Сӕйраг ӕрмӕгмӕ рахиз

Сӕргӕндтӕм рахиз

Йегъовӕйы Ӕвдисӕнтӕ

Ӕвзаг равзар ирон

 УӔЛӔМХАСӔН

Адӕймагӕн ӕнӕмӕлгӕ уд ис?

Адӕймагӕн ӕнӕмӕлгӕ уд ис?

БИРӔТӔ афтӕ хъуыды кӕнынц, ӕмӕ адӕймагӕн йӕ мидӕг ис, цӕстӕй фенӕн кӕмӕн нӕй, ахӕм ӕнӕмӕлгӕ уд. Ӕмӕ, дам, адӕймаг куы амӕлы, уӕд, дам, уыцы уд буарӕй фӕхицӕн вӕййы, кӕдӕмдӕр атӕхы ӕмӕ уым фӕцӕры. Ацы ахуырад ӕнӕхъӕн дунейыл дӕр кӕй апарахат, уымӕ гӕсгӕ бирӕтӕм диссаг фӕкӕсы, Библи афтӕ кӕй нӕ дзуры, уый. Уӕдӕ, адӕймаг куы амӕлы, уӕд цы фӕвӕййы? Уый тыххӕй Хуыцауы Ныхасы цы фыст ис?

 ДЗЫРДТӔ НЕ́ФЕШ ӔМӔ ПСИХЕ́ БИБЛИЙЫ

Чи зоны йӕ хъуыды кӕныс, Библи фыст кӕй ӕрцыд сӕйраджыдӕр дыууӕ ӕвзагыл: дзуттаг ӕмӕ грекъаг. Библийы дзуттаг дзырд не́феш ӕмӕ грекъаг дзырд психе́ кӕм ӕмбӕлынц, уым сӕ иуӕй-иу тӕлмацты ратӕлмац кодтой дзырд «уд»-ӕй. Ацы дыууӕ дзырды Библийы ӕмбӕлынц 800 хаттӕй фылдӕр ӕмӕ амонынц: 1) адӕм, 2) цӕрӕгойтӕ ӕмӕ 3) куыд адӕймаджы цард, афтӕ цӕрӕгойты цард дӕр. Уӕдӕ ӕркӕсӕм, ахӕм хъуыды сын кӕм ис, уыцы стихтӕй иу цалдӕрмӕ.

Адӕм. «Нойы рӕстӕджы... нау цалдӕр адӕймаджы, бӕлвырдӕй та аст уды, рахаста доны сӕрты, ӕмӕ аирвӕзтысты» (1 Петры 3:20). Ацы стихы дзырд «уд» (грекъагау психе́) амоны адӕймӕгтӕм, ома Ноймӕ, йӕ бинойнагмӕ, йе ’ртӕ фыртмӕ ӕмӕ йе ’ртӕ чындзмӕ. Рацыды 16:16 стихы та дзырд цӕуы, израилӕгтӕй-иу алчидӕр маннӕ цас хъуамӕ ӕрӕмбырд кодтаид, уый тыххӕй. Фыст дзы ис: «Алчидӕр дзы ӕмбырд кӕнӕд, йӕ цатыры цал уды ис, уымӕ гӕсгӕ». Уӕдӕ маннӕ ӕмбырд кӕнын хъуыди, алы хӕдзары дӕр бинонтӕ цалӕй уыдысты, уыйбӕрц. Библийы ма дзырдтӕ не́феш ӕмӕ психе́ адӕммӕ амонынц ӕндӕр стихты дӕр, зӕгъӕм, Райдианы 46:18; Йесо Навины 11:11, фиппаинаг; Хъуыддӕгты 27:37, фиппаинаг, ӕмӕ Ромӕгтӕм 13:1, фиппаинаг.

Цӕрӕгойтӕ. Хуыцау дуне куыд фӕлдыста, уый тыххӕй Библийы фыст ис: «Хуыцау загъта: „Уадз ӕмӕ дӕттӕ байдзаг уӕнт цӕрӕг удтӕй [не́феш] ӕмӕ мӕргътӕ атӕхӕнт зӕххы сӕрмӕ, арвыл“. Уый фӕстӕ Хуыцау загъта: „Уадз ӕмӕ зӕххыл фӕзынӕд цӕрӕг удты [не́феш] алы мыггӕгтӕ – хӕдзарон фосы алы мыггӕгтӕ, хъӕддаг сырдты алы мыггӕгтӕ ӕмӕ ӕндӕр цӕрӕгойты алы мыггӕгтӕ“. Ӕмӕ сси афтӕ» (Райдиан 1:20, 24). Ацы ран кӕсӕгтӕ дӕр, хӕдзарон фос дӕр ӕмӕ хъӕддаг сырдтӕ дӕр хуыйнынц «удтӕ», ома не́феш. Мӕргъты ӕмӕ ма ӕндӕр цӕрӕгойты Библи «удтӕ» хоны Райдианы 9:10; Левиты 11:46 ӕмӕ Нымӕцты 31:28, фиппаинаг.

