Перейти к основным материалам

Перейти к содержанию

 25 СӔР

Ӕууӕндундзийнадӕ, уагахаст ӕма уарзондзийнадӕ

Ӕууӕндундзийнадӕ, уагахаст ӕма уарзондзийнадӕ

Иаков, Петур, Иоанн ӕма Иуди финстӕгутӕ киристӕнтти федар кӕнунцӕ

ИАКОВ ӕма Иудӕ адтӕнцӕ Киристей ӕнсувӕртӕ, Петур ӕма Иоанн ба ӕ апостолтӕ. Еци цуппар нӕлгоймаги ӕдеугурӕй ниффинстонцӕ, Киристон Грекъаг Финститӕмӕ хаст ка ӕрцудӕй, уӕхӕн авд финстӕги. Алли финстӕг дӕр си хӕссуй ӕ ниффинсӕги ном. Хуцауи разамундӕй си ци унаффитӕ финст ӕрцудӕй, уони фӕрци киристӕнттӕ Йеговӕбӕл еузӕрдон ӕнцӕ ӕма ӕ Паддзахади фарс федарӕй лӕуунцӕ.

Ӕууӕндундзийнадӕ. Уотид дзорун, ӕз Хуцаубӕл ӕууӕндун, зӕгъгӕ, фагӕ нӕй. Не ’ууӕндундзийнадӕ гъӕуама гъуддӕгтӕй бӕрӕг уа. Иаков финста: «Ӕууӕндундзийнадӕ... ӕнӕ гъуддӕгтӕй мард ӕй» (Иакови 2:26). Зиндзийнӕдтӕй фӕлвӕрд ка ’рцӕуй, еци ӕууӕндундзийнадӕ федардӕр фӕууй. Зиндзийнӕдтӕбӕл ӕмбӕлгӕй киристӕнттӕ гъӕуама Хуцауӕй коронцӕ зунд ӕма син ӕй ке ратдзӕй, уобӕл ма дузӕрдуг кӕнонцӕ. Фӕлварӕнти федарӕй ка фӕллӕууа, е Хуцауи хуарзӕнхӕ иссердзӕй (Иакови 1:2–6, 12). Еузӕрдонӕй ку байзайӕн ӕма не ’ууӕндундзийнадӕ ку багъӕуай кӕнӕн, уӕд Йеговӕ алкӕддӕр нӕ фарсмӕ уодзӕй. Иаков загъта: «Бахӕстӕг уотӕ Хуцаумӕ, ӕма уӕмӕ е дӕр ӕрбахӕстӕг уодзӕй» (Иакови 4:8).

Ӕууӕндундзийнадӕ гъӕуама уотӕ федар уа, цӕмӕй нӕ бон уа нӕ бауӕри монцти ӕма ӕнӕгъдаудзийнади нихмӕ федар фӕллӕуун. Иудӕ ’й зудта, киристӕнттӕбӕл аци дуйней зундахаст куд фӕббӕрӕг уй, уой, ӕма сӕ разӕнгард кодта, цӕмӕй се ’ууӕндундзийнади сӕрбӕл тох кодтайуонцӕ (Иуди 3).

Уагахаст. Йегови фӕндуй, цӕмӕй ӕ лӕггадгӕнгутӕмӕ фау ӕрхӕссӕн мацӕмӕй уа. Петур финста: «Уӕ алли гъуддаги дӕр уотӕ кӕдзос» (1 Петури 1:15, 16). Киристӕнттӕ ке гъӕуама фӕнзонцӕ, уой туххӕй Петур загъта: «Киристе сумах туххӕй фӕгъгъезӕмарӕ кодта ӕма уин бавдиста, куд цӕрун гъӕуй, уой, цӕмӕй ӕ къахвӕдтӕбӕл цӕуайтӕ» (1 Петури 2:21). Киристӕнтти еуӕй-еухатт бафхуӕрунцӕ, Хуцауи уагӕвӕрдтӕмӕ гӕсгӕ ке цӕрунцӕ, уой туххӕй. Фал ӕй етӕ фӕззонунцӕ, раст ке кӕнунцӕ, уой, ӕма Хуцауи рази сӕ цӕсгон кӕдзос фӕууй (1 Петури 3:16, 17). Петур киристӕнтти разӕнгард кодта, цӕмӕй, Йегови бони ӕрцудмӕ ӕма «рӕстдзийнадӕ кӕми уодзӕй», еци цардмӕ ӕнгъӕлмӕ кӕсгӕй, кӕдзос цард кӕнонцӕ ӕма Хуцаубӕл еузӕрдон уонцӕ (2 Петури 3:11–13).

«Бахӕстӕг уотӕ Хуцаумӕ, ӕма уӕмӕ е дӕр ӕрбахӕстӕг уодзӕй» (Иакови 4:8)

Уарзондзийнадӕ. Иоанн финста, «Хуцау ӕй уарзондзийнадӕ», зӕгъгӕ, удта балӕдӕрун кодта, Хуцау Йесой цард нӕ тӕрегъӕдти туххӕй нивондӕн ке ’рхаста, уомӕй хъӕбӕр устур уарзондзийнадӕ ке бавдиста. Махӕн ба нӕ бон куд ӕй ӕвдесун, еци нивондӕн ке аргъ кӕнӕн? Иоанн загъта: «Мӕ уарзон ӕнсувӕртӕ, кӕд нӕ Хуцау уотӕ бауарзта, уӕд мах дӕр ихӕсгин ан, цӕмӕй нӕ кӕрӕдзей уарзӕн» (1 Иоанни 4:8–11). Уӕхӕн уарзондзийнадӕ ӕвдесдзинан, зӕгъӕн, иуазӕгуарзагӕ ку уӕн, уӕд (3 Иоанни 5–8).

Фал, Йегови ке уарзӕн, уой ба нӕ бон куд ӕй бавдесун? Иоанн загъта: «Хуцауи ке уарзӕн, е бӕрӕг уодзӕй, ӕ фӕдзӕхститӕ ин ку ’нхӕст кӕнӕн, уӕд. Ӕма ӕ фӕдзӕхститӕ ба зинӕнхӕстгӕнӕн нӕ ’нцӕ» (1 Иоанни 5:3; 2 Иоанни 6). Хуцауи фӕдзӕхститӕ ка ’нхӕст кӕнуй, етӕ Хуцауи уарзтӕй ӕнӕхай нӕ фӕууодзӕнцӕ ӕма ӕносон цардӕй исхайгин уодзӕнцӕ (Иуди 21).

Иакови; 1 ӕма 2 Петури; 1, 2 ӕма 3 Иоанни ӕма Иуди.