Хеллоуины тыххӕй Библийы ницы ис фыст. Фӕлӕ куыд равзӕрд ӕмӕ йӕ абон куыд фӕбӕрӕг кӕнынц, уымӕй зыны, уыцы бӕрӕгбон баст кӕй у, мӕрдтӕ ӕмӕ ӕнӕуынгӕ тыхты, кӕнӕ хӕйрӕджыты, тыххӕй цы мӕнг ахуырӕдтӕ ис, уыдонимӕ. (Кӕс  «Хеллоуин куыд равзӕрд ӕмӕ цавӕр ӕгъдӕуттимӕ баст у».)

Библи нӕ фӕдзӕхсы: «Уе ’хсӕн хъуамӕ ма уа ахӕм адӕймаг... мӕрдтимӕ чи ныхас кӕны... кӕнӕ мӕрдты чи фӕрсы» (Дыккаг закъон 18:10–12). Кӕд иуӕй-иутӕм афтӕ кӕсы, ӕмӕ Хеллоуин ӕнӕуи хъӕлдзӕг бӕрӕгбон у ӕмӕ дзы ӕвзӕрӕй ницы ис, уӕддӕр Библимӕ гӕсгӕ уый афтӕ нӕу. 1 Коринфӕгтӕм 10:20, 21 стихты фыст ис: «Мӕн... нӕ фӕнды, цӕмӕй уын хӕйрӕджытимӕ иумӕйагӕй исты уа. Уый гӕнӕн нӕй, ӕмӕ Йегъовӕйы нуазӕнӕй дӕр нуазат ӕмӕ хӕйрӕджыты нуазӕнӕй дӕр».

 Хеллоуин куыд равзӕрд ӕмӕ цавӕр ӕгъдӕуттимӕ баст у

1. Самайн. Иу энциклопедийы куыд фыст ис, афтӕмӕй Хеллоуин равзӕрд, «2 000 азы размӕ кельттӕ, бирӕ хуыцӕуттӕн кувӕг адӕм, цы бӕрӕгбон бӕрӕг кодтой, уымӕй. [...] Кельтты уырныдта, мӕрдтӕ удӕгӕсты ’хсӕн дӕр кӕй вӕййынц. Самайны рӕстӕг-иу мӕрдтӕн сӕ бон уыд удӕгӕстимӕ ныхас кӕнын» (The World Book Encyclopedia). Фӕлӕ Библийы комкоммӕ ис фыст, мӕрдтӕ «ӕппындӕр ницы зонынц», зӕгъгӕ (Екклесиаст 9:5). Уӕдӕ мӕрдтӕн сӕ бон нӕу удӕгӕстимӕ ныхас кӕнын.

2. Бӕрӕгбоны дзаумӕттӕ ӕмӕ адджинӕгтӕ курыны ӕгъдау. Иу чиныджы куыд фыст ис, афтӕмӕй кельттӕй иуӕй-иутӕ ахӕм дзаумӕттӕ дардтой, цӕмӕй хӕйрӕджыты хуызӕн уыдаиккой, ӕмӕ-иу сӕ цӕмӕй ӕнӕуынгӕ тыхтӕ сӕхиуӕттыл банымадтаиккой ӕмӕ сын мацы знаггад ракодтаиккой (Halloween—An American Holiday, An American History). Иннӕтӕ та-иу сын нывондӕн исты адджинӕгтӕ хастой, цӕмӕй-иу сын сӕ зӕрдӕ алхӕдтаиккой. Астӕуккаг ӕнусты Европӕйы католикон аргъуан райдыдта, бирӕ хуыцӕуттӕн чи куывта, уыцы адӕмы ӕгъдӕуттӕ ӕххӕст кӕнын ӕмӕ-иу сауджынтӕ адӕмӕн дзырдтой, цӕмӕй-иу Сыгъдӕджыты бӕрӕгбоны хӕдразмӕ адӕмы хӕдзӕрттыл зылдаиккой ӕмӕ-иу сӕ гыццыл лӕвӕрттӕ куырдтаиккой, сӕхӕдӕг та-иу мӕрдты тыххӕй хъуамӕ куывтаиккой. Фӕлӕ Хуыцауӕн дӕр кувын ӕмӕ мӕнг дины ӕгъдӕуттӕ дӕр ӕххӕст кӕнын Библимӕ гӕсгӕ раст нӕу (2 Коринфӕгтӕм 6:17).

3. Ӕндӕргтӕ, вампиртӕ, зомби ӕмӕ ус-бирӕгътӕ. Иу чиныджы куыд фыст ис, афтӕмӕй ацы чидӕртӕ рагӕй фӕстӕмӕ дӕр нымад уыдысты сау тыхтыл (Halloween Trivia). Библийы комкоммӕ фыст ис, ахӕм фыдгӕнӕг ӕнӕуынгӕ тыхтӕн сӕ ныхмӕ кӕй хъуамӕ лӕууӕм, сӕ номыл бӕрӕгбӕттӕ ма кӕнӕм, фӕлӕ (Ефесӕгтӕм 6:12).

4. Настӕ. Иу чиныджы куыд фыст ис, афтӕмӕй-иу Астӕуккаг ӕнусты Великобританийы уыцы бӕрӕгбоны рӕстӕг адӕм «хӕдзӕрттыл зылдысты ӕмӕ-иу хуынтӕ куырдтой, сӕхӕдӕг та-иу уыдоны тыххӕй куывтой». Семӕ-иу хастой, «йӕ хуылф-иу кӕмӕн ныссыгъдӕг кодтой ӕмӕ-иу сӕ мидӕг цырӕгътӕ кӕмӕн сӕвӕрдтой, ахӕм булчъытӕ. Уыцы цырӕгътӕ амыдтой, удсыгъдӕггӕнӕны (чистилище) кӕй дардтой, уыцы мӕрдты удтӕм» (Halloween—From Pagan Ritual to Party Night). Чидӕртӕ та афтӕ дзырдтой, зӕгъгӕ, дам, уыцы цырӕгътӕ сау тыхтӕ тӕрсын кӕнынӕн сты. 19 ӕнусы райдианы Цӕгат Америкӕйы булчъыты бӕсты пайда кӕнын райдыдтой настӕй, уымӕн ӕмӕ сӕ ӕнцондӕр уыд сыгъдӕг кӕнын ӕмӕ дзы цӕстытӕ, фындз ӕмӕ дзых скӕнын. Ацы ӕгъдӕуттӕ баст сты, адӕймагӕн ӕнӕмӕлгӕ уд кӕй ис ӕмӕ удсыгъдӕггӕнӕнмӕ кӕй бахауы, уыцы ахуырӕдтимӕ, стӕй мӕрдты тыххӕй кувыны ӕгъдауимӕ. Уыдӕттӕ та Библимӕ гӕсгӕ раст не сты (Йезекил 18:4).