Habu̱ ma gi tini te hutsʼi

Habu̱ ma dä xiʼi te hutsʼi

 MÄ MˈU̱IHU̱ NGU YÄ KRISTIANU

Tini rä johya de gi ungä ntˈo̱de rä Noya Äjuä

Tini rä johya de gi ungä ntˈo̱de rä Noya Äjuä

¿Di jaˈi xä ñhei gi po̱ni gi ungä ntˈo̱de rä Noya Äjuä? Mu̱ hää, hingä ho̱nse̱ˈi. Ndunthi de gekhu̱ di jakägihu̱ xä ñhei, ngeˈä di tsuhu̱ o di ntsahu̱ gä ñähu̱ ko yä jäˈi, o ngeˈä yä jäˈi hingi ne dä yˈo̱de ˈne di nkue̱tho, ˈne rˈabu̱ geˈä hägähu̱ rä johya. Pe nuju̱ di pe̱phu̱ nˈa rä Zi Dada de gä johya, ˈne näˈä ne ge gä pe̱päbihu̱ ko rä johya (Sl 100:2; 1Ti 1:11). ¿Te mä raso di pe̱ˈtsihu̱ pa gä uñhu̱ ntˈo̱de ko rä johya?

Nˈaa, mähyoni gä beñhu̱ ge nuju̱ di uñhu̱ ntˈo̱de yä hogä noya de gä humu̱i. Mäpaya, yä jäˈi hinte mä humu̱i pe̱ˈtsi, pe nuju̱ dä za gä ñuˈspäbihu̱ yä koraso de gä johya ko nuˈu̱ «yä rˈayˈo hogä noya de nˈa rä tˈo̱tˈe xa mähotho» (Isa 52:7). Nuˈu̱ yä hogä noya de rä Tsˈu̱tˈhui Äjuä, ˈnehe dä za dä hänkägihu̱ ndunthi rä johya. Hänge änte de gä po̱ñhu̱ gä uñhu̱ ntˈo̱de, mähyoni gä beñhu̱ nuˈu̱ yä jäpi ma dä hä rä Tsˈu̱tˈhui Äjuä.

Yoho, nuˈu̱ yä hogä noya di uñhu̱ ntˈo̱de, fatsˈi yä jäˈi pa dä me̱ˈtsi nˈa rä hogä ntsitsˈi ko Äjuä. Ndunthi de geˈu̱ xä paati yä mˈu̱i, xä hye̱pu̱ yä bisio ˈne nubye̱ pe̱ˈtsi rä humu̱i de dä mˈu̱i pa nzäntho (Isa 48:17, 18; Ro 1:16). Imäjinä ge xä nja nˈa rä mbiˈmhai o mä nˈa rä däta tsˈo thogi ˈne xä thuxˈäˈi pa gi ju̱ki nuˈu̱ yä jäˈi xä ntsˈe̱ˈmi. Pe xiˈmu̱ rˈa yä jäˈi hingi ne toˈo dä matsˈi, ¿ho̱nse̱ po geˈä ma gi hye̱gi de gi hyoni nuˈu̱ yä jäˈi hää honi rä mfatsˈi? (Mt 10:11-14.)

Hñuu, gehnä mänˈa rä däta raso: ora di uñhu̱ ntˈo̱de nuˈu̱ yä hogä noya, di eˈspäbihu̱ rä nsu Jeoba, ˈne näˈä xa di numäñho ora di jahu̱ nunä ˈme̱fi (Isa 43:10; Heb 6:10). Jeoba ˈnehe di rˈakhu̱ rä espiritu santo pa gä kumplihu̱ ko nunä ˈme̱fi, ˈne pa gä tinihu̱ rä johya ora di uñhu̱ ntˈo̱de (Gál 5:22). Ko rä mfatsˈi Jeoba, ¡hinte ma dä hyu̱gägihu̱ de gä uñhu̱ ntˈo̱de ko ndunthi rä balo! (Hch 4:31.) Hänge hindi mporta hanja dä dädi yä jäˈi, ¡nuju̱ ma gä uñhu̱ ntˈo̱de ko ndunthi rä johya! (Eze 3:3.)

¿Konte mä mfeni gi hohmä gi po̱ni gi ungä ntˈo̱de? ¿Hanja dä za gi ˈñudi ge gi pe̱ˈtsi rä johya ora gi po̱ni gi ungä ntˈo̱de?

HYANDIHU̱ RÄ BIDEO ¿TE BI MAXKÄGI PA DÄ TINI MÄNˈAKI RÄ JOHYA DE GÄ PE̱PÄBI JEOBA? MˈE̱FA THÄDIHU̱ NUYA YÄ NTˈANI:

  • Mäske di uñhu̱ ntˈo̱de ndunthi yä ora tatˈä zänä, ¿por hanja xa mähyoni gä nxadihu̱ rä Noya Äjuä ˈne gä ntso̱ˈmihu̱ näˈä di hetihu̱?

  • ¿Hanja dä za gä de̱mbäbihu̱ rä ejemplo María?

  • ¿Te gi pe̱fi pa gi ju̱ki rä tiempo pa gi ntso̱ˈmi näˈä gi heti de rä Mäkä Tˈofo?

  • ¿Ndaˈä mänˈa gi ho ora gi ungä ntˈo̱de rä Noya Äjuä?