Перейти к основным материалам

Перейти к содержанию

 12 СӔР

Дӕ бон куд ӕй Хуцауи ӕмбал исун?

Дӕ бон куд ӕй Хуцауи ӕмбал исун?

1, 2. Йегови ӕмбӕлттӕй еуӕй-еуетӕ катӕ адтӕнцӕ?

ДӔХЕЦӔН ӕмбалӕн ке равзарисӕ? Ӕвӕдзи, хуарз зӕрдихатт кӕмӕн ес ӕма кӕрӕдзей хуарз ке хӕццӕ лӕдӕретӕ, уӕхӕн адӕймаги.

2 Йеговӕ Хуцау дӕр адӕнӕй кедӕрти ӕхецӕн ӕмбалӕн равзаруй. Зӕгъӕн, Йегови ӕмбӕлттӕй сӕ еу адтӕй Авраам (Исай 41:8; Иакови 2:23). Йеговӕ ма Давиди дӕр уарзта ӕма ’й исхудта, «ӕ зӕрдӕн адгин» адӕймаг (Гъуддӕгтӕ 13:22). Удта пахампар Данел дӕр Йеговӕн «хъӕбӕр хъазар» адтӕй (Данел 9:23).

3. Авраам, Давид ӕма Данел Йегови ӕмбӕлттӕ куд иссӕнцӕ?

3 Авраам, Давид ӕма Данел Йегови ӕмбӕлттӕ куд иссӕнцӕ? Йеговӕ Авраамӕн загъта: «Мӕ дзурдмӕ мин... байгъустай» (Райдайӕн 22:18). Йеговӕ исуй ӕмбал, сӕрниллӕг ка ӕй ӕма ин ӕ дзурд ка ӕнхӕст кӕнуй, уӕхӕн адӕймагӕн. Ӕнӕгъӕнӕ адӕнихатти бон дӕр ӕй е ’мбӕлттӕ исун. Зӕгъӕн, Израили адӕнӕн Йеговӕ загъта: «Игъосетӕ мӕмӕ, ӕма ӕз исуодзӕн уӕ Хуцау, сумах ба исуодзиайтӕ мӕ адӕн» (Йереми 7:23). Мадта дӕ кӕд ӕцӕгӕйдӕр фӕндуй, цӕмӕй Йегови ӕмбал исуай, уӕд имӕ гъӕуама игъосай.

ЙЕГОВӔ Е ’МБӔЛТТИ ГЪӔУАЙ КӔНУЙ

4, 5. Йеговӕ е ’мбӕлтти куд гъӕуай кӕнуй?

4 Нӕ фуддӕр знаг алкӕддӕр уобӕл архайуй, цӕмӕй Хуцаумӕ ма бахӕстӕг уӕн ӕма е ’мбӕлттӕ ма  исуӕн. Фал нин Йеговӕ зӕрдӕ ӕвӕруй, гъӕуай нӕ ке кӕндзӕй. (Бакӕсӕ Псалом 55:22.) Библий финст ӕй, Йеговӕ фадуӕттӕ ке агоруй, цӕмӕй «ӕ зӕрдӕ ӕнӕгъӕнӕйдӕр ӕ хӕццӕ кӕмӕн ӕй, уони туххӕй ӕ хъаурӕ бавдеса» (2 Анзфинстити 16:9). Псаломи 32:8 Йеговӕ е ’мбӕлттӕн зӕрдӕ ӕвӕруй: «Лӕдӕргӕдзийнадӕ дин ратдзӕн ӕма дӕ ци надбӕл цӕун гъӕуй, уобӕл дӕ исараздзӕн. Ратдзӕн дин унаффӕ ӕма дӕмӕ мӕ цӕстӕ дардзӕн».

5 Мах Йегови ӕмбӕлттӕ ан ӕма ин ӕгас зӕрдӕй лӕггадӕ кӕнӕн. Зин уавӕрти дӕр ибӕл еузӕрдонӕй байзайӕн. Ӕма мах бон дӕр ӕй Давиди хузӕн Йегови туххӕй федарӕй зӕгъун: «Ӕз некӕд фӕккеудзӕн, уомӕн ӕма е ӕй мӕ рахес фарс» (Псалом 16:8; 63:8). Мах дӕр федарӕй ӕууӕндӕн, Йеговӕ нин ке банхус кӕндзӕй, уобӕл. Фал Сайтан архайуй, цӕмӕй нӕ Хуцауӕй раидард кӕна. Цума кутемӕй?

