Сӕйраг ӕрмӕгмӕ рахиз

Сӕргӕндтӕм рахиз

Йегъовӕйы Ӕвдисӕнтӕ

Ӕвзаг равзар ирон

Колоссӕгтӕм 2:1—23

2  Фӕнды мӕ, цӕмӕй йӕ ӕмбарат, сымах тыххӕй ӕмӕ, Лаодикийы+ чи ис, стӕй мӕ чи никуы федта, ӕппӕт уыдоны тыххӕй куыд зӕрдиагӕй тох кӕнын+,  цӕмӕй сӕ зӕрдӕтӕ бафидар уой+ ӕмӕ сӕ цӕмӕй уарзондзинад уыцы ӕмхуызонӕй бӕтта кӕрӕдзийыл+. Афтӕмӕй сӕ къухы бафтдзӕн стыр хъӕздыгдзинӕдтӕ – фидарӕй зондзысты, рӕстдзинад* раст кӕй ӕмбарынц+, ӕмӕ бӕлвырдӕй зондзысты Хуыцауы сусӕгдзинад, ома Чырыстийы+.  Уый мидӕг ӕмбӕхст сты зонд ӕмӕ зонындзинӕдты+ ӕппӕт хӕзнатӕ дӕр.  Уыдӕтты тыххӕй та уын уымӕн дзурын, цӕмӕй уӕ рӕсугъд ныхӕстӕй мачи асайа+.  Ӕмӕ кӕд мӕхӕдӕг уемӕ нӕ дӕн, уӕддӕр мӕ зӕрдӕ+ уемӕ ис, ӕмӕ цин кӕнын, цы уаг ӕмӕ уӕм цы ӕгъдау ис+ ӕмӕ Чырыстийыл куыд фидарӕй ӕууӕндут+, ууыл.  Гъемӕ уӕдӕ, нӕ Хицау Йесо Чырыстийыл куыд баууӕндыдыстут, афтӕ дарддӕр дӕр йӕ коммӕ кӕсут+.  Стӕй уӕ куыд сахуыр кодтой, афтӕ йӕ мидӕг уидӕгтӕ ауадзут+, ууыл рӕзут+ ӕмӕ уырнындзинады ӕрфидар ут+, ӕмӕ Хуыцауӕн куы фӕарфӕ кӕнут+, уӕд-иу уӕ зӕрдӕтӕ дзаг уӕнт уырнындзинадӕй.  Уӕхи хъахъхъӕнут, цӕмӕй уӕ зондджын ныхӕстӕй*+ ӕмӕ хинӕйбыд, афтид ахуырӕдтӕй+ мачи асайа+ ӕмӕ уӕ ма ӕрцахса. Уыдӕттӕ Чырыстийы ахуырадыл не ’нцайынц, фӕлӕ адӕймаджы ӕрымысгӕ ӕгъдӕуттыл ӕмӕ ацы дунейы уагӕвӕрдтыл+.  Хуыцауы+ миниуджытӕ+ иууылдӕр+ Чырыстийы мидӕг сты ӕмӕ уый мидӕг зынынц. 10  Уӕдӕ Чырыстийы фӕрцы, ӕппӕт хицауӕдтӕ ӕмӕ сӕргълӕуджытӕ дӕр кӕй дӕлбар сты+, уый фӕрцы сымах цух ницӕмӕй стут. 11  Йемӕ иудзинады кӕй стут+, уый фӕрцы сымах дӕр сунӕтгонд ӕрцыдыстут+, ӕмӕ уый адӕймаджы къухӕй конд нӕ уыд+. Уӕ сунӕт у, уӕ тӕригъӕдджын буарӕй кӕй фервӕзтыстут, уый, Чырыстийы лӕггадгӕнджытӕ куыд хъуамӕ уой сунӕтгонд, афтӕ. 12  Хуыцау уӕ Чырыстиимӕ баныгӕдта, уый цы аргъуыд райста, ахӕм аргъуыды уылты+. Ӕмӕ уӕ Хуыцау йемӕ мӕрдтӕй дӕр райгас кодта+, чи йӕ райгас кодта+, уыцы Хуыцауы хъомысджын хъуыддӕгтыл+ кӕй ӕууӕндут+, уый фӕрцы. 