Habu̱ ma gi tini te hutsʼi

Habu̱ ma dä xiʼi te hutsʼi

 RÄ ˈMEDE 36

Rä tˈu̱kä doro de gä oro

Rä tˈu̱kä doro de gä oro

¡AY, HINÄ! Xibye̱, ¿te pe̱fi yä jäˈi? ¡Di xatuäbi nˈa rä tˈu̱kä doro! ¿Por hanja pe̱fi njaua?

Nuˈmu̱ rä Moises bä kohi ndunthi yä pa ha rä tˈo̱ho̱, yä israelita bi ˈñenä: “Hindi pädihu̱ te xpä thogi ko rä Moises. Ma gä hokihu̱ nˈa rä zidada pa dä gu̱gägihu̱ de gekua”.

Rä Aron, rä ku rä Moises bi ˈñenä: “Ndeˈmu̱, hñäkihu̱ nuˈu̱ ri tsˈu̱nˈguhu̱ ˈne guä hänkägihu̱ua”. Mi tˈumbi rä Aron nuˈu̱ yä tsˈu̱nˈgu, bi deni ko rä tsibi pa bi hyoki nˈa rä tˈu̱kä doro de gä oro. ˈNe yä israelita bi ˈñenä: “¡Gehnä mä Zi Dadahu̱ bä ju̱gägihu̱ de Ejipto!”. ˈNepu̱ bi ja nˈa rä dängo, ˈne bi xo̱kämbeni näˈä rä tˈu̱kä doro.

Mi hyandi Jeoba, xi bi bo̱ rä kue̱. ˈNe bi ˈñembi rä Moises: “Nxo̱ni gi käi. Yä israelita bi pe̱fi rˈa yä tsˈo tˈo̱tˈe, xä zoogi mä mhända ˈne bi ndäne nˈa rä tˈu̱kä doro de gä oro”.

Rä Moises nguntˈä bi gäi de rä tˈo̱ho̱. ˈNe mi zo̱ni, ¿gi pädi te bi hyandi rä Moises? Bi hyandi hanja yä israelita xki fahni näˈä rä tˈu̱kä doro, xa mi tuhu ˈne mi nei. Rä Moises xa bi nkue̱ ndunthi ˈne bi yˈe̱i nuˈu̱ yoho yä nxindo habu̱ mi hutsˈi yä mhända Äjuä. Nuyu̱ yä nxindo bi dehmi. ˈNepu̱ bi gu̱ näˈä rä tˈu̱kä doro xki hyoki nuˈu̱ yä israelita, bi deni ko rä tsibi ˈne bi xutˈi.

Yä israelita xki me̱fi xi nˈa rä tsˈo tˈo̱tˈe. Hänge rä Moises bi xipi rˈa yä ñˈo̱ho̱ dä gu̱ yä majuai, ˈne bi ˈñembi: “Pe̱ˈtsi te dä du gatˈho nuˈu̱ bi xo̱kämbeni näˈä rä tˈu̱kä doro”. Hänge nuˈu̱ yä ñˈo̱ho̱ bi hyo 3,000 yä jäˈi. ¿Te utkägihu̱ nunä rä thogi? Ge se̱he̱ Jeoba ri ˈñepi gä xo̱kämbenihu̱, hingä nuˈu̱ yä zidada hingä mäjuäni.