САЙТАН МӔНГӔТТӔ ФӔДЗДЗУРДТА

6. Сайтан адӕни туххӕй ци загъта?

6 Еуӕндӕсӕймаг сӕрӕй базудтан, Сайтан Йегови нихмӕ куд рацудӕй, уой. Уотӕ зӕгъун ӕй фӕндадтӕй, ӕма Йеговӕ сайгӕ кӕнуй. Удта, дан, раст нӕ бакодта, Адам ӕма Евӕн барӕ ке нӕ равардта, цӕмӕй хуарз ӕма лӕгъуз ци ӕй, уой сӕхуӕдтӕ ӕвзаронцӕ. Иови киунугӕй базонӕн ес, Сайтан ма, Хуцаумӕ хӕстӕг кӕнун ке фӕндуй, еци адӕни дӕр ке фӕффудгин кодта. Етӕ, дан, Хуцауӕн лӕггадӕ кӕнунцӕ, цӕмӕдӕр имӕ ке ӕнгъӕлмӕ кӕсунцӕ, уой туххӕй, уарзгӕ ’й ке кӕнунцӕ, уой туххӕй нӕ, фал. Сайтан хъӕбӕр устур дзурд кодта, кефӕнди дӕр, дан, мӕ бон  ӕй Хуцауи нихмӕ искӕнун. Ӕркӕсӕн, Иови хабарӕй цӕбӕл ахур кӕнӕн ӕма ’й Йеговӕ куд гъӕуай кодта, уомӕ.

7, 8. а) Йегови цӕсти Иов цӕхуӕн адӕймаг адтӕй? б) Сайтан Иови туххӕй ци загъта?

7 Иов хуарз адӕймаг адтӕй ӕма цардӕй еу 3 600 анзей разӕй. Йеговӕ си загъта, еци рӕстӕг зӕнхӕбӕл уой хузӕн адӕймаг ке н’ адтӕй. Иов Хуцауӕн кадӕ кодта ӕма лӕгъуздзийнадӕй е ’сӕфт уидта (Иов 1:8). Йеговӕ Иови нимадта е ’цӕг ӕмбалбӕл.

8 Фал Сайтан загъта, Иов, дан, Хуцауӕн ӕхе пайдайӕн лӕггадӕ кӕнуй. Сайтан Йеговӕн загъта: «Аллирдигӕй дӕр ӕй ду нӕ гъӕуай кӕнис, ӕхе дӕр, ӕ хӕдзарӕ дӕр ӕма имӕ цидӕриддӕр ес, уони? Ду ин ӕ хъиамӕтӕн арфӕ кӕнис, ӕма ӕ фонс зӕнхӕбӕл нӕбал цӕунцӕ. Мадта бавзарай, дӕ къох исесӕ ӕма имӕ цидӕриддӕр ес, уомӕ бавналӕ, цума дӕ ӕргом нӕ ралгъетдзӕй» (Иов 1:10, 11).

9. Йеговӕ Сайтанӕн цӕхуӕн барӕ равардта?

9 Уомӕй уӕлдай ма Сайтан загъта, ӕ бон ке ӕй уотӕ бакӕнун, цӕмӕй Иов Йеговӕн мабал лӕггадӕ кӕна. Йеговӕ уотӕ нӕ сагъӕс кодта, фал Сайтанӕн барӕ равардта, цӕмӕй Иови бафӕлвардтайдӕ. Уотемӕй рабӕрӕг адтайдӕ, Иов Йегови ӕцӕгӕйдӕр уарзуй ӕви нӕ, е.

САЙТАН ИОВБӔЛ ӔХЕ НИЦЦАВТА

10. Сайтан Иови куд фӕлвардта ӕма еци уавӕри Иов куд бакодта?

