Habu̱ ma gi tini te hutsʼi

Habu̱ ma dä xiʼi te hutsʼi

 RÄ ꞌMEDE 95

Hanja mi udi rä Hesu

Hanja mi udi rä Hesu

NꞌA RÄ pa, rä Hesu bi ꞌñembäbi nꞌa ñꞌo̱ho̱ ge pe̱ꞌtsi te dä mädi rä mikꞌei. Näꞌä ñꞌo̱ho̱ bi ñꞌani: “¿Toꞌo mä mikꞌei?”. Nde, rä Hesu mi pädi te mi mbeni näꞌä ñꞌo̱ho̱. Näꞌä ñꞌo̱ho̱ mi mbeni ge ho̱nse̱ nuꞌu̱ mi yä judioui ꞌne nuꞌu̱ mi mähye̱giui yä jamfri geꞌu̱ mi yä mikꞌei. Pe ma gä handihu̱ te bi mää rä Hesu.

Rꞌabu̱ rä Hesu mi mää yä ꞌmede ꞌne yä kꞌoi pa mi uti yä jäꞌi. Nubye̱ geꞌä bi me̱fi, bi mu̱di bi mede de nꞌa judio ꞌne nꞌa samäritano. Ya dä pädihu̱ ge yä judio hingä mi ntsitsꞌi ko yä samäritano. Gehnä rä ꞌmede bi mää rä Hesu:

Nꞌa rä pa, nꞌa judio mbä gäi de Jerusalen pa Jeriko. Pe ha rä ꞌñuu bi nthe̱ui rꞌa yä be nuꞌu̱ bi daki, bi hñämbäbi rä bojä, bi naꞌmi, bi yu̱ntꞌi ꞌne ya ma xä hyo.

Mꞌe̱fa, nꞌa majhä mrä judio bi thogi ha näꞌä ꞌñu, ꞌne bi hyandi näꞌä ñꞌo̱ho̱ xki me̱ yä ñu̱ntꞌi. ¿Gi pädi te bi me̱fi näꞌä majhä? Bi ꞌuengi ꞌne bi thogi bi ma. Nubye̱ bi thogi nꞌa lebita näꞌä xa mi eꞌspäbi rä nsu Äjuä. ¿Bi hueki näꞌä zi ñꞌo̱ho̱? Hinä, nixi geꞌä himbi mꞌai pa bi matsꞌi näꞌä ñꞌo̱ho̱. ¿Gi handi hanja nuni majhä ꞌne nuni lebita bi sigi yä ꞌñuu bi ma?

Pe hyandi, ¿gi pädi toꞌo nuni jäꞌi fatsꞌi nuni ñꞌo̱ho̱? Nuni nꞌa samäritano ꞌne fatsꞌi nuni judio. Bi goꞌspäbi zi ꞌñethi habu̱ xki ntse̱ni. Mꞌe̱fa, bi zitsꞌi ha nꞌa luga habu̱ bi za bi ntsaya pa bi hogi.

Mi uadi rä Hesu bi mää näꞌä rä ꞌmede bi yꞌambäbi näꞌä ñꞌo̱ho̱ mi ñäui: “Xibye̱, de nuꞌu̱ hñuu yä ñꞌo̱ho̱ dä mäñhu̱, ¿toꞌo bi ꞌñudi ge mi rä mikꞌei näꞌä zi ñꞌo̱ho̱ xki thaki? ¿Näꞌä majhä, näꞌä lebita o näꞌä samäritano?”.

Näꞌä ñꞌo̱ho̱ bi dädi: “Näꞌä samäritano. Geꞌä bi hueki näꞌä zi ñꞌo̱ho̱ xki thaki”.

Rä Hesu bi ꞌñenä: “Hää, geꞌä gä thädi. Ri ma ꞌne pe̱fi ko märꞌa yä jäꞌi ngu bi me̱fi näꞌä samäritano”.

¿Hänge mähotho hanja mi udi rä Hesu? Nuju̱ dä za gä pädihu̱ ndunthi de nuꞌu̱ yä hogä tꞌo̱tꞌe bi mää rä Hesu ha rä Mäkä Tꞌofo, ¿hänge hää?