Di tꞌungä ntꞌo̱de rä Noya Äjuä ha Ghana.

PROGRAMÄ PA YÄ MHUNTSˈI Enero de rä 2017

Rꞌa yä presentasion pa nunä zänä

Rꞌa yä presentasion pa rä rebista La Atalaya, ꞌne nꞌa rä ntꞌudi de rä Mäkä Tꞌofo näꞌä mää de nuꞌu̱ yä señä udi ge ya di ꞌmu̱hu̱ ha yä gäxä pa. Hyokise̱ nꞌa ri presentasion.

YÄ TESORO DE RÄ NOYA ÄJUÄ

Rä Zi Dada Jeoba di su rä hnini

¿Xkä handi hanja nꞌa rä jäꞌi xa di su ꞌne umbäbi rä ñhuni yä zo̱nte? Njabu̱ ꞌnehe, Jeoba di sugägihu̱ ꞌne di rꞌakhu̱ xa ndunthi rä ñhuni de rä Mäkä Tꞌofo.

YÄ TESORO DE RÄ NOYA ÄJUÄ

«Nꞌa rä rey ma dä ndä pa dä yꞌo̱tꞌe rä justisia»

Rä Hesu näꞌä Rey, huahni yä prinsipe pa dä su rä taxo. Yä ansiano japi dä zamäñho rä zi taxo ora ko rä Mäkä Tꞌofo di gu̱hni, nupäbi yä mfeni ꞌne huꞌmpäbi yä mu̱i.

YÄ TESORO DE RÄ NOYA ÄJUÄ

Esekias bi hñäni yä jäpi, ngeꞌä bi me̱ꞌspä rä komfiansa Jeoba

Yä asirio bi trata xä pidi yä judio pa njabu̱ nuyu̱ xä rindese̱ nsinke xä ntuhni, pe Jeoba bä pe̱hni nꞌa rä e̱nxe̱ pa bi ñäni Jerusalén.

MÄ MꞌU̱IHU̱ NGU YÄ KRISTIANU

«Oh Jeoba, mä komfiansa ꞌmu̱i kongeꞌi»

Mähyoni gä pe̱ꞌspähu̱ rä komfiansa Jeoba tanto ora di ꞌmu̱hu̱ xä ñho ꞌne tanto ora di thohu̱ yä xuñha. ¿Hanja bi ꞌñudi Esekias ge rä komfiansa xki hñuxä ha Jeoba?

YÄ TESORO DE RÄ NOYA ÄJUÄ

Jeoba umbäbi rä tsꞌe̱di nuꞌu̱ xä zabi

Ora di ñhatsꞌi yä nxu̱ni durante yä ora, ꞌñenä hingi tsabi. Nunä kꞌoi udi hanja Jeoba, ꞌnehe rꞌakägihu̱ rä tsꞌe̱di pa gä pe̱päbihu̱ ꞌne pa hindä zabigihu̱.

MÄ MꞌU̱IHU̱ NGU YÄ KRISTIANU

Yꞌadi ha ri sadi po nuꞌu̱ yä ku o fadi o thogi yä ntꞌu̱tsate

¿Hanja ri ꞌñehe gä xatuäbihu̱ Jeoba pa gä faxu̱ nuꞌu̱ yä ku o fadi o thogi yä ntꞌu̱tsate?

YÄ TESORO DE RÄ NOYA ÄJUÄ

Yä profesia rä Zi Dada Jeoba nzäntho di kumpli

Jeoba bi usa Isaías pa bi yꞌofo ge Babilonia ma xä uadi. Jeoba bi mää nunä profesia 200 yä je̱ya änte ꞌne bi uni ndunthi yä detalle de hanja ma xä thogi.