Адӕймаджы цард. Библийы иуӕй-иу рӕтты дзырдтӕ не́феш ӕмӕ психе́ амонынц цардмӕ. Зӕгъӕм, Йегъовӕ Моисейӕн загъта, зӕгъгӕ «дӕ марынмӕ чи хъавыд [«дӕ уд дын чи агуырдта», фиппаинаг], уыдонӕй иу дӕр нал ис» (Рацыд 4:19). Знӕгтӕ Моисейы уд цӕмӕн агуырдтой? Уымӕн ӕмӕ йын йӕ цард байсынмӕ хъавыдысты. Моисейы замантӕй раздӕр,  Рахилӕн йӕ фырт Вениамин куы гуырд, уӕд «йӕ уд [не́феш]... иста» (Райдиан 35:16–19, фиппаинаг). Уый ууыл дзурӕг уыд, ӕмӕ Рахил цардӕй ахицӕн. Ӕркӕсӕм Чырыстийы ныхӕстӕм дӕр: «Ӕз дӕн хорз фыййау. Ӕмӕ хорз фыййау йӕ уд [психе́] дӕтты фысты сӕрвӕлтау» (Иоанны 10:11). Йесо йӕ уд, кӕнӕ йӕ цард [психе́], радта адӕмы тыххӕй. Куыд уынӕм, афтӕмӕй ацы стихты дзырдтӕ не́феш ӕмӕ психе́ амонынц адӕймаджы цардмӕ. Ахӕм цӕвиттонтӕ ма ис Матфейы 10:39, фиппаинаг; Иоанны 15:13 ӕмӕ Хъуыддӕгты 20:10, фиппаинаг.

Хуыцауы Ныхас дарддӕр куы ахуыр кӕнай, уӕд ӕй фендзынӕ, не́феш ӕмӕ дзы психе́ дзырдтӕ «ӕнӕмӕлгӕ» кӕнӕ «ӕнусон»-имӕ кӕй никуы ӕмбӕлынц. Библийы фыст ис, уд [не́феш] мӕлгӕ кӕй кӕны (Йезекил 18:4, 20). Уымӕ гӕсгӕ, чи амард, ахӕм адӕймаг Библийы хуыйны «мард уд» (Левит 21:11, фиппаинаг).

ДЗЫРДТӔ РУ́АХ ӔМӔ ПНЕ́ВМА БИБЛИЙЫ

Бирӕ тӕлмацты ма «уд»-ӕй ратӕлмац кодтой дзуттаг дзырд ру́ах ӕмӕ грекъаг дзырд пне́вма дӕр. Фӕлӕ, Библийы ацы дзырдтӕ кӕм ӕмбӕлынц, уым сӕ хъуыды, бирӕтӕ йӕ куыд ӕмбарынц, ахӕм нӕу. Ру́ах дӕр ӕмӕ пне́вма дӕр амонынц, зӕххыл цыдӕриддӕр цӕрӕг ис, уыдон цы тыхы фӕрцы цӕрынц, уымӕ. Зӕгъӕм, Псаломы 104:29 стихы Йегъовӕйы тыххӕй ахӕм ныхӕстӕ ис: «Сӕ царды тых [ру́ах] сын куы байсыс, уӕд сӕ цард фӕвӕййы, ӕмӕ фӕстӕмӕ сыджытмӕ аздӕхынц». Иаковы 2:26 стихы та фыст ис, зӕгъгӕ, «буар ӕнӕ улӕфтӕй [пне́вма] мард» у. Ацы дыууӕ стихӕй куыд уынӕм, афтӕмӕй буар цӕры «царды тыхы», кӕнӕ «улӕфты», фӕрцы. Ӕнӕ уымӕй буар у мард. Ӕмӕ уымӕ гӕсгӕ Библийы дзырд ру́ах тӕлмацгонд ӕрцыд ӕрмӕст «уд»-ӕй нӕ, фӕлӕ ма «тых» кӕнӕ «царды тых»-ӕй дӕр. Зӕгъӕм, Нойы рӕстӕджы Хуыцау загъта, зӕххыл доны хъаймӕт кӕй рауадздзӕн ӕмӕ кӕй фесафдзӕн, «царды тых [ру́ах] цы буары мидӕг ис, уыдоны се ’ппӕты дӕр» (Райдиан 6:17, фиппаинаг; 7:15, 22, фиппаинаг). Уӕдӕ ру́ах дӕр ӕмӕ пне́вма дӕр амонынц, зӕххыл цыдӕриддӕр цӕрӕг ис, уыдон цы ӕнӕуынгӕ тыхы фӕрцы, кӕнӕ улӕфты фӕрцы, цӕрынц, уымӕ.

