Сӕйраг ӕрмӕгмӕ рахиз

Сӕргӕндтӕм рахиз

Йегъовӕйы Ӕвдисӕнтӕ

Ӕвзаг равзар ирон

Данел 3:1—30

3  Паддзах Навуходоносор скодта сызгъӕрин гуымиры+. Йӕ бӕрзӕнд уыд ӕхсай ӕлмӕрины*, йӕ фӕтӕн та – ӕхсӕз ӕлмӕрины*. Ӕмӕ йӕ сӕвӕрдта Деиры дӕлвӕзы, Вавилоны дӕлбар бӕстӕйы+.  Паддзах Навуходоносор арвыста сатраптӕм*, сӕргълӕуджытӕм+, хицӕуттӕм, уынаффӕгӕнджытӕм, хӕзнадонгӕстӕм, тӕрхонгӕнджытӕм, цӕстдарджытӕм+ ӕмӕ дӕлбар бӕстӕты хицӕуттӕм се ’ппӕтмӕ дӕр, цӕмӕй ӕрбацыдаиккой, паддзах Навуходоносор кӕй сӕвӕрдта, уыцы гуымиры нывонд кӕныны бӕрӕгбонмӕ+.  Ӕмӕ сатраптӕ+, сӕргълӕуджытӕ, хицӕуттӕ, уынаффӕгӕнджытӕ, хӕзнадонгӕстӕ, тӕрхонгӕнджытӕ, цӕстдарджытӕ ӕмӕ дӕлбар бӕстӕты хицӕуттӕ се ’ппӕт дӕр ӕрӕмбырд сты, паддзах Навуходоносор кӕй сӕвӕрдта, уыцы гуымиры нывонд кӕныны бӕрӕгбонмӕ. Ӕмӕ ӕрлӕууыдысты, Навуходоносор кӕй сӕвӕрдта, уыцы гуымирыйы раз.  Ӕмӕ фидиуӕг+ хъӕрӕй фехъусын кодта: «О адӕмтӕ, алыхуызон адӕмыхӕттытӕй чи у ӕмӕ алыхуызон ӕвзӕгтыл чи дзуры,– уе ’ппӕт дӕр байхъусут!+  Куыддӕр фехъусат сыкъайы ӕмӕ уадындзы уаст, цитрӕйы, ӕртӕтигъон хъисфӕндыры, ӕнӕуи хъисфӕндыры, лалым-уадындзы ӕмӕ алыхуызон музыкалон инструментты цагъд+, афтӕ хъуамӕ уӕ зонгуытыл ӕрхауат ӕмӕ, паддзах Навуходоносор кӕй сӕвӕрдта, уыцы сызгъӕрин гуымирыйӕн бакуват.  Йӕ зонгуытыл чи не ’рхауа ӕмӕ йын чи нӕ бакува+, уый та уайтагъд+ судзгӕ пецы ӕппӕрст ӕрцӕудзӕн»+.  Гъемӕ сыкъайы ӕмӕ уадындзы уаст, цитрӕйы, ӕртӕтигъон хъисфӕндыры, ӕнӕуи хъисфӕндыры ӕмӕ алыхуызон музыкалон инструментты цагъд куы райхъуыст, уӕд адӕмтӕ иууылдӕр+, алыхуызон адӕмыхӕттытӕй чи уыд ӕмӕ алыхуызон ӕвзӕгтыл чи дзырдта, уыдон се ’ппӕт дӕр сӕ зонгуытыл ӕрхаудтой ӕмӕ, паддзах Навуходоносор кӕй сӕвӕрдта, уыцы сызгъӕрин гуымирыйӕн бакуывтой.  Уӕд халдейтӕй чидӕртӕ паддзахмӕ бацыдысты ӕмӕ райдыдтой дзуттӕгты ныхмӕ дзурын+.  Уыдон паддзах Навуходоносорӕн загътой: «О паддзах, ӕнустӕм цӕр!