Сӕйраг ӕрмӕгмӕ рахиз

Сӕргӕндтӕм рахиз

Йегъовӕйы Ӕвдисӕнтӕ

Ӕвзаг равзар ирон

Марчы 9:1—50

9  Уый фӕстӕ ма сын Йесо ноджыдӕр загъта: «Ӕцӕг уын зӕгъын: ам чи лӕууы, уыдонӕй иуӕй-иутӕ нӕ амӕлдзысты, афтӕ фендзысты, Хуыцауы паддзахад йӕ тыхы кӕй бацыд, уый»+.  Ӕмӕ ӕхсӕз боны фӕстӕ Йесо йемӕ акодта Петры, Иаковы ӕмӕ Иоанны ӕмӕ семӕ бӕрзонд хохмӕ ссыд. Уым сӕ разы йӕ хуыз аивта+,  ӕмӕ йӕ дарӕс фестад урс-урсид – зӕххыл ӕй иу гӕрзтӕхсӕг дӕр афтӕ не сурс кодтаид+.  Сӕ разы ма февзӕрдысты Илийа ӕмӕ Моисей дӕр, ӕмӕ Йесоимӕ ныхас кодтой+.  Уӕд дын Петр Йесомӕ фӕцырд ӕмӕ йын афтӕ: «Ахуыргӕнӕг, мӕнӕ нын цы хорз у ам! Цӕй ӕмӕ ам ӕртӕ цатыры ӕрӕвӕрӕм: иу дӕуӕн, иу Моисейӕн, иу та Илийайӕн»+.  Петр, ӕндӕр цы загътаид, уый нӕ зыдта, уымӕн ӕмӕ тынг фӕтарстысты.  Уӕд фӕзынд мигъ, ӕрӕмбӕрзта сӕ, ӕмӕ мигъӕй райхъуыст хъӕлӕс+: «Ай у мӕ уарзон Фырт+. Хъусут ӕм»+.  Фӕлӕ сӕ алыварс куы акастысты, уӕд дзы Йесойы йеддӕмӕ никӕйуал федтой+.  Хохӕй куы ’рцӕйцыдысты, уӕд сын тынг ныффӕдзӕхста, зӕгъгӕ, цалынмӕ Адӕймаджы Фырт мӕрдтӕй нӕ райгас уа, уӕдмӕ+, цы федтат, уый макӕмӕн радзурут+. 10  Уыдон ын йӕ ныхӕстӕ сӕ зӕрдыл бадардтой, фӕлӕ кӕрӕдзи фарстой, цымӕ йӕ цы зӕгъын фӕндыд, мӕрдтӕй райгас уыдзӕн, зӕгъгӕ, уымӕй. 11  Ӕмӕ йӕ бафарстой: «Чиныджыдӕснытӕ та афтӕ цӕмӕн дзурынц, раздӕр уал, дам, хъуамӕ Илийа+ ӕрцӕуа?»+ 12  Уый сын дзуапп радта: «Илийа бӕгуыдӕр ӕрцӕудзӕн ӕмӕ ӕппӕт дӕр фӕстӕмӕ йӕ къахыл слӕууын кӕндзӕн+. Фӕлӕ Адӕймаджы Фырты тыххӕй афтӕ фыст цӕмӕн у, зӕгъгӕ, бавзардзӕн бирӕ хъизӕмӕрттӕ+ ӕмӕ йӕ ницӕйагыл банымайдзысты?+ 13  Ӕз та уын зӕгъын: Илийа+ ӕрцыд, ӕмӕ сӕ цыдӕриддӕр фӕндыд, уый йын бакодтой, фыст куыд у, раст афтӕ»+. 14  Йӕ иннӕ ахуыргӕнинӕгтӕ кӕм уыдысты, уырдӕм куы фӕцӕйхӕццӕ кодтой, уӕд федтой, сӕ алыварс дуне адӕм кӕй ӕрӕмбырд ӕмӕ чиныджыдӕснытӕ семӕ цӕуылдӕр кӕй быцӕу кӕнынц+. 15  Адӕм Йесойы куы ауыдтой, уӕд ныддис кодтой, базгъордтой йӕм ӕмӕ йын дзырдтой, ӕгас нӕм цу, зӕгъгӕ. 16  Йесо сӕ бафарста: «Цӕуыл быцӕу кӕнут семӕ?» 17  Адӕмӕй йын иу дзуапп радта: «Ахуыргӕнӕг, ӕз дӕм ӕрбакодтон мӕ фырты – дӕлимон ӕй уӕгъд нӕ уадзы, багомыг ӕй кодта+. 