Дыккаг закъон 10:1—22
10 Уыцы рӕстӕг мын Йегъовӕ загъта: „Райс дыууӕ дуры ӕмӕ сӕ слӕгъз кӕн, фыццаг дыууӕ къӕйдуры хуызӕн куыд уой, афтӕ+, ӕмӕ мӕм хохмӕ ссу. Стӕй-иу сараз хъӕдын чырын*+ дӕр.
2 Къӕйдуртыл ӕз ныффысдзынӕн, кӕй ныппырх кодтай, уыцы къӕйдуртыл цы ныхӕстӕ уыди фыст, уыдон. Ӕмӕ-иу сӕ стӕй бадзырды чырыны сӕвӕр“.
3 Гъемӕ ӕз дӕр акъацийӕ чырын сарӕзтон. Слӕгъз кодтон дыууӕ дуры – уыдысты фыццаг къӕйдурты хуызӕн+, ӕмӕ хохмӕ ссыдтӕн, мемӕ ахастон уыцы дыууӕ къӕйдуры дӕр.
4 Ӕмӕ Хуыцау къӕйдуртыл ныффыста, фыццӕгтыл фыст чи уыди, уыцы ныхӕстӕ+ – Дӕс дзырды*+, уе ’ппӕт дӕр хохы раз куы ӕрӕмбырд стут+, уыцы бон уын Йегъовӕ хохыл арты астӕуӕй+ кӕй загъта, уыцы ныхӕстӕ. Уый фӕстӕ Йегъовӕ къӕйдуртӕ мӕнмӕ радта.
5 Ӕмӕ хохӕй куы ӕрхызтӕн+, уӕд къӕйдуртӕ сӕвӕрдтон, кӕй сарӕзтон, уыцы чырыны, цӕмӕй уым уой, Йегъовӕ мын куыддӕриддӕр загъта, афтӕ+.
6 Израилы фырттӕ Беероф-Бене-Иаканӕй+ ацыдысты Мозермӕ. Уым Аарон амард, ӕмӕ йӕ уым баныгӕдтой+. Ӕмӕ йӕ бӕсты сауджын сси йӕ фырт Елеазар+.
7 Уырдыгӕй ацыдысты Гудгодмӕ, Гудгодӕй та – Иотвафӕмӕ+, йӕ дӕлвӕзты дон кӕмӕн кӕлы, уыцы зӕхмӕ.
8 Уыцы рӕстӕг Йегъовӕ рахицӕн кодта Левийы+ мыггаг, цӕмӕй Йегъовӕйы бадзырды чырын хӕссой+, Йегъовӕйы раз лӕууой ӕмӕ йын лӕггад кӕной+, стӕй йӕ номӕй адӕмӕн арфӕ кӕной, ӕмӕ афтӕ у абоны онг дӕр+.
9 Левийы мыггагӕн уый тыххӕй нӕй хай ӕмӕ бынтӕ+ йе ’фсымӕртимӕ. Йегъовӕ у сӕ бынтӕ, уӕ Хуыцау Йегъовӕ сын куыддӕриддӕр загъта, афтӕ+.
10 Ӕмӕ та хохыл раздӕрау фӕдӕн цыппор боны ӕмӕ цыппор ӕхсӕвы+, ӕмӕ та мӕм Йегъовӕ ацы хатт дӕр байхъуыста+. Йегъовӕйы нӕ бафӕндыд уӕ фесафын+.
11 Уый фӕстӕ мын Йегъовӕ загъта: „Адӕмӕн сӕ разӕй ацу, цӕмӕй, сӕ фыдӕлтӕн кӕй тыххӕй расомы кодтон, ратдзынӕн уын ӕй, зӕгъгӕ, уыцы зӕхмӕ бацӕуой ӕмӕ йӕ бацахсой“+.
12 О Израил, дӕ Хуыцау Йегъовӕ дӕм цӕмӕ ӕнхъӕлмӕ кӕсы?+ Цӕмӕй дӕ Хуыцау Йегъовӕйӕ тӕрсай+, йе ’ппӕт фӕндӕгтыл ын цӕуай+, уарзай+ йӕ, дӕ Хуыцау Йегъовӕйӕн ӕппӕт зӕрдӕйӕ ӕмӕ ӕппӕт удӕй лӕггад кӕнай+,
13 ӕххӕст кӕнай Йегъовӕйы фӕдзӕхстытӕ ӕмӕ йӕ уагӕвӕрдтӕ+, ӕз дын абон кӕй хъусын кӕнын, уыдон, цӕмӕй дын уа хорз – ӕндӕр ма дӕм истӕмӕ ӕнхъӕлмӕ кӕсы?+
14 Мӕнӕ, дӕ Хуыцау Йегъовӕйы сты уӕлӕрвтӕ+, суанг арвы кӕрӕттӕ дӕр, зӕхх+ ӕмӕ йыл цыдӕриддӕр ис, уыдон.
15 Йегъовӕйӕн ӕрмӕстдӕр дӕ фыдӕлтӕ систы зынаргъ, уыдоны бауарзта, ӕмӕ сын сӕ байзӕддӕгты+, ома сымах, равзӕрста ӕппӕт адӕмты ’хсӕнӕй, ӕмӕ афтӕ у абон дӕр.
16 Уӕдӕ уӕ зӕрдӕтӕн сунӕт скӕнут+ ӕмӕ хивӕнд мауал ут*+.
17 Уӕ Хуыцау Йегъовӕ у хуыцӕутты Хуыцау+ ӕмӕ хицӕутты Хицау+, адӕймагыл тас чи ’фтауы+, уыцы стыр ӕмӕ хъомысджын Хуыцау. Уый хъулон никӕй кӕны+ ӕмӕ гӕртам нӕ исы+,
18 рӕстӕй тӕрхон кӕны сидзӕрӕн* ӕмӕ идӕдзӕн+, уарзы ӕрцӕуӕггаджы+ ӕмӕ йын дӕтты дзул ӕмӕ уӕлӕдарӕс.
19 Ӕмӕ сымах дӕр хъуамӕ уарзат ӕрцӕуӕггаджы+, уымӕн ӕмӕ уӕхӕдӕг дӕр Египеты зӕххыл ӕрцӕуӕггӕгтӕ уыдыстут+.
20 Хъуамӕ дӕ Хуыцау Йегъовӕйӕ тӕрсай+, хъуамӕ уымӕн лӕггад кӕнай+, хъуамӕ ууыл уай ӕнувыд*+ ӕмӕ уый номӕй сомы кӕнай+.
21 Уый хъуамӕ кадджын кӕнай+, уый у дӕ Хуыцау. Уый дӕу тыххӕй сарӕзта стыр ӕмӕ, адӕймагыл тас чи ’фтауы, ахӕм хъуыддӕгтӕ, ӕмӕ сӕ ды дӕхи цӕстӕй федтай+.
22 Дӕ фыдӕлтӕ Египетмӕ куы ’рцыдысты+, уӕд ӕдӕппӕтӕй уыдысты ӕвдай уды, фӕлӕ уӕ Йегъовӕ, уӕ Хуыцау, сбирӕ кодта ӕмӕ уын ныр, арвыл цы стъалытӕ ис, уыдонау нымӕц дӕр нӕй+.
Фиппаинӕгтӕ
^ Ома дӕс амынды, кӕнӕ Дӕс фӕдзӕхсты.
^ Комк. «уӕ бӕрзӕй мауал хъӕбӕр кӕнут».
^ Комк. «ӕнӕ фыдӕй чи баззад, ахӕм лӕппуйӕн».
^ Комк. «ууыл баныхӕсай».
