Habu̱ ma gi tini te hutsʼi

Habu̱ ma dä xiʼi te hutsʼi

 RÄ ˈMEDE 88

Rä Hesu bi nku̱ˈmdehe

Rä Hesu bi nku̱ˈmdehe

HYANDI nuni palomä yˈo ri gäi ha rä ñäxu nuni ñˈo̱ho̱. Gehni rä Hesu, nubye̱ ya pe̱ˈtsi ngu 30 yä je̱ya. ˈNe nuni mänˈa ñˈo̱ho̱ gi handi, rä thuhu Juan. Ya dä pädihu̱ nˈa tu̱i de gehni. ¿Gi beni ge nuˈmu̱ Märia bi ma bä nuu Elisabet, näˈä ˈue̱ne mi o ha rä mu̱i Elisabet bi nsagi ko rä johya? Näˈä ˈue̱ne mi to̱ˈmi Elisabet go mi geˈä Juan. Pe xibye̱, ¿te pe̱fi Juan ˈne rä Hesu?

Juan bi ku̱ˈmi rä Hesu ha rä däthe Jordan. Njabu̱ di nku̱ˈmdehe nˈa rä jäˈi. Di ku̱ˈmi gatˈho rä ndoyˈo ha yä dehe, ˈnepu̱ po̱ni mänˈaki de rä dehe. Juan mi fatsˈi yä jäˈi pa mi nku̱ˈmdehe hänge bi tˈembi Juan Bautista. Pe ¿por hanja bi matsˈi rä Hesu pa bi nku̱ˈmdehe?

Bi jabu̱ ngeˈä rä Hesu bi yˈapi Juan ge xä ku̱ˈmi ha yä dehe. Pe, ¿toˈo mi nku̱ˈmdehe? Nuˈu̱ yä jäˈi xki yobri de nuˈu̱ yä tsˈoki xki yˈo̱tˈe. Pe, xi rä Hesu, ¿mi japä mˈe̱di dä yobri ngeˈä xki yˈo̱tˈe yä tsˈoki? Hinä, rä Hesu nunka bi me̱fi yä tsˈoki, ngeˈä mi rä Tˈu̱ Äjuä xki ˈñehe de mähetsˈi. Hänge rä Hesu mi pe̱ˈtsi mänˈa raso pa bi yˈapäbi Juan ge xä matsˈi xä nku̱ˈmdehe. Ma gä handihu̱ te mä rasoˈä.

Rä Hesu mi mpe̱fi de gä yaxi änte de xä nku̱ˈmdehe. Tˈembi yä yaxi nuˈu̱ yä jäˈi hoki yä mexa, yä thuhni, ˈne märˈa yä tˈo̱tˈe de gä zaa. Jose, näˈä rä däme Märia mi mpe̱fi de gä yaxi hänge bi ˈñuti ˈnehe rä Hesu. Pe Äjuä himbä pe̱hni rä Tˈu̱ ha rä Xiˈmhai pa xä mpe̱fi de gä yaxi. Äjuä mi pe̱ˈtsi nˈa däta ˈme̱fi pa rä Hesu ˈne ya xki zo̱ho̱ rä ora pa geˈä. Hänge pa bi ˈñudi ge nubye̱ ma dä me̱päbi rä bolunta rä Dada, rä Hesu bi yˈapäbi Juan ge xä matsˈi xä nku̱ˈmdehe. ¿Bi ho Äjuä näˈä bi me̱fi rä Hesu?

Hää xa bi ho, hänge mi bo̱ni rä Hesu de ha yä dehe, Äjuä bi ñä dende mähetsˈi ˈne bi ˈñenä: “Nuni, go gehni mä Tˈu̱ xa di mädi”. ˈNehe, ˈñenä ngu bi xogi mähetsˈi ˈne bi gäi nˈa palomä pa habu̱ mi ˈmai rä Hesu. Pe hingä mi nˈa palomä. Mi geˈä rä mäkä tsˈe̱di Äjuä.

Nubye̱ rä Hesu mi pe̱ˈtsi te dä ntso̱ˈmi ndunthi, hänge bi mase̱ ha nˈa luga po 40 yä pa. Ja gehni rä Zithu bi ma bä tsu̱di rä Hesu. Po hñuˈki rä Zithu, mi ne xä japäbi rä Hesu xä ˈuengi de rä ˈñuu Äjuä. Pe rä Hesu xa bi ze̱tätho.

Mˈe̱fa, rä Hesu bi mengi ˈne bi bädi rˈa yä ñˈo̱ho̱ nuˈu̱ bi zo̱ho̱ bi yˈo̱tˈe yä de̱ni. Rˈa de geˈu̱ mi yä thuhu: Andres, Pedro (ˈnehe mi tˈembi Simon), Felipe ˈne Natanael (ˈnehe mi tˈembi Bartolome). Rä Hesu ˈne nuyu̱ yä ñˈo̱ho̱ bi ma pa ha Galilea, ˈne bi ntsaya ha Kanä, ha rä hnini Natanael. Ja gehni rä Hesu bi ntini ha nˈa nthäti, ˈne bi ja näˈä rä mu̱di milagro. ¿Gi pädi te mä milagroˈä? Bi japi bi mbinu rä dehe.