Перейти к основным материалам

Перейти к содержанию

 СӔЙРАГ ТЕМӔ | УӔЛӔРВТИ КА ЦӔРУЙ?

Фарстатӕ уӕларвон царди туххӕй

Фарстатӕ уӕларвон царди туххӕй

Ескӕд сагъӕс кодтай, уӕларвон цард ци ӕй ӕма си ка цӕруй, уобӕл? Кӕд гъо, уӕд еунӕг нӕ дӕ. Адӕн мингай ӕнзти дӕргъи сагъӕс кӕнунцӕ еци фарстабӕл. Еуӕй-еуетӕ ӕууӕндунцӕ, уӕлӕрвти сӕ фиддӕлтӕ ке цӕрунцӕ ӕма син кадӕ кӕнун ке гъӕуй, уобӕл. Иннети гъудимӕ гӕсгӕ ба уӕларвон цард ӕй, адӕймаг уодӕнцойнӕ кӕми иссеруй, уӕхӕн бунат, ӕма си цӕрунцӕ изӕдтӕ, удта, хуарз адӕнӕй ка рамардӕй, етӕ. Ес ма, уӕлӕрвтӕ сӕдӕгай милиуан хуцӕутти цӕрӕнбунат ка хонуй, уӕхӕнттӕ дӕр.

Беретӕ ба уотӕ дӕр гъуди кӕнунцӕ, ӕма уӕларвон царди туххӕй неци ес базонӕн, уомӕн ӕма, дан, уордиги некӕдма неке ӕрхизтӕй ӕма ин неке неци зонуй. Фал е раст гъуди нӕй. Йесо Киристе цалинмӕ зӕнхӕмӕ нӕма ӕрцудӕй, уӕдмӕ уӕлӕрвти цардӕй. Фиццаг ӕноси дини разамонгутӕн ӕргом загъта: «Ӕз уӕларвӕй уой туххӕй не ’рцудтӕн, цӕмӕй, мӕхе ци фӕндуй, уой кӕнон, фал мӕ рарветӕги ци фӕндуй, уой». Ӕ апостолтӕн ци загъта, уомӕй дӕр бӕрӕг ӕй, бӕлвурд хабӕртти туххӕй ке дзурдта: «Мӕ Фиди хӕдзари бунӕттӕ берӕ ес» (Иоанни 6:38; 14:2).

Йесой Фидӕ, ӕ ном Йеговӕ кӕмӕн ӕй, еци Хуцау дӕр цӕруй уӕлӕрвти (Псалом 83:18). Мадта уӕлӕрвти ци ес, уой нин Йеговӕ Хуцау ӕма Йесо Киристейӕй хуӕздӕр неке балӕдӕрун кӕндзӕй. Етӕ сӕ еузӕрдон лӕггадгӕнгутӕн цӕстӕбӕлуайӕнтӕ ке ӕвдистонцӕ, уой фӕрци нин уӕлӕрвти туххӕй берӕ цидӕртӕ раргом ӕй.

Иннӕ статьяй ӕркӕсдзиан Библийӕй еуӕй-еу скъуддзӕгтӕмӕ. Уоми дзурд цӕуй, адӕн цӕстӕбӕлуайӕнти цитӕ уидтонцӕ, уобӕл. Ку сӕ кӕсайтӕ, уӕд уӕ зӕрдӕбӕл даретӕ, уӕлӕрвтӕ зӕнхи хузӕн ке нӕ ’нцӕ. Зӕнхӕбӕл ци ес, уони ӕнгъезуй фӕууинун ӕма сӕмӕ къохӕй дӕр бавналун. Уӕлӕрвти хабар ба ӕндӕрхузи ӕй. Уомӕ гӕсгӕ Хуцау хабӕрттӕ, ӕрмӕстдӕр изӕдтӕ ке балӕдӕрдтайуонцӕ, уӕхӕн дзурдтӕй нӕ ниффинсун кодта. Фал еуӕй-еу адӕнӕн цӕстӕбӕлуайӕнти уӕларвон цард уотӕ бавдиста, цӕмӕй сӕ ӕнцонлӕдӕрӕн ӕвзагӕй ниффинстайуонцӕ. Еци цӕстӕбӕлуайӕнти фӕрци базондзиан, уӕлӕрвти ци берӕ «бунӕттӕ» ес, уоми ка цӕруй, уой.