18  Кӕм ӕй ӕрцахсы, уым ӕй зӕххыл ныццӕвы, ӕмӕ лӕппуйӕн йӕ комы фынк акӕлы, йӕ дӕндӕгты хъыррыст ссӕуы ӕмӕ бауадзыг вӕййы. Гъемӕ дӕ ахуыргӕнинӕгтӕн загътон, цӕмӕй дзы дӕлимоны расурой, фӕлӕ сӕ бон нӕ баци»+. 19  Уӕд Йесо загъта: «О ацы ӕнӕуырнӕг фӕлтӕр+, цас ма уыдзынӕн уемӕ? Цас ма уын быхсдзынӕн? Ӕрбакӕнут-ма мӕм ӕй»+. 20  Ӕмӕ йӕм ӕй ӕрбакодтой. Фӕлӕ куыддӕр дӕлимон Йесойы ауыдта, афтӕ лӕппуйы ныууыгъта. Лӕппу зӕххыл ӕрхауд ӕмӕ, йӕ комы фынк калгӕйӕ, ратул-батул кодта+. 21  Уӕд ын Йесо йӕ фыды афарста: «Рагӕй у афтӕ?» Уый йын дзуапп радта: «Йӕ гыццылӕй нырмӕ. 22  Дӕлимон ӕй цал ӕмӕ цал хатты хъавыд бабын кӕнынмӕ: куы йӕ арты баппары, куы та – доны+. Фӕлӕ кӕд дӕ бон у исты саразын, уӕд нын фӕтӕригъӕд кӕн ӕмӕ нын баххуыс кӕн». 23  Йесо йын загъта: «Кӕд дӕ бон у, зӕгъыс? Кӕй уырны, уымӕн алцыдӕр у йӕ бон»+. 24  Уӕд сывӕллонӕн йӕ фыд уыциу хъӕр фӕкодта: «Уырны мӕ! Уырнындзинад мын кӕм нӕ фаг кӕны, уым та мын ыл бафтау»+. 25  Йесо уый куы федта, ӕмӕ сӕм адӕм ӕрбазгъорынц, уӕд дӕлимонӕн карзӕй загъта+: «Уӕртӕ дӕлимон, адӕймаджы ӕгомыг ӕмӕ къуырма чи кӕны! Зӕгъын дын: ныууадз ӕй ӕмӕ дзы макуыуал бацу». 26  Ӕмӕ дӕлимон ныхъхъӕр кодта, лӕппуйы ныууыгъта, ӕмӕ дзы рацыд+. Лӕппу та мардау фӕци, ӕмӕ уӕд бирӕтӕ загътой: «Амарди!» 27  Фӕлӕ йын Йесо йӕ къух райста, схӕцыд ыл, ӕмӕ лӕппу сыстад+. 28  Хӕдзармӕ куы бацыдысты, уӕд Йесойы йӕ ахуыргӕнинӕгтӕ хибарӕй бафарстой: «Махӕн ӕй нӕ бон цӕуылнӕ баци расурын?»+ 29  Уый сын загъта: «Ацы мыггаг фӕсурынӕн кувын йеддӕмӕ ницы баххуыс кӕндзӕн»+. 30  Уырдыгӕй сӕ фӕндаг акодтой Галилейӕйыл, фӕлӕ Йесойы нӕ фӕндыд, цӕмӕй, уым кӕй ис, уый исчи базыдтаид, 31  уымӕн ӕмӕ йӕ ахуыргӕнинӕгтӕн ӕмбарын кодта: «Адӕймаджы Фырты ратдзысты адӕмы къухтӕм, ӕмӕ йӕ уыдон амардзысты+. Ӕмӕ йӕ кӕд амардзысты, уӕддӕр ӕртыккаг бон* райгас уыдзӕн»+. 32  Фӕлӕ йын уыдон йӕ ныхӕстӕ не ’мбӕрстой, бафӕрсын та йӕ нӕ уӕндыдысты+. 33  Уӕдмӕ ӕрбахӕццӕ сты Капернауммӕ. Ӕмӕ хӕдзармӕ куы бацыдысты, уӕд сӕ Йесо бафарста: «Фӕндагыл та цӕуыл дзырдтат?»