Перейти к основным материалам

Перейти к содержанию

 5 СӔР

Самуил кодта раст ци ӕй, уой

Самуил кодта раст ци ӕй, уой

Самуил ма минкъий биццеу адтӕй, уотемӕй ба цардӕй ӕма лӕггадӕ кодта Хуцауи ковӕндони. Зонис ӕй, Самуил куд райдӕдта ковӕндони лӕггадӕ кӕнун? Гъӕйдӕ бал фиццаг базонӕн Самуили мадӕ Анни туххӕй.

Анни хъӕбӕр фӕндадтӕй, цӕмӕй ин сувӕллон адтайдӕ ӕма уой туххӕй алли бон дӕр Йеговӕмӕ кувта. Аннӕ Йеговӕн дзурд равардта, зӕгъгӕ, фурт мин ку райгура, уӕд ӕй ковӕндонӕмӕ рарветдзӕн, цӕмӕй уоми цӕра ӕма дин лӕггадӕ кӕна. Йеговӕ ин ӕ кувд фегъуста ӕма ин фурт райгурдӕй. Аннӕ ’й исхудта Самуил. Удта Йеговӕн ци дзурд равардта, уой дӕр исӕнхӕст кодта. Самуилбӕл ӕртӕ-цуппар анзи ку цудӕй, уӕд ӕй ковӕндонӕмӕ фӕххудта, цӕмӕй уоми Хуцауӕн лӕггадӕ кодтайдӕ.

Еци рӕстӕг ковӕндони хестӕр саугин адтӕй Илий. Уоми ма саугинтӕй лӕггадӕ кодтонцӕ ӕ дууӕ фурти дӕр. Ковӕндонӕ адтӕй Хуцауи хӕдзарӕ. Уордӕмӕ адӕм цудӕнцӕ Хуцауӕн ковунмӕ. Еци рауӕн лӕгъуз гъуддӕгтӕ кӕнун не ’нгъизтӕй. Фал Илийи фурттӕ ба хъӕбӕр лӕгъуз гъуддӕгтӕ кодтонцӕ. Ӕма сӕ Самуил дӕр уидта. Куд дӕмӕ кӕсуй, е дӕр уони хузӕн лӕгъуз миутӕ кодта? ~ Нӕ. Самуил некӕд иронх кодта, ӕ мадӕ ӕма ’й ӕ фидӕ цӕбӕл ахур кодтонцӕ, уой ӕма раст гъуддӕгтӕ кодта.

Куд дӕмӕ кӕсуй, Илий ӕ дууӕ фуртемӕн ци гъӕуама бакодтайдӕ? ~ Гъӕуама сӕ бафхуардтайдӕ ӕма сӕ Хуцауи ковӕндони лӕггадӕ кӕнун мабал бауагътайдӕ. Фал Илий уотӕ нӕ бакодта, ӕма ин Йеговӕ ӕхемӕ дӕр исмӕстгун ӕй, удта ӕ дууӕ фуртемӕ дӕр. Ӕма загъта, ке сӕ бафхуӕрдзӕй.

Самуил Илийӕн радзурдта, Йеговӕ ин ци загъта, уой

Еу ӕхсӕвӕ Самуил хусгӕ ку кодта, уӕд имӕ кадӕр фӕдздзурдта: «Самуил!» Е дӕр Илиймӕ балигъдӕй, фал ин е ба загъта: «Ӕз дӕмӕ нӕ дзурдтон». Гъеууотӕ ма фегъуста дууӕ хатти. Ӕртиккаг хатт ба Илий Самуилӕн загъта: «Еске ма дӕмӕ ку фӕдздзора, уӕд ин зӕгъдзӕнӕ: „Дзорӕ Йеговӕ, дӕ цагъар дӕмӕ игъосуй”». Самуил дӕр, Илий ин куд загъта, уотӕ бакодта. Уӕд  Йеговӕ Самуилӕн загъта: «Зӕгъӕ Илийӕн, ӕ бийнонти ин сӕ лӕгъуз гъуддӕгти туххӕй ке бафхуӕрдзӕн». Куд дӕмӕ кӕсуй, Самуилӕн ӕнцон адтӕй еци хабар Илийӕн радзорун? ~ Нӕ адтӕй. Фал кӕд Самуил тӕрсгӕ кодта, уӕддӕр ин Йеговӕ ци загъта, уой бакодта. Йегови дзурдтӕ ӕцӕгӕйдӕр исӕнхӕст ӕнцӕ. Илийӕн ӕ дууӕ фуртей дӕр рамардтонцӕ, удта Илий ӕхуӕдӕг дӕр рамардӕй.

Самуил махӕн фӕнзуйнаг ӕй. Кӕд иннетӕ лӕгъуз гъуддӕгтӕ кодтонцӕ, уӕддӕр Самуил ба, хуарз ци ӕй, уой кодта. Ду ба? Самуили хузӕн, раст ци ӕй, уой кӕндзӕнӕ? Кӕд гъо, уӕд Йеговӕ дӕр ӕма дӕ ниййергутӕ дӕр цийнӕ кӕндзӕнцӕ.

БАКӔСӔ ДӔХЕ БИБЛИЙ