me̱fi Elias?...

 ¡Elias bi ʼmatʼi bi ma yabu̱! Bi ma ha rʼa yä yʼotʼä hai ʼne bä ñʼägi ha nʼa rä kueba. ¿Gi pädi por hanja bi ʼmatʼi bi ma Elias?... Ngetʼho xa bi ntsu. Pe Elias hingä mi pe̱ʼtsi por hanja xä ntsu, ¿gi pädi por hanja? Elias mi pädi ge mi pe̱ʼtsi rä mfatsʼi rä Zi Dada Jeoba. Jeoba ya xki ʼñuti Elias hängu rä tsʼe̱di pe̱ʼtsi. Nʼa rä pa, Jeoba bi dädi näʼä rä sadi Elias, ʼne bä japi bä käi rä tsibi de mähetsʼi. ¡Jeoba ya xki ʼñuti Elias hängu rä tsʼe̱di mi pe̱ʼtsi pa dä matsʼi!

¿Hanja bi matsʼi Jeoba Elias?

Mientra Elias xki ñʼägi ha näʼä kueba, Jeoba bi nzofo ʼne bi yʼambäbi: “¿Xi te gi hongua?”. Elias bi dädi: “Mä mʼe̱tʼo mi ʼmu̱i märʼa yä jäʼi nuʼu̱ mi xo̱kämbeniʼi, pe nubye̱, ho̱nse̱ nuga di kohi, ʼne xa di tsu dä thogägi”. Elias mi hurämu̱i ge ya xki tho gatʼho nuʼu̱ yä jäʼi mi pe̱päbi rä Zi Dada Jeoba. Pe Jeoba bi ʼñembäbi: “¡Hingä ho̱nse̱ʼi gi kohi! ʼMu̱i mä 7.000 yä jäʼi nuʼu̱ di xo̱kämbenigi. Ogi tsu, ¡di pe̱ʼtsi mä nʼa rä ʼme̱fi pa geʼi!”. ¿Te bi za Elias mi yʼo̱de njabu̱?... ¡Zäi ge xa bi umbi ndunthi rä johya!

¿Te dä za gi pädi de näʼä bi thogi Elias?... Mäske rʼabu̱ ma gi ntsu ʼne ma gi tsa ge gi ʼmu̱se̱, nuʼi gi pe̱ʼtsi ndunthi ri amigo nuʼu̱ di mäʼi ʼne di mädi rä Zi Dada Jeoba. Oxki pumfri, ¡rä Zi Dada Jeoba pe̱ʼtsi ndunthi rä tsʼe̱di ʼne nzäntho ma dä maxʼäʼi! ¿Di rʼaʼi rä johya gi pädi ge nunka ma gi ʼmu̱se̱?...

HÑETI HA RÄ MÄKÄ TʼOFO: