Перейти к основным материалам

Перейти к содержанию

 21 СӔР

Йесо Киристе райгас ӕй!

Йесо Киристе райгас ӕй!

Киристе ку райгас ӕй, уӕд ӕ фӕдбӕлдзӕугутӕмӕ фӕззиндтӕй, цӕмӕй син унаффитӕ радта ӕма сӕ бафедар кӕна

КИРИСТЕЙ мӕлӕтӕй ӕртӕ бони ку рацудӕй, уӕд ӕ фӕдбӕлдзӕуӕг силгоймӕгтӕй кадӕртӕ дзӕппазӕмӕ ӕрбацудӕнцӕ ӕма фӕууидтонцӕ, бахезӕни дор ке нӕбал адтӕй, медӕгӕй ба – ревӕд!

Уӕд сӕмӕ фӕззиндтӕй дууӕ изӕди, ӕма сӕ еу загъта: «Сумах агоретӕ... назареттаг Йесой. Ами нӕй – райгас ӕй» (Марки 16:6). Силгоймӕгтӕ уой ку фегъустонцӕ, уӕд еци хабар апостолтӕн фегъосун кӕнунмӕ уайтагъд ралигъдӕнцӕ. Надбӕл сӕбӕл Йесо ӕхуӕдӕг рамбалдӕй ӕма син загъта: «Ма тӕрсетӕ! Цотӕ ӕма ме ’нсувӕртӕн зӕгъетӕ, цӕмӕй Галилейӕмӕ цӕуонцӕ. Уоми мӕ фӕууиндзӕнцӕ» (Матфеййи 28:10).

Иннӕ бон дууӕ ахуркӕнуйнаги цудӕнцӕ Йерусалимӕй еу гъӕумӕ, Еммаусмӕ. Надбӕл сӕмӕ еу лӕг ӕрбайеу ӕй ӕма сӕ бафарста, цӕбӕл дзоретӕ, зӕгъгӕ. Етӕ ’й нӕ бафӕсмардтонцӕ ӕма ин ӕнкъардӕй загътонцӕ, Киристей туххӕй ке дзорунцӕ. Еци лӕг син райдӕдта Финстадӕй лӕдӕрун кӕнун, Мессийӕмӕ ка хауй, еци пахампарӕдтӕ. Ӕма ӕцӕгӕйдӕр еци пахампарӕдтӕ еугурӕйдӕр Киристебӕл исӕнхӕст ӕнцӕ *. Еци ӕнӕзонгӕ адӕймаг Йесо ке адтӕй, уой ку балӕдӕрдтӕнцӕ, уӕд се ’нгасӕй фӕццидӕр ӕй.

Етӕ еци фӕдбӕл фӕстӕмӕ Йерусалиммӕ раздахтӕнцӕ. Уоми еу хӕдзари апостолти хӕццӕ фембалдӕнцӕ ӕма син алцидӕр радзурдтонцӕ. Цалинмӕ ма дзоргӕ кодтонцӕ, уӕдмӕ сӕмӕ фӕззиндтӕй Йесо. Ӕ фӕдбӕлдзӕугутӕй не ’рагӕс кодта, сӕ рази ке ӕй. Йесо сӕ бафарста: «Цӕмӕй фӕттарстайтӕ ӕма гурусхӕ кӕнун цӕмӕн райдӕдтайтӕ?» Удта син загъта: «Уотӕ финст ӕй, зӕгъгӕ, Киристе фӕгъгъезӕмарӕ кӕндзӕй ӕма ӕртиккаг бон мӕрдтӕй райгас уодзӕй» (Лукай 24:38, 46).

Киристе ку райгас ӕй, уӕд ма 40 боней дӕргъи ӕ фӕдбӕлдзӕугутӕмӕ фӕззиннидӕ аллихузи уавӕрти. Еу хатт ба фӕззиндтӕй 500 адӕймагемӕй фулдӕрмӕ! Ӕвӕдзи син гъе уӕд баихӕс кодта аци ӕхсидзгӕ гъуддаг: «Цотӕ ӕма мин ӕгас адӕмихӕттитӕй дӕр цӕттӕ кӕнтӕ ахуркӕнуйнӕгтӕ... Ӕма сӕ ахур кӕнтӕ, ӕз уин ци ниффӕдзахстон, уони еугурейдӕр ӕнхӕст кӕнун. Ӕма цалинмӕ аци цардӕвӕрди кӕрон не ’рцӕуа, уӕдмӕ ӕз алли бон дӕр уодзӕн уӕ хӕццӕ» (Матфеййи 28:19, 20).

Йесо ӕ 11 еузӕрдон апостоли хӕццӕ ку фембалдӕй, уӕд син зӕрдӕ байвардта: «Хуцауи сугъдӕг хъаурӕ [уӕбӕл] ку ’рцӕуа, уӕд исхайгин уодзинайтӕ хъаурӕй, ӕма мин уодзинайтӕ ӕвдесӕнтӕ... сауӕнгӕ зӕнхи кӕрӕнттӕмӕ дӕр» (Гъуддӕгтӕ 1:8). Уой фӕсте Йесо уӕларвмӕ иссудӕй ӕма сӕмӕ мегътӕй нӕбал зиндтӕй.

Матфеййи, 28 сӕр; Марки, 16 сӕр; Лукай, 24 сӕр; Иоанни, 20 ӕма 21 сӕртӕ; 1 Коринфӕгтӕмӕ 15:5, 6.

^ 6 абз. Мессийи туххӕй пахампарӕдтӕ куд исӕнхӕст ӕнцӕ, уой туххӕй кӕсӕ аци брошюри 14, 15 ӕма 16 сӕртӕ.