Перейти к основным материалам

Перейти к содержанию

 14 СӔРГОНД

Хуцау ӕхецӕн адӕм цӕмӕн равзурста?

Хуцау ӕхецӕн адӕм цӕмӕн равзурста?

1. Раги дзамани Хуцау израилӕгти цӕмӕн равзурста?

Хуцау ӕ лӕггадгӕнӕг Авраами байзӕдтӕгтӕй искодта еу адӕмихатт ӕма син закъӕнттӕ равардта. Еци адӕмихатт исхудта «Израил». Етӕ гъӕуама ӕцӕг Хуцауӕн раст кувтайуонцӕ ӕма ин ӕ дзурд ӕнхӕст кодтайуонцӕ (Псалом 147:19, 20). Уотемӕй израилӕгти фӕрци арфӕгонд ӕрцудайуонцӕ, ӕндӕр адӕмихӕттитӕй ка адтӕй, еци адӕм дӕр. Бакӕсӕ Райдайӕн 22:18.

Хуцау израилӕгти уомӕн равзурста, цӕмӕй е ’вдесӕнтӕ адтайуонцӕ. Рагон израилӕгти хабӕрттӕй бӕрӕг ӕй, Хуцауи закъӕнттӕмӕ гӕсгӕ цӕрун цӕйбӕрцӕ растдӕр ӕй, е (Дуккаг закъон 4:6). Израилӕгтӕмӕ кӕсгӕй иннӕ адӕмӕн дӕр сӕ бон адтӕй, ӕцӕг Хуцау ка ӕй, уой базонун. Бакӕсӕ Исай 43:10, 12.

2. Хуцау киристон ӕмбурд цӕмӕн искодта?

Рӕстӕг рацудӕй, ӕма Израили адӕм сӕхе Хуцауи хуарзӕнхӕй фенӕхай кодтонцӕ. Ӕма уӕд Йеговӕ ӕхецӕн ӕндӕр адӕм равзурста – кӕцидӕр адӕмихатт нӕ, фал киристон ӕмбурд (Матфеййи 21:43; 23:37, 38). Ӕма кӕд Йегови ӕвдесӕнтӕ раздӕр израилӕгтӕ адтӕнцӕ, уӕд нур ба ӕнцӕ ӕцӕг киристӕнттӕ. Бакӕсӕ Гъуддӕгтӕ 15:14, 17.

Киристе ӕ фӕдбӕлдзӕугутӕн бафӕдзахста, цӕмӕй хуарз хабар игъосун кӕнонцӕ ӕма ӕгас адӕмихӕттитӕй дӕр ахуркӕнуйнӕгтӕ цӕттӕ кӕнонцӕ (Матфеййи 10:7, 11; 24:14; 28:19, 20). Абони еци куст фӕуунтӕбӕл ӕй. Йеговӕ алли адӕмихӕттитӕй милиуангай адӕм байеу кодта, цӕмӕй ин еумӕ ковонцӕ. Уӕхӕн гъуддаг зӕнхӕбӕл некӕд ма адтӕй (Раргомадӕ 7:9, 10). Ӕцӕг киристӕнттӕн ӕмбурдтӕ ке фӕууй, уой фӕрци кӕрӕдзей нифсбӕл нифс ӕфтаунцӕ ӕма кӕрӕдземӕн ӕнхус кӕнунцӕ. Ӕнӕгъӕнӕ дуйней дӕр син ци ӕмбурдтӕ ес, еци ӕмбурдти Библи ахур кӕнунцӕ еци еу программӕбӕл. Бакӕсӕ Дзиуиттӕгтӕмӕ 10:24, 25.

 3. Йегови Ӕвдесӕнти организаци куд фӕззиндтӕй?