+ 10  О паддзах, ды радтай бардзырд, зӕгъгӕ, сыкъайы ӕмӕ уадындзы уаст, цитрӕйы, ӕртӕтигъон хъисфӕндыры, ӕнӕуи хъисфӕндыры, лалым-уадындзы ӕмӕ алыхуызон музыкалон инструментты цагъд+ чидӕриддӕр фехъуса, уый хъуамӕ йӕ зонгуытыл ӕрхауа ӕмӕ сызгъӕрин гуымирыйӕн бакува, 11  йӕ зонгуытыл чи не ’рхауа ӕмӕ йын чи нӕ бакува, уый та баппардзысты судзгӕ пецы+. 12  Фӕлӕ дзуттӕгтӕй чидӕртӕ, Вавилоны дӕлбар бӕстӕйы+ хъуыддӕгтӕ кӕй бар бакодтай, уыдон, ома Седрах, Мисах ӕмӕ Авденаго, дӕу, о паддзах, ницӕмӕ дарынц, дӕ хуыцӕуттӕн дын нӕ лӕггад кӕнынц ӕмӕ, цы сызгъӕрин гуымиры сӕвӕрдтай, уымӕн нӕ кувынц»+. 13  Уӕд Навуходоносор мӕстӕй рафыхт+ ӕмӕ загъта, цӕмӕй Седрах, Мисах ӕмӕ Авденагойы ӕрбакодтаиккой+. Гъемӕ сӕ паддзахмӕ ӕрбакодтой. 14  Навуходоносор сӕ бафарста: «Седрах! Мисах! Авденаго! Уый ӕцӕг у, мӕ хуыцӕуттӕн мын кӕй нӕ лӕггад кӕнут+ ӕмӕ, цы сызгъӕрин гуымиры сӕвӕрдтон, уымӕн кӕй нӕ кувут?+ 15  Уӕдӕ ныр, кӕд цӕттӕ стут ӕмӕ кӕд сыкъайы ӕмӕ уадындзы уаст, цитрӕйы, ӕртӕтигъон хъисфӕндыры, ӕнӕуи хъисфӕндыры, лалым-уадындзы ӕмӕ алыхуызон музыкалон инструментты цагъд+ фехъусгӕйӕ уӕ зонгуытыл ӕрхауат ӕмӕ, цы гуымиры сӕвӕрдтон, уымӕн бакуват, уӕд хорз. Фӕлӕ йын куы нӕ бакуват, уӕд уайтагъд ӕппӕрст ӕрцӕудзыстут судзгӕ пецы. Ӕмӕ уӕ уӕд мӕ къухӕй кӕцы хуыцау фервӕзын кӕндзӕн?»+ 16  Седрах, Мисах ӕмӕ Авденаго паддзахӕн загътой: «О Навуходоносор, цы ма дын зӕгъӕм?+ 17  Афтӕ куы уа, уӕд, мах кӕмӕн лӕггад кӕнӕм, уыцы Хуыцауӕн йӕ бон у, ӕмӕ нӕ фервӕзын кӕна. Уый нӕ судзгӕ пецӕй дӕр ӕмӕ дӕ къухӕй дӕр, о паддзах, фервӕзын кӕндзӕн+. 18  Ӕмӕ кӕд нӕ, уӕддӕр ӕй зон, о паддзах, мах дӕ хуыцӕуттӕн нӕ лӕггад кӕнӕм, ӕмӕ цы сызгъӕрин гуымиры сӕвӕрдтай, уымӕн нӕ бакувдзыстӕм»+. 19  Уӕд Навуходоносор Седрах, Мисах ӕмӕ Авденагомӕ мӕстӕй рафыхт, йӕ цӕсгомы хуыз фендӕрхуызон. Ӕмӕ бардзырд радта, цӕмӕй пец, куыд-иу ӕй стӕвд кодтой, уымӕй авд хатты тынгдӕр стӕвд кодтаиккой. 20  Ӕмӕ йе ’фсадӕй цалдӕр тыхджын+ лӕгӕн бардзырд радта, цӕмӕй Седрах, Мисах ӕмӕ Авденагойы сбастаиккой ӕмӕ сӕ судзгӕ пецы баппӕрстаиккой+. 21  Уыдон дӕр сӕ сбастой – сӕ пӕлӕзтӕ, сӕ дзаумӕттӕ, сӕ худтӕ ӕмӕ ма сыл цы уыд, уыдӕттӕ сӕ уӕлӕ, афтӕмӕй,– ӕмӕ сӕ судзгӕ пецы баппӕрстой. 