Habu̱ ma gi tini te hutsʼi

Habu̱ ma dä xiʼi te hutsʼi

 RÄ ˈMEDE 87

Rä Hesu mi yˈo ha templo

Rä Hesu mi yˈo ha templo

HYANDI nuni metsi ñäui nuyu̱ yä däta jäˈi. Gehyu̱ yä xahnäte mi udi ha rä templo Äjuä ha Jerusalen. ˈNe nuni metsi gehni rä Hesu. Nubye̱ ya xki te ˈne mi pe̱ˈtsi 12 yä je̱ya.

Nuyu̱ yä xahnäte himi kamfri nuˈmu̱ bi hyandi ge rä Hesu mi pädi ndunthi de Äjuä ˈne de rä Mäkä Tˈofo. Pe, ¿por hanja hingi yˈoua Jose ˈne Märia? ¿Habu̱ bi yˈoˈu̱? Ma gä handihu̱.

Tatˈä je̱ya, Jose mi tsitsˈi rä familia ha Jerusalen pa dä nuu näˈä ngo mi tˈembi Paskua. De Näsaret mi yˈo xi ndunthi pa Jerusalen ngeˈä xa mi yabu̱. Ha nuˈu̱ yä paˈu̱ hinto mi pe̱ˈtsi yä bo̱jä nixi mi ja yä tren. Hänge gatˈho yä jäˈi mi yˈotho. Jose ˈne Märia mi yˈo ngu hñupa pa dä zo̱ni ha Jerusalen.

Jose ya mi pe̱ˈtsi nˈa däta familia. Hänge Jose pe̱ˈtsi te mi su nuˈu̱ märˈa yä tˈu̱kä ku ˈne yä nju rä Hesu. Nde, näˈä je̱yaˈä, Jose, Märia, yä bätsi, ˈne märˈa yä jäˈi bi mengi de Jerusalen pa Näsaret. Nuˈu̱ mi huyämu̱i ge rä Hesu xki mengi ˈnehe. Pe mi ndee nuˈmu̱ ya ma xä ntsaya, Jose ˈne Märia bi mu̱di bi hyoni rä Hesu pe himbi dini, ¡bi hyoni ko nuˈu̱ yä pariente ˈne yä ntsitsˈi pe hingä ja mi yˈoni! Hänge pe̱ˈtsi te bi mengi ha Jerusalen pa bä honi.

Jose ˈne Märia bä tini rä Hesu ha rä templo. Rä Hesu mi huhni mi o̱de näˈä mi udi yä xahnäte ˈne mi japäbi yä ntˈani. Gatˈho nuˈu̱ yä jäˈi himi tsa dä gamfri näˈä mfädi mi pe̱ˈtsi rä Hesu. Pe Märia bi ˈñembi rä Hesu: “Mä zi tˈu̱ˈi, ¿por hanja xkä yˈo̱tkägihe njaua? Ri dada ˈne nuga xa ndi tumämu̱ihe ngeˈä dä ˈme̱ˈäˈihe”.

Rä Hesu bi dädi: “¿Por hanja ngi hongägihu̱? ¿Hage hingi pädihu̱ ge nuga pe̱ˈtsi te gä ˈmu̱kua ha rä ngu mä Dada?”.

Hää, rä Hesu xa mi ho dä ma habu̱ mi tˈudi de Äjuä. Nuju̱ mähyoni gä pe̱fihu̱ njabu̱ ˈnehe, ¿hänge hää? Ha Näsaret, rä Hesu mi pa ha yä mhuntsˈi tatˈä semänä pa mi xo̱kämbeni Äjuä. Rä Hesu mi pädi ndunthi de rä Mäkä Tˈofo ngeˈä mi jamäsu näˈä mi tˈudi. ¡Ma gä de̱mbäbihu̱ rä kˈoi rä Hesu!