1870-аг ӕнзти Библиӕртасгутӕ минкъий къуарӕй Хуцауи Дзурд лӕмбунӕг ӕртасун райдӕттонцӕ, ӕма син Йеговӕ раргом кодта, берӕ рӕстӕг адӕмӕй иронх ка адтӕй, еци ӕхсидзгӕ хабӕрттӕ. Етӕ ’й балӕдӕрдтӕнцӕ, Киристе ӕмбурд уой туххӕй ке искодта, цӕмӕй ӕ фӕдбӕлдзӕугутӕ хуарз хабар игъосун кӕнонцӕ. Ӕма етӕ дӕр Хуцауи Паддзахади туххӕй алли бӕстити игъосун кӕнун райдӕдтонцӕ. 1931 анзи ба сӕхе хонун райдӕдтонцӕ Йегови Ӕвдесӕнтӕ. Бакӕсӕ Гъуддӕгтӕ 1:8; 2:1, 4; 5:42.

4. Йегови Ӕвдесӕнтӕн игъосун кӕнуни гъуддаги разамунд лӕвӕрд куд цӕуй?

Фиццаг ӕноси берӕ бӕстити ци киристон ӕмбурдтӕ адтӕй, уонӕн разамунд лӕвардта фӕлтӕрд нӕлгоймӕгти къуар. Етӕ ӕмбурди хестӕрбӕл нимадтонцӕ Киристей (Гъуддӕгтӕ 16:4, 5). Абони Йегови Ӕвдесӕнтӕн дӕр разамунд дӕттуй фӕлтӕрд хестӕр нӕлгоймӕгти къуар, хонунцӕ ’й Разамонӕг совет. Еци совет ӕ гъос даруй, Йегови Ӕвдесӕнтӕн ӕгас дуйней ци филиалтӕ ес, уонӕмӕ. Еци филиалтӕ 600 фулдӕр ӕвзагемӕ тӕлмац кӕнунцӕ, Библи ка лӕдӕрун кӕнуй, уӕхӕн литературӕ, уой фӕсте ӕй мухури рауадзунцӕ ӕма ’й дуйнебӕл парахат кӕнунцӕ. Уотемӕй Разамонӕг совет, ӕгас дуйней ци ӕмбурдтӕ ес, уонӕн Хуцауи Дзурдӕй разамунд дӕттуй ӕма син сӕ нифсбӕл нифс ӕфтауй. Абони еци ӕмбурдтӕ ӕнцӕ 100 000 фулдӕр. Уомӕй уӕлдай ма алли ӕмбурди дӕр хестӕр нӕлгоймӕгтӕй, кенӕ цӕстдаргутӕй, исӕвӕрунцӕ, еци гъуддагӕн ка бӕззуй, уӕхӕн ӕнсувӕрти. Етӕ Хуцауи дзогӕбӕл зӕрдиагӕй мӕтӕ кӕнунцӕ. Бакӕсӕ 1 Петури 5:2, 3.

Махӕн, Йегови Ӕвдесӕнтӕн, нӕ сӕйраг ихӕс ӕй адӕмӕн хуарз хабар хӕссун ӕма син ӕнхус кӕнун, цӕмӕй Киристей фӕдбӕлдзӕугутӕ исуонцӕ. Мах дӕр, апостолтӕ куд игъосун кодтонцӕ, уотӕ игъосун кӕнӕн хӕдзарӕй-хӕдзарӕмӕ (Гъуддӕгтӕ 20:20). Ӕма, рӕстдзийнадӕ ка уарзуй, еци адӕми хӕццӕ Библи фӕййахур кӕнӕн. Фал мах ӕнӕуой организаци нӕ ан. Мах ан еу бийнонтӕ, уомӕн ӕма нин ес еу Фидӕ. Е нӕ берӕ уарзуй ӕма нӕ ахур кӕнуй, цӕмӕй мах дӕр нӕ кӕрӕдзей хуӕртӕ ӕма ӕнсувӕрти хузӕн уарзӕн (2 Фессалоникӕгтӕмӕ 1:3). Йегови Ӕвдесӕнтӕ еумӕ Хуцауи фӕндон ке ӕнхӕст кӕнунцӕ ӕма иннетӕн ке ӕнхус кӕнунцӕ, уомӕ гӕсгӕ зӕнхӕбӕл уонӕй амондгундӕр бийнонтӕ нӕййес! Бакӕсӕ Псалом 33:12; Гъуддӕгтӕ 20:35.