УӔЗЗАУ НЕЗӔЙ СӔЙГӔ КУ УӔН?

Еу ӕригон кизгӕ, Роуз, радзурдта: «Мӕ тоги ци нез рахастон, уой туххӕй арӕх уотӕ фӕрресун, ӕма ин зӕгъӕн дӕр нӕййес. Мӕ нез мӕ ӕвваст райдӕдта тухсун кӕнун». Уӕлдай хъӕбӕрдӕр кӕбӕл мӕтӕ кодта, еци гъуддӕгтӕй еу адтӕй, Библи ахур кӕнгӕй ӕма ӕмбурдтӕмӕ цӕттӕ кӕнгӕй ӕ гъудитӕ ке дзӕгъӕл кодтонцӕ, е. Фал ин Киристей дзурдтӕ хъӕбӕр банхус кодтонцӕ. Финст ӕнцӕ Матфеййи 19:26: «Хуцауӕн алцидӕр ӕй ӕ бон». Роуз балӕдӕрдтӕй, Библи ахур кӕнунмӕ ма ӕндӕр мадзал дӕр ке ес. Ӕ нези туххӕй ин Библи ӕма Библибӕл арӕзт литературӕ кӕсун зин ке адтӕй, уомӕ гӕсгӕ сӕмӕ аудиоформати игъуста. Роуз загъта: «Еци аудиоӕрмӕг ку н’ адтайдӕ, уӕд куд адтайнӕ, уой нӕ зонун».

Роуз хъӕбӕр фенкъард кӕнуй, раздӕр ӕ бон ци адтӕй кӕнун, уой нур ӕ бон ке нӕбал ӕй, уобӕл. Фал ин уӕхӕн рӕстӕг хъӕбӕр банхус кӕнунцӕ 2 Коринфӕгтӕмӕ 8:12 финст дзурдтӕ: «Адӕймаг ести зӕрдиагӕй ку ратта, уӕд уӕхӕн лӕвар Хуцауӕн уӕлдай ӕхцӕуӕн ӕй. Ӕма адӕймаг ба дӕтгӕ фӕккӕнуй, ци имӕ нӕййес, уой нӕ, фал имӕ ци ес, уой». Еци дзурдтӕ Роузӕн ӕ зӕрдӕбӕл ӕрлӕуун кӕнунцӕ, Хуцау ин ӕ лӕггадӕй арази ке ӕй, уомӕн ӕма, ӕ уавӕрти ӕ бон ци ӕй, уой кӕнуй.

ЕСКЕ НИН КУ ФӔЗЗИАН УА

Раздӕр ке кой кодтан, еци Динӕ радзурдта: «Мӕ ӕстдӕсанздзуд кизгӕ ку фӕззиан ӕй, уӕд мӕбӕл дуйне баталингӕ ӕй. Уотӕ мӕмӕ кастӕй, цума идарддӕр цӕрун нӕбал базондзӕн. Лӕдӕрдтӕн ӕй, раздӕр  куд адтӕй, уотӕ ке нӕбал уодзӕй». Фал ин устур уодӕнцойнӕ ӕрхаста Псалом 94:19. Финст си ес, еу адӕймаг Хуцаумