Habu̱ ma gi tini te hutsʼi

Habu̱ ma dä xiʼi te hutsʼi

 RÄ ˈMEDE 12

Yä jäˈi bi hyoki nˈa rä däta to̱nˈgu

Yä jäˈi bi hyoki nˈa rä däta to̱nˈgu

BI THOGI ndunthi yä je̱ya. Yä bätsi rä Noe bi me̱ˈtsi ndunthi yä bätsi. Nuyu̱ yä bätsi bi te ˈne bi me̱ˈtsi ˈnehe märˈa yä bätsi. Nguntˈä bi mˈu̱i ndunthi yä jäˈi ha rä Xiˈmhai.

Bi zo̱ho̱ bi mˈu̱i nˈa rä bonkˈme̱to rä Noe mrä thuhu rä Nemrod. Näˈä xa mrä tsˈomˈu̱i, mi ju̱ yä zuˈue ˈne yä jäˈi ˈnepu̱ mi ho. Rä Nemrod bi hñudise̱ de gä ndä pa bi mända märˈa yä jäˈi. Äjuä himi numäñho rä Nemrod.

Gatˈho nuˈu̱ yä jäˈi mi ˈmu̱i, mi ñä nˈatˈä rä ñhäki. Rä Nemrod mi ne ge yä jäˈi xä mˈu̱i nˈatˈä rä luga pa xä za xä mända gatˈho. Hänge, ¿gi pädi te bi me̱fi? Bi ˈñembi yä jäˈi ge dä hyoki nˈa rä hnini ˈne bi ˈñembi ja dä hyokini nˈa rä däta to̱nˈgu. Ha nunä rä kˈoi gi handi hanja hoki yä ladriyo.

Jeoba himbi ho nunä rä to̱nˈgu. Jeoba mi ne ge yä jäˈi xä ma de gehni ˈne xä nxani ha gatˈho rä Xiˈmhai. Pe nuˈu̱ yä jäˈi bi ˈñenä: “¡Maha! Ma gä hokihu̱ nˈa rä hnini ˈne nˈa rä däta to̱nˈgu xi rä ñhetsˈi asta dä tso̱ni ha mähetsˈi. ¡Nuˈmu̱ hää ma gä pe̱ˈtsihu̱ rä nsu!”. Mi ne rä nsu pa geˈu̱se̱ hingä pa Äjuä.

Hänge Äjuä ya himbi hyopi nuˈu̱ yä jäˈi dä sigi dä hyoki näˈä rä to̱nˈgu. ¿Gi pädi hanja bi ja? Äjuä nguntˈä bi patuäbi yä ñhäki yä jäˈi, ya himi ñä se̱he̱ nˈatho rä ñhäki. Ya himi pädi te mi mängä nˈa ngu mä nˈa. Hänge näˈä rä hnini bi tˈembi Babel o Babilonia, nunä thuhu ri bo̱ni: hingi fädi te mää.

Nubye̱, yä jäˈi bi mu̱di bi bo̱ni de Babel. Nuˈu̱ yä jäˈi mi ñä nˈatˈä rä ñhäki bi ma ha märˈa yä luga de ha rä Xiˈmhai pa dä mˈu̱i mähye̱gi.