22  Паддзахы ныхас карз кӕй уыди ӕмӕ пец тынг кӕй стӕвд кодтой, уымӕ гӕсгӕ, Седрах, Мисах ӕмӕ Авденагойы пецы чи баппӕрста, уыдоны арт басыгъта ӕмӕ амардысты. 23  Уыцы ӕртӕ лӕппуйы та, Седрах, Мисах ӕмӕ Авденаго, бастӕй ныххаудтой судзгӕ пецы астӕумӕ+. 24  Уӕд паддзах Навуходоносор фӕтарст, йӕ бынатӕй фестад ӕмӕ йӕ хистӕр фӕсдзӕуинтӕн загъта: «Артмӕ ӕртӕ баст лӕджы нӕ баппӕрстам?»+ Уыдон ын дзуапп радтой: «О, афтӕ уыд, паддзах». 25  Ӕмӕ сын уӕд уый загъта: «Ӕмӕ дзы ӕз цыппар лӕджы куы уынын! Арты астӕу сӕрибарӕй рацу-бацу кӕнынц ӕмӕ сын арт ӕппындӕр ницы кӕны. Цыппӕрӕм бакастӕй у хуыцӕутты фырты хуызӕн»+. 26  Навуходоносор судзгӕ пецы дуармӕ бацыд+ ӕмӕ загъта: «Седрах! Мисах! Авденаго! Иунӕг Стыр Хуыцауы лӕггадгӕнджытӕ!+ Рахизут ӕмӕ ардӕм рацӕут!» Ӕмӕ уӕд Седрах, Мисах ӕмӕ Авденаго артӕй рахызтысты. 27  Ӕмӕ, уым чи ӕрӕмбырд, уыцы сатраптӕ, сӕргълӕуджытӕ, хицӕуттӕ+ ӕмӕ паддзахы фӕсдзӕуинтӕ федтой, арт уыцы ӕртӕ лӕгӕн кӕй ницы зиан ракодта+, сӕ сӕрыхъуынтӕй+ сын иу дӕр кӕй нӕ ацарыдта, сӕ уӕлӕдарӕс ӕндӕрхуызон дӕр кӕй нӕ фӕци, ӕмӕ сӕ арты тӕф дӕр кӕй нӕ калд. 28  Уӕд Навуходоносор загъта: «Табу Седрах, Мисах ӕмӕ Авденагойы+ Хуыцауӕн, йӕ зӕды+ чи рарвыста ӕмӕ йӕ лӕггадгӕнджыты чи фервӕзын кодта! Уыдон ыл сӕ зӕрдӕ дардтой+ ӕмӕ паддзахы ныхасы сӕрты дӕр ахызтысты ӕмӕ мӕлӕтмӕ дӕр цӕттӕ уыдысты, уымӕн ӕмӕ уыдон сӕ Хуыцауы йеддӕмӕ ӕндӕр никӕцы хуыцауӕн фӕндыд+ лӕггад кӕнын+ ӕмӕ кувын+. 29  Уӕдӕ ӕз дӕттын ахӕм бардзырд+: Седрах, Мисах ӕмӕ Авденагойы Хуыцауы ныхмӕ исты чи зӕгъа – кӕцыфӕнды адӕмӕй ӕмӕ кӕцыфӕнды адӕмыхаттӕй ма уа ӕмӕ цыфӕнды ӕвзагыл ма дзура,– уый хъуамӕ ныкъкъуыхтӕ кӕной+, ӕмӕ йын йӕ хӕдзарӕй та хъуамӕ саразой уазӕгдон*+, уымӕн ӕмӕ нӕй ӕндӕр ахӕм хуыцау, афтӕ ирвӕзын кӕнын йӕ бон кӕмӕн у!»+ 30  Ӕмӕ паддзахы фӕрцы Седрах, Мисах ӕмӕ Авденагойӕн Вавилоны дӕлбар бӕстӕйы уыди стыр кад+.

Фиппаинӕгтӕ

27 м бӕрц.
2,7 м бӕрц. Иу ӕлмӕрин у 44,5 см.
Афтӕ хуыдтой дӕлбар бӕстӕты сӕйраг хицӕутты.
Кӕнӕ «къахӕвӕрӕн».