Habu̱ ma gi tini te hutsʼi

Habu̱ ma dä xiʼi te hutsʼi

 RÄ ꞌMEDE 9

Rä Noe bi hyoki nꞌa rä arka

Rä Noe bi hyoki nꞌa rä arka

RÄ Noe mi pe̱ꞌtsi rä ꞌme̱hñä ꞌne hñuu yä tꞌu̱. Nuꞌu̱ yä tꞌu̱ mñä thuhu Sem, Kam ꞌne Jafet. Kada nꞌa de nuyu̱ yä tꞌu̱ mi ꞌmu̱ yä ꞌme̱hñä. Hänge mi ꞌmu̱i hñäto yä jäꞌi ha rä ngu rä Noe.

Nubye̱, Äjuä bi japi rä Noe dä hyoki nꞌa rä däta tꞌo̱tꞌe. Bi ꞌñembi dä hyoki nꞌa rä däta arka. Näꞌä rä arka xa mrä däta ngu nꞌa rä barko, pe ꞌñenä nꞌa mrä däta kaha näꞌä xmä matho. Äjuä bi ’ñembi: “Hyoki de gä hñu nto̱ke, ꞌne hyokuäbi yä kuarto”. Nuꞌu̱ yä kuarto pa rä Noe ꞌne rä familia, pa yä zuꞌue ꞌne pa dä me̱ꞌtsi yä ñhuni.

Äjuä bi ꞌñembi rä Noe dä hyokä xä ñho näꞌä rä arka pa hindä yu̱tꞌi rä dehe. Bi ꞌñenä: “Ma gä pe̱hni nꞌa rä däta däyꞌe pa gä huati gatꞌho rä xiꞌmhai. Toꞌo hindä yu̱tꞌi ha rä arka ma dä du”.

Rä Noe ꞌne yä tꞌu̱ bi yꞌo̱te Äjuä ꞌne bi mu̱di bi hyoki rä arka. Pe nuꞌu̱ märꞌa yä jäꞌi se̱he̱ mi theni. Bi sigi bi ntsꞌomꞌu̱i. Hinto bi gamfri nuꞌmu̱ rä Noe bi mää näꞌä ma xä me̱fi Äjuä.

Koꞌmu̱ xa mrä däta, bi zitsꞌi ndunthi yä je̱ya pa bi thoki näꞌä rä arka. Mi uadi, nubye̱ Äjuä bi ꞌñembi rä Noe dä ꞌñetꞌi yä zuꞌue. Bi ꞌñembi dä ꞌñetꞌi kada nꞌa rä zuꞌue ko rä ñꞌoui. Pe de märꞌa yä zuꞌue bi ꞌñembi dä ꞌñetꞌi yoto. ꞌNehe bi ꞌñembi rä Noe ge dä ꞌñetꞌi yoho de kada nꞌa de nuꞌu̱ yä tsꞌintsꞌu̱ mi ja. Rä Noe bi me̱fi gatꞌho ja ngu xki xipi Äjuä.

Mꞌe̱fa, rä Noe ꞌne rä familia bi yu̱tꞌi ꞌnehe ha rä arka. Nuꞌmu̱, Äjuä bi gotꞌi rä goxthi. Mboo de rä arka, rä Noe ꞌne rä familia bi do̱ꞌmi. Ja ngue̱nda ge nuꞌi ꞌnehe gi o mboo. ¿Ma dä dagi nꞌa rä däta däyꞌe ja ngu xki mängä Äjuä?