+ 34  Уыдон ныхъхъус сты, уымӕн ӕмӕ фӕндагыл дзырдтой, уӕлдӕр сӕ чи у, ууыл+. 35  Уӕд Йесо ӕрбадти, фӕдзырдта йӕ дыууадӕс ахуыргӕнинагмӕ ӕмӕ сын загъта: «Кӕй фӕнды, ӕмӕ фыццаг уа, уый хъуамӕ уа ӕппӕты фӕстаг ӕмӕ хъуамӕ се ’ппӕтӕн дӕр лӕггад кӕна»+. 36  Стӕй сын сӕ астӕу гыццыл сывӕллоны ӕрлӕууын кодта, ӕрбахъӕбыс ӕй кодта ӕмӕ сын загъта+: 37  «Ахӕм сывӕллӕттӕй иуы мӕ номы тыххӕй чи суазӕг кӕна, уый суазӕг кӕндзӕн мӕн дӕр. Ӕмӕ мӕн чи суазӕг кӕна, уый та ӕрмӕст мӕн не суазӕг кӕндзӕн, фӕлӕ, мӕн чи рарвыста, уый дӕр»+. 38  Уӕд ын Иоанн афтӕ: «Ахуыргӕнӕг, мах федтам, дӕ номӕй хӕйрӕджыты чи суры, иу ахӕм адӕймаджы. Ӕмӕ йын загътам, цӕмӕй афтӕ мауал кӕна+, уымӕн ӕмӕ махӕй нӕу»+. 39  Йесо та загъта: «Уадзут ӕй. Мӕ номӕй диссаг* чи сараза, уый ӕвиппайды мӕн ӕфхӕрынмӕ нӕ фӕуыдзӕн+. 40  Нӕ ныхмӕ чи нӕу, уый нӕ фарс у+. 41  Ӕмӕ уын, Чырыстийы кӕй стут+, уый тыххӕй доны къус+ чи бадара, уыцы адӕймаг, ӕцӕг уын зӕгъын, ӕнӕ хӕрзиуӕгӕй нӕ баззайдзӕн. 42  Фӕлӕ, мӕныл чи ӕууӕнды, уыцы гыццылтӕй иуы дӕр чи фӕрӕдийын кӕна*, уымӕн та хуыздӕр уаид, йӕ хъуырыл ын куыройыдур* куы бакӕниккой ӕмӕ йӕ денджызы куы ныппариккой+. 43  Дӕ къух дӕ куы рӕдийын кӕна*, уӕд ӕй ралыг кӕн. Цӕйнӕфӕлтау дыууӕ къухимӕ гееннӕмӕ* – ахуыссӕн кӕмӕн нӕй, уыцы артмӕ – бахауай, фӕлтау ӕнӕ къухӕй бацу цардмӕ+. 44  * – – 45  Дӕ къах дӕ куы рӕдийын кӕна, уӕд уый дӕр ралыг кӕн. Цӕйнӕфӕлтау дӕ дыууӕ къахимӕ гееннӕйы ныппарой+, фӕлтау ӕнӕ къахӕй бацу цардмӕ+. 46  * – – 47  Ӕмӕ дӕ дӕ цӕст куы рӕдийын кӕна, уӕд ӕй скъах+. Фӕлтау Хуыцауы паддзахадмӕ сохъхъырӕй бацу, цӕйнӕфӕлтау дӕ дыууӕ цӕстимӕ гееннӕйы ныппарой+. 48  Уым сӕ кӕлмытӕ нӕ мӕлынц ӕмӕ дзы арт нӕ хуыссы+. 49  Ахӕм адӕмыл Хуыцау, цӕхх ныккалӕгау+, ныккалдзӕни зынг. 50  Цӕхх хорз у, фӕлӕ йӕ тых куы фесӕфа, уӕд ма йын йӕхи та цӕмӕй сцӕхджын кӕндзынӕ?+ Цӕххъуаг ма ут+, ӕмӕ уӕ кӕрӕдзиимӕ хӕларӕй цӕрут»+.

Фиппаинӕгтӕ

Комк. «ӕртӕ боны фӕстӕ».
Комк. «хъомысджын хъуыддӕгтӕ».
Комк. «чи фӕкӕлын кӕна».
Кӕс Мф 18:6, фип.
Комк. «фӕкӕлыны хос куы уа». Кӕс 45, 47 ст. дӕр.
Кӕс Уӕлӕмх. 9.
Кӕс Мф 17:21, фип.
Кӕс Мф 17:21, фип.