Уый абарӕн ис радиоимӕ. Радио ӕнӕ токӕй куыд нӕ кусы, афтӕ буар дӕр ӕнӕ тыхӕй кӕнӕ ӕнӕ улӕфтӕй нӕ цӕры. Райсӕм къухыхӕсгӕ радиоприемник. Батарейкӕтӕ дзы  куы бавӕрай ӕмӕ йӕ куы бакъӕпп кӕнай, уӕд, батарейкӕты цы ток ис, уымӕй скусы. Фӕлӕ дзы батарейкӕтӕ куы нӕ уа, уӕд та не скусдзӕн. Йӕ хабар афтӕ у, ӕнӕуи токӕй чи кусы, ахӕм радиойӕн дӕр. Уӕдӕ цӕмӕй мах дӕр цӕрӕм, уый тыххӕй нӕ хъӕуы царды тых. Зӕгъын ма хъӕуы уый дӕр, ӕмӕ токау царды тых [ру́ах кӕнӕ пне́вма] дӕр ницы ӕмбары, хъуыды кӕнын нӕ зоны. Уый у ӕнӕуи тых. Фӕлӕ псаломы куыд бакастыстӕм, афтӕмӕй ӕнӕ «царды тых»-ӕй, ома ӕнӕ улӕфтӕй, адӕймагӕн йӕ «цард фӕвӕййы, ӕмӕ фӕстӕмӕ сыджытмӕ аздӕхы».

Адӕймаг куы амӕлы, уӕд цы фӕвӕййы, уый тыххӕй Екклесиасты 12:7 стихы фыст ис: «Сыджыт [ома йӕ буар] аздӕхдзӕн зӕхмӕ, кӕм уыди, уырдӕм, царды тых та аздӕхдзӕн ӕцӕг Хуыцаумӕ, чи йӕ радта, уымӕ». Адӕймагӕй царды тых, кӕнӕ улӕфт, куы рацӕуы, уӕд амӕлы, ӕмӕ йӕ буар фӕстӕмӕ аздӕхы, кӕм уыд, уырдӕм – зӕхмӕ. Царды тых та аздӕхы, чи йӕ радта, уымӕ – Хуыцаумӕ (Иов 34:14, 15; Псалом 36:9). Уый афтӕ ӕмбарын нӕ хъӕуы, ӕмӕ царды тых ӕцӕгдӕр уӕлӕрвтӕм ацӕуы. Йӕ хъуыды уый у, ӕмӕ, чи амард, уыцы адӕймаг ма ногӕй цӕрдзӕн ӕви нӕ, уый Йегъовӕ Хуыцауӕй кӕнгӕ у. Йӕ цард ӕнӕхъӕнӕй дӕр ис Хуыцауы къухы. Ӕрмӕстдӕр Хуыцауӕн у йӕ бон адӕймаджы ногӕй царды тых бауадзын ӕмӕ йӕ фӕстӕмӕ цардмӕ раздахын.

«Ингӕнты чидӕриддӕр ис, уыдоны» Хуыцау фӕстӕмӕ цардмӕ кӕй раздахдзӕн, уый стыр удӕнцой куыннӕ у! (Иоанны 5:28, 29). Йегъовӕ сӕ куы ӕгас кӕна, уӕд сын ног буӕрттӕ скӕндзӕн, бауадздзӕн сӕ царды тых, кӕнӕ улӕфт, ӕмӕ та ногӕй цӕрдзысты. Ахъуыды-ма кӕн, уый адӕмӕн цас циндзинад ӕрхӕсдзӕн!

Кӕд дӕ, дзырдтӕ не́феш, психе́, ру́ах ӕмӕ пне́вма цы нысан кӕнынц, уый тыххӕй фылдӕр базонын фӕнды, уӕд кӕс «Библи – Ног дунейы тӕлмац»-ы Уӕлӕмхасӕн, 2063–2065 фӕрстӕ. Мыхуыры йӕ рауагътой Йегъовӕйы Ӕвдисӕнтӕ.