10 Фиццаг бал Сайтан равналдта Иови фонсмӕ, ӕма си еуети давгӕ ракодтонцӕ, иннетӕ ба цагъди фӕцӕнцӕ. Уой фӕсте ин ӕ лӕггадгӕнгути ниццагъта.  Уотемӕй Иов ӕнӕ нецӕмӕй байзадӕй. Фӕстагмӕ ба Сайтан тухдунгӕ исистун кодта, ӕма Иовӕн ӕ дӕс сувӕллони фӕммардӕнцӕ. Фал Иов уӕддӕр Йеговӕбӕл еузӕрдонӕй байзадӕй. Библи зӕгъуй: «Иов тӕрегъӕд нӕ ракодта ӕма Хуцауӕй лӕгъуз неци загъта» (Иов 1:12–19, 22).

Иов Йеговӕбӕл еузӕрдон ке адтӕй, уой туххӕй ин Йеговӕ райарфӕ кодта

11. а) Сайтан ма Иовӕн никкидӕр ци бавзарун кодта? б) Иов куд бакодта?

11 Фал Сайтан уӕддӕр нӕ сабур кодта ӕма Хуцауӕн загъта: «Дӕ къох исесай ӕма ин е стӕг ӕма ӕ бауӕрмӕ бавналӕ, цума дӕ ӕргом нӕ ралгъетдзӕй». Ӕма Сайтан Иовбӕл уодхайраг нез бафтудта (Иов 2:5, 7). Фал бабӕй аци хатт дӕр Иов Йеговӕбӕл еузӕрдонӕй байзадӕй. Е загъта: «Цалинмӕ ӕгас уон, уӕдмӕ Хуцаубӕл мӕ зӕрдӕ не ’сӕййевдзӕн!» (Иов 27:5).

12. Иов ӕй куд бавдиста, Сайтан мӕнгӕттӕ ке дзурдта, уой?

12 Иов ӕй нӕ зудта, ке туххӕй гъезӕмарӕ кӕнуй ӕма си Сайтан цитӕ фӕдздзурдта, уой. Уотӕ имӕ кастӕй, ӕма ибӕл ӕгас бӕллӕхтӕ дӕр Йеговӕ ӕруагъта (Иов 6:4; 16:11–14). Фал уотемӕй дӕр Иов Йеговӕбӕл еузӕрдонӕй байзадӕй. Е ӕй бавдиста, Йегови ӕцӕгӕй ке уарзуй ӕма е ’мбал дӕр уой туххӕй ке ӕй, цӕмӕдӕр имӕ ке ӕнгъӕлмӕ кастӕй, уой туххӕй нӕ, фал. Мадта Сайтан Иовӕй цитӕ фӕдздзурдта, етӕ мӕнгӕттӕ разиндтӕнцӕ!

13. Иов Хуцаубӕл еузӕрдонӕй ке байзадӕй, уомӕй ци рабӕрӕг ӕй?

13 Уӕлӕрвти ци хабӕрттӕ ӕрцудӕй, уонӕн Иов неци зудта, фал уӕддӕр Хуцаубӕл еузӕрдонӕй байзадӕй ӕма уотемӕй бавдиста, Сайтан сайгӕ ке кодта, уой. Хуцау Иовӕн ӕ еузӕрдондзийнади туххӕй райарфӕ кодта (Иов 42:12–17).

 САЙТАН ДӔУ КОЙ ДӔР КӔНУЙ

14, 15. Сайтан ӕгас адӕнӕй дӕр ци дзоруй?

14 Абони Сайтан мах туххӕй дӕр дзоруй, Йеговӕн ӕрмӕстдӕр нӕхе пайдайӕн ке лӕггадӕ кӕнӕн. Иови 2:4 куд финст ӕй, уомӕ гӕсгӕ Сайтан загъта: «Адӕймаг ӕ уоди туххӕй, цидӕриддӕр имӕ ес, уой ратдзӕй». Мадта бӕрӕг ӕй, Сайтан айдагъ Иови кой ке нӕ кодта, фал ӕгас адӕни кой дӕр. Иови мӕлӕтӕй цалдӕр сӕдӕ анзи ку рацудӕй, уӕд дӕр ма Сайтан Йеговӕн федистӕ кодта ӕма ин ӕ лӕггадгӕнгутӕмӕ фаутӕ хаста. Уой нӕ бон ӕй базонун, Ӕмбесӕндти 27:11 Йеговӕ ци загъта, уомӕй: «Зундгин уо, мӕ бӕдолӕ, ӕма мин мӕ зӕрдӕ рохс кӕнӕ, цӕмӕй мӕ бон уа, фаугӕ мӕ ка кӕнуй, уомӕн дзуапп дӕттун».

15 Ду дӕр Йеговӕмӕ ку игъосай ӕма ӕ еузӕрдон ӕмбал ку исуай, уӕд бавдесдзӕнӕ Сайтан мӕнгӕттӕ ке дзоруй. Цӕмӕй Йегови ӕмбал исуай, уой туххӕй дӕ, ӕвӕдзи, царди устур ӕййивддзийнӕдтӕ искӕнун багъӕудзӕй. Фал е дӕ царди тӕккӕ хуӕздӕр унаффӕ уодзӕй! Ӕма еци унаффӕмӕ уӕлӕнгай цӕстӕй кӕсӕн нӕййес. Сайтан дӕуӕй дӕр зӕгъуй, зӕгъгӕ, зин уавӕрти ку бахауай, уӕд Хуцаубӕл дӕ зӕрдӕ ’сӕййевдзӕнӕ. Е хийнӕй архайуй, цӕмӕй нӕ Хуцауӕй раидард кӕна. Цума кутемӕй?

16. а) Сайтан адӕни куд къулумпи кӕнуй, цӕмӕй Йеговӕн ма лӕггадӕ кӕнонцӕ? б) Сайтан куд архайдзӕй, цӕмӕй дӕу бакъулумпи кӕна?

16 Сайтан пайда кӕнуй аллихузи мадзӕлттӕй. Зӕгъӕн, адӕймагбӕл ӕхе ниццӕвуй «богътӕгӕнагӕ домбаййи хузӕн», цӕмӕй ӕй «ранихъуӕра» (1 Петури 5:8). Уомӕ гӕсгӕ дӕмӕ дессаг ма фӕккӕсӕд, Библи  ке ахур кӕнис, е дӕ бийнонти, де ’мбӕлтти кенӕ ӕндӕр еске зӕрдӕмӕ ку нӕ фӕццӕуа * (Иоанни 15:19, 20). Уомӕй уӕлдай ма Сайтан ӕхе уотӕ ӕвдесуй, цума «рохси изӕд» ӕй. Е хийнӕй архайуй, цӕмӕй Йегови ахурӕдтӕбӕл нӕ, фал уой ахурӕдтӕбӕл баууӕндӕн, ӕма уотемӕй Йеговӕмӕ мабал игъосӕн (2 Коринфӕгтӕмӕ 11:14). Уомӕй уӕлдай ма архайуй, цӕмӕй уотӕ сагъӕс кӕнун райдайӕн, цума Хуцауӕн лӕггадӕ кӕнуни аккаг нӕ ан (Ӕмбесӕндтӕ 24:10).

ЙЕГОВИ ФӔДЗӔХСТИТӔ ӔНХӔСТ КӔНӔ

17. Йеговӕмӕ цӕмӕн игъосӕн?

17 Йеговӕмӕ ку фегъосӕн, уӕд ӕй февдесӕн, Сайтан мӕнгӕттӕ ке дзурдта. Ци нин банхус кӕндзӕй, цӕмӕй алкӕддӕр Йеговӕмӕ игъосӕн? Библий финст  ӕй: «Дӕ Хуцау Йегови уарзӕ ӕгас зӕрдӕй, ӕгас уодӕй ӕма ӕгас хъаурӕй» (Дуккаг закъон 6:5). Мах Йеговӕмӕ игъосӕн, уарзгӕ ’й ке кӕнӕн, уой туххӕй. Йегови куд фулдӕр уарзӕн, уотӕ нӕ хъӕбӕрдӕр фӕнддзӕй цидӕриддӕр нин дзоруй, уой кӕнун. Апостол Иоанн ниффинста: «Хуцауи ке уарзӕн, е бӕрӕг уодзӕй, ӕ фӕдзӕхститӕ ин ку ӕнхӕст кӕнӕн, уӕд. Ӕма ӕ фӕдзӕхститӕ ба зинӕнхӕстгӕнӕн нӕ ’нцӕ» (1 Иоанни 5:3).

18, 19. а) Йегови цӕсти лӕгъуз ка ’нцӕ, еци гъуддӕгтӕй еуӕй-еуетӕ кӕцитӕ ’нцӕ? б) Йеговӕ ни, нӕ бон ци нӕй, уой ке некӕд фӕййагоруй, уой кӕцӕй зонӕн?

18 Кӕцидӕр гъуддӕгтӕ Йегови цӕсти лӕгъуз ӕнцӕ. Еуӕй-еуети туххӕй бакӕсӕн ес рамки « Йеговӕ е ’сӕфт цӕмӕй уинуй, уомӕй ду дӕр де ’сӕфт уинӕ». Еци гъуддӕгтӕй дӕмӕ кӕцидӕртӕ, ка ’й зонуй, уотӕ лӕгъуз ма фӕккӕсонцӕ. Фал рамкиБиблийӕй ци стихтӕ ес, уони ку бакӕсай ӕма сӕбӕл лӕмбунӕг ку расагъӕс кӕнай, уӕд ӕй балӕдӕрдзӕнӕ, Йегови  закъӕнттӕмӕ гӕсгӕ цӕрун раст ке ӕй. Ка ’й зонуй, царди дӕ цидӕртӕ раййевун гъӕуй, ӕма дин, ӕвӕдзи, ӕнцон нӕ уодзӕй. Фал уӕддӕр еци ӕййивддзийнӕдтӕ ку искӕнай, уӕд дӕ зӕрди уодзӕй, Йегови ӕмбӕлтти зӕрдити ка фӕууй, уӕхӕн фарнӕ ӕма цийнӕ (Исай 48:17, 18). Фал федарӕй цӕмӕн ес зӕгъӕн, ӕма адӕймагӕн ӕ бон ӕй уӕхӕн ӕййивддзийнӕдтӕ искӕнун?

19 Йеговӕ ни, нӕ бон ци нӕй, уой некӕд фӕййагоруй (Дуккаг закъон 30:11–14). Йеговӕ ӕй ӕцӕг Ӕмбал, ӕма нӕ е нӕхецӕй дӕр хуӕздӕр зонуй. Зонуй ӕй, хуарзӕй нӕмӕ ци ес, уой дӕр ӕма нӕ гъӕндзийнӕдтӕ дӕр (Псалом 103:14). Апостол Павели дзурдтӕ нин нифс дӕттунцӕ: «Хуцау еузӕрдон ӕй, ӕма нӕ бауадздзӕй, цӕмӕй бахауайтӕ, уӕ бон бафӕразун ке нӕ уа, уӕхӕн фӕлварӕни, фал уин фӕлварӕни, ци бакӕнӕн ес, уой дӕр байамондзӕй, цӕмӕй ӕй исфӕразайтӕ» (1 Коринфӕгтӕмӕ 10:13). Уомӕ гӕсгӕ мах федарӕй ӕууӕндӕн, Йеговӕ нин алкӕддӕр хъаурӕ ке дӕтдзӕй, цӕмӕй раст ци ӕй, уой кӕнӕн. Е дӕ исхайгин кӕндзӕй, «адӕймагмӕ ка нӕййес, уӕхӕн хъаурӕй», цӕмӕй зин уавӕрти федар фӕллӕууай (2 Коринфӕгтӕмӕ 4:7). Йеговӕ куд ӕнхус кӕнуй, уой Павел ӕхецӕй зудта, ӕма уомӕ гӕсгӕ ӕ бон адтӕй зӕгъун: «Алцидӕр мӕ бон ӕй, хъаурӕ мин ка дӕттуй, уой фӕрци» (Филиппӕгтӕмӕ 4:13).

ЙЕГОВӔ ЦИ УАРЗУЙ, УОЙ УАРЗӔ

20. Цӕхуӕн менеугутӕ дӕмӕ гъӕуама уа ӕма цӕмӕн?

