Дзуапп Библийӕ

 Хӕйрӕг ӕмӕ дӕлимонтӕн сӕ бар адӕмыл афтӕ тынг цӕуы, ӕмӕ Библийы уый тыххӕй фыст ис: «Ӕгас дуне... ис Фыдбылызы къухы» (1 Иоанны 5:19). Библи нын ӕмбарын кӕны, Хӕйрӕгӕн адӕмыл йӕ бар цавӕр хъуыддӕгты фӕрцы цӕуы, уый.

•   Хинмитӕ. Библи чырыстӕтты фӕдзӕхсы, цӕмӕй «Хӕйрӕджы хинмиты ныхмӕ фидар фӕлӕууой» (Ефесӕгтӕм 6:11). Хӕйрӕг архайы, цӕмӕй адӕмы баууӕндын кӕна, йӕ зондыл чи цӕуы, уыдон Хуыцауы лӕггадгӕнджытӕ кӕй сты, ӕмӕ уый у йӕ хинмитӕй иу (2 Коринфӕгтӕм 11:13–15).

•   Спиритизм. Хӕйрӕг адӕмы сайы, мӕрдтимӕ чи ныхас кӕны, фидӕны цы уыдзӕн, уыдӕттӕ чи дзуры ӕмӕ, дӕсны чи фӕрсы, уыдоны уылты, стӕй астрологийы уылты (Дыккаг закъон 18:10–12). Наркотиктӕ, гипноз ӕмӕ медитаци адӕймагӕн йӕ сӕры магъз схӕццӕ кӕнынц, ӕмӕ уый фӕрцы дӕлимонтӕн адӕймагыл сӕ бар ӕнцонтӕй фӕцӕуы (Лукайы 11:24–26).

•   Мӕнг дин. Мӕнг ахуырӕдтӕ чи парахат кӕны, уыцы динтӕ адӕмы сайынц ӕмӕ сӕ ахӕм зондыл аразынц, цӕмӕй Хуыцауы коммӕ ма кӕсой (1 Коринфӕгтӕм 10:20). Библи уыцы мӕнг ахуырӕдтӕ хоны «хӕйрӕджыты ахуырӕдтӕ» (1 Тимофеймӕ 4:1).

•   Хӕйрӕджытӕ адӕймаджы бацӕуынц. Хӕйрӕджытӕ-иу адӕймаджы куы бацыдысты, уый тыххӕй Библийы ис цалдӕр хабары фыст. Хӕйрӕджыты аххосӕй чи удхар кодта, уыцы адӕмӕй-иу чи куырм уыд, чи ӕгомыг, чидӕртӕ та-иу дзы суанг сӕхицӕн рыст дӕр бавзарын кодтой (Матфейы 12:22; Марчы 5:2–5).

Цы ис саразӕн, цӕмӕй дыл Хӕйрӕджы бар ма цӕуа?

 Дӕлимонтӕ дын зиан кӕй ӕрхӕсдзысты, уымӕй тӕрсын нӕ хъӕуы, уымӕн ӕмӕ нын Библи ӕмбарын кӕны, Хӕйрӕджы ныхмӕ фӕлӕууын нӕ бон куыд у, уый:

•   Хӕйрӕг цы мадзӕлттӕй пайда кӕны, уый базоныныл-иу бацархай, цӕмӕй, «куыд архайы, уый дын ӕнӕзонгӕ ма уа» (2 Коринфӕгтӕм 2:11).

•   Библи ахуыр кӕн ӕмӕ, цы базоныс, уымӕ гӕсгӕ-иу архай. Афтӕ куы кӕнай, уӕд дыл Хӕйрӕджы бар нӕ цӕудзӕн (Ефесӕгтӕм 6:11–18).

•   Хӕйрӕджытимӕ цыдӕриддӕр баст у, уыдӕттӕ фесаф (Хъуыддӕгтӕ 19:19). Уымӕ хауы, спиритизмимӕ баст чи у, ахӕм музыкӕ, чингуытӕ, журналтӕ, плакаттӕ ӕмӕ кинотӕ.