13  Стӕй кӕд уӕ тӕригъӕдты аххосӕй ӕмӕ, сунӕтгонд кӕй нӕ уыдыстут, уый аххосӕй мард уыдыстут, уӕддӕр уын Хуыцау йемӕ иумӕ цард радта+. Йӕ хӕларзӕрдӕйӕ нын нӕ тӕригъӕдтӕ иууылдӕр ныххатыр кодта+ 14  ӕмӕ, алыхуызон фӕдзӕхстытӕ+ кӕм уыди ӕмӕ нӕ ныхмӕ чи дзырдта+, уыцы закъоны+ ныхӕстӕ сыхӕлдта+. Уыцы закъон ныххуыдта+ хъизӕмӕртты хъӕдыл+ ӕмӕ йӕ афтӕмӕй нӕ фӕндагӕй айста. 15  Уый хицауӕдты ӕмӕ сӕргълӕуджыты+ сбӕгънӕг кодта ӕмӕ сӕ йӕ уӕлахизы цыды+ се ’ппӕты размӕ ракодта+ – уый сыл фӕуӕлахиз хъизӕмӕртты хъӕды фӕрцы. 16  Ӕмӕ уын уӕдӕ мачи мацы дзурӕд+ хӕрд ӕмӕ нозты+ тыххӕй, кӕнӕ бӕрӕгбон+, кӕнӕ ног мӕй+, кӕнӕ сабат+ бӕрӕг кӕныны тыххӕй. 17  Уыдӕттӕ иууылдӕр сты фидӕны хорздзинӕдтӕн сӕ аууон+, хорздзинӕдтӕ*+ сӕхӕдӕг та Чырыстиимӕ+ баст сты. 18  Йӕхи иннӕты цӕстмӕ сӕрныллӕгӕй ӕвдисын ӕмӕ зӕдтӕн табу кӕнын* чи уарзы, ӕмӕ, цытӕ федта, уыдӕттыл «фидар чи хӕцы»*, уыдонӕй уӕ уӕ хӕрзиуӕгӕй+ ӕнӕхай мачи фӕкӕнӕд+. Зӕххон зондӕй кӕй архайынц, уымӕ гӕсгӕ сӕ сӕр бӕрзӕндты хӕссынц, цӕмӕй нӕ хъӕуы, уымӕй, 19  ӕмӕ, сӕр чи у, ууыл фидар нӕ хӕцынц+ – ӕмӕ буар та ӕгасӕй дӕр уый фӕрцы исы, цы йӕ хъӕуы, уый ӕмӕ уый фӕрцы нуӕрттӕ ӕмӕ уӕнгбӕттӕнты руаджы ӕмхуызонӕй хӕцы кӕрӕдзийыл+ ӕмӕ рӕзы Хуыцауы фӕндӕй+. 20  Кӕд ацы дунейы+ уагӕвӕрдтӕн+ Чырыстиимӕ амардыстут+, уӕд ма дарддӕр, цыма ацы дунейӕ стут, афтӕ цӕмӕн цӕрут ӕмӕ цӕмӕн хъусут ахӕм фӕдзӕхстытӕм+, зӕгъгӕ, 21  ма райс, ма бахӕр+, ма бавнал?+ 22  Афтӕтӕ цӕмӕй дзурынц, уыдӕттӕ нал вӕййынц, куы сӕ бахӕрынц, уӕд. Уыдон иууылдӕр сты адӕмы ӕрымысгӕ фӕдзӕхстытӕ ӕмӕ ахуырӕдтӕ+. 23  Уыдӕттӕ чи кӕны, уыдон Хуыцауӕн кувынц, сӕхи куыд фӕнды, афтӕ, сӕхи иннӕты цӕстмӕ сӕрныллӕгӕй ӕвдисынц, сӕхи хъизӕмарӕй марынц*+, ӕмӕ зондджын бӕргӕ зынынц, фӕлӕ сын уыцы фӕдзӕхстытӕ тӕригъӕдджын буары монцтимӕ тох кӕнынӕн ницы ӕххуыс сты+.

Фиппаинӕгтӕ

Кӕнӕ «ӕцӕгдзинад».
Комк. «философитӕй».
Комк. «буар».
Кӕнӕ «зӕдтӕ куыд табу кӕнынц, уый».
Кӕнӕ «уыдӕттыл чи ӕрлӕууыд; чи бакъахдзӕф кодта». Ацы ныхӕстӕ-иу дзырдтой, муртакк сусӕг дины къордтӕ-иу сӕхимӕ искӕй куы истой, уӕд.
Комк. «сӕ буар бадомынц».