20 Кӕд нӕ фӕндуй Йегови ӕмбӕлттӕ исун, уӕд гъӕуама, уой цӕсти раст ци нӕй, уой мабал кӕнӕн. Фал айдагъ е фагӕ нӕй (Ромӕгтӕмӕ 12:9). Хуцауи ӕмбӕлттӕ  гъӕуама уарзонцӕ, Хуцау ци уарзуй, уой. Е ’мбӕлттӕ цӕхуӕн гъӕуама уонцӕ, е финст ӕй Псаломи 15:1–5. (Ба сӕ кӕсӕ.) Етӕ архайунцӕ Йегови фӕнзунбӕл, ӕма сӕмӕ фӕззиннуй, уой хузӕн менеугутӕ, зӕгъӕн, «уарзондзийнадӕ, цийнӕ, фарнӕ, фӕразондзийнадӕ, хӕларзӕрдӕдзийнадӕ, хуарздзийнадӕ, ӕууӕндундзийнадӕ, фӕлмӕн уодигъӕдӕ, хебӕл хуӕцун» (Галатӕгтӕмӕ 5:22, 23).

21. Хуцауи зӕрдӕмӕ ка цӕуй, еци менеугутӕ дӕмӕ цӕй фӕрци фӕззиндзӕнцӕ?

21 Еци хуарз менеугутӕ дӕмӕ фӕззиндзӕнцӕ, Йеговӕ ци уарзуй, уой ку бауарзай, уӕд. Уой туххӕй ба гъӕуама, алли бон дӕр Библи кӕсай ӕма ’й ӕртасай (Исай 30:20, 21). Уотӕ ку кӕнай, уӕд Йегови никки фулдӕр уарздзӕнӕ. Ӕма ’й куд фулдӕр уарзай, уотӕ дӕ хъӕбӕрдӕр фӕнддзӕй уомӕ игъосун.

22. Йеговӕмӕ ку игъосай, уӕд дин ци бантӕсдзӕй?

22 Адӕймаг ӕ цард ку раййевуй, уӕд е фӕууй, цума ӕ зӕронд хъӕппӕлтӕ раласта ӕма ӕ уӕле нӕуӕг хъӕппӕлтӕ искодта, уой хузӕн. Библи зӕгъуй, дӕ «зӕронд уодигъӕдӕ» раласун дӕ ке гъӕуй, дӕ уӕле ба – «нӕуӕг» уодигъӕдӕ искӕнун (Колоссӕгтӕмӕ 3:9, 10, феппайуйнӕгтӕ). Е дин, ӕвӕдзи, ӕнцон нӕ уодзӕй, фал Йеговӕмӕ ку игъосай ӕма дӕ цардиуагӕ, удта дӕ гъуддӕгтӕ ку ӕййевай, уӕд дин ратдзӕй устур хуӕрзеуӕг (Псалом 19:11). Йеговӕмӕ ку игъосай, уӕд, уой фӕрци рабӕрӕг уодзӕй, Сайтан мӕнгӕттӕ ке дзоруй, е. Йеговӕн лӕггадӕ кӕнӕ, федӕни дӕмӕ ци хуӕрзеуӕг ӕнгъӕлмӕ кӕсуй, уой туххӕй нӕ, фал ӕй ӕгас зӕрдӕй ке уарзис, уой туххӕй. Ӕма уӕд исуодзӕнӕ Хуцауи ӕцӕг ӕмбал!

^ 16 абз. Е уобӕл дзорӕг нӕй, ӕма дӕ Библи ахур кӕнунмӕ ка къулумпи кӕнуй, уони Сайтан ӕхуӕдӕг ахъелуй. Фал Сайтан ӕй «аци цардӕвӕрди хецау», ӕма «ӕгас дуйне... ӕ къохи» ӕй. Уомӕ гӕсгӕ дессаг нӕй, еуӕй-еуетӕ нӕ Хуцауӕн лӕггадӕ кӕнунмӕ ке фӕкъкъулумпи кӕнунцӕ, е (2 Коринфӕгтӕмӕ 4:4; 1 Иоанни 5:19).