Habu̱ ma gi tini te hutsʼi

Habu̱ ma dä xiʼi te hutsʼi

 RÄ ˈMEDE 54

Nˈa rä ñˈo̱ho̱ xa mi tse̱di

Nˈa rä ñˈo̱ho̱ xa mi tse̱di

¿GI PÄDI te mrä thuhu näˈä rä ñˈo̱ho̱ xa mi tse̱di de gatˈho nuˈu̱ yä ñˈo̱ho̱ xä mˈu̱i? Nˈa rä nzaya mrä thuhu Sanson. Jeoba go geˈä xki umbi rä tsˈe̱di rä Sanson. Änte dä mˈu̱i rä Sanson, Jeoba xki xipäbi näˈä rä nänä: “Nguntˈä ma gi pe̱ˈtsi nˈa ri tˈu̱. Go geˈä ma dä gu̱tˈi rä ˈñuu pa dä ñäni yä israelita de yä filisteo”.

Yä filisteo mñä tsˈomˈu̱i jäˈi mi ˈmu̱i ha Kanään. Mi pe̱ˈtsi ndunthi yä soldado, ˈne mi o̱ˈtuäbi ndunthi rä tsˈomˈu̱i yä israelita. Nˈa rä pa, rä Sanson bi ma habu̱ mi ˈmu̱i yä filisteo, ˈne ha rä ˈñuu bi bo̱ni nˈa rä däta zate mi ne dä za. Pe rä Sanson se̱he̱ ko yä yˈe̱ bi hyo näˈä rä zate. ˈNehe bi hyo yä nthebetho nuˈu̱ yä nduxte filisteo.

Mˈe̱fa, rä Sanson xi bi mädi nˈa rä ˈme̱hñä mrä thuhu Dalila. Pe nuˈu̱ yä ñˈo̱ho̱ mi gu̱tˈi rä ˈñuu ha rä hnini Filistea bi ˈñembi rä Dalila ge mu̱ dä mää habu̱ mi ehe rä tsˈe̱di rä Sanson, kada nˈa de geˈu̱ ma xä umbäbi 1,100 yä bojä de gä plata. Rä Dalila hää mi ne näˈä rä bojä, hingä xa mäjuäni mi mädi rä Sanson nixi mi mädi näˈä rä hnini Äjuä. Hänge rä Dalila bi sigi bi yˈambäbi rä Sanson habu̱ mi ehe näˈä rä tsˈe̱di mi pe̱ˈtsi.

Rä Dalila bi uadi bi japäbi rä Sanson dä mää habu̱ mi ehe näˈä rä tsˈe̱di mi pe̱ˈtsi. Rä Sanson bi ˈñenä: “Nunka xä tˈäxkägi. Dende xa dä ˈmu̱i, Äjuä bi huankägi pa gä pe̱päbi ngu nˈa rä näsareo. Pe mu̱ dä tˈäxkägi, nuˈmu̱ ma gä ˈme̱di mä tsˈe̱di”.

Mi yˈo̱de njabu̱ rä Dalila, bi kai rä Sanson pa bi ñˈähä ha rä ngo̱de. ˈNe bi nzofo nˈa rä ñˈo̱ho̱ pa bi ˈñäxi rä Sanson. Mi nuhu rä Sanson, ya xki ˈme̱di rä tsˈe̱di. Nubye̱, bi yu̱tˈi yä filisteo ˈne bi gu̱ rä Sanson. Bi hñäˈmpäbi yä da, ˈne bi zitsˈi pa dä mˈe̱go.

Nˈa rä pa, yä filisteo bi me̱ˈtsi nˈa rä dängo pa bi xo̱kämbeni näˈä rä zidada hingä mäjuäni, mi rä thuhu Dagon. ˈNe bi gu̱ki rä Sanson de rä fadi pa xa bi deni. Rä Sanson ya xki te mänˈaki rä xtää. Rä Sanson bi ˈñembäbi näˈä rä metsi mi gu̱hni: “Hyopkägi gä thani nuˈu̱ yä nˈo̱tse rä to̱nˈgu”. Nubye̱, rä Sanson bi xatuäbi rä Zi Dada Jeoba pa bi yˈapäbi dä umbä rä tsˈe̱di, bi mihi nuˈu̱ yä nˈo̱tse, ˈne bi mafi: “Hyopkägi gä tu ko yä filisteo”. Xki ntini 3,000 yä filisteo ha näˈä rä dängo, ˈne mi yˈentˈi rä Sanson nuˈu̱ yä nˈo̱tse, näˈä rä to̱nˈgu bi dagi ˈne bi hyo gatˈho nuyu̱ yä bo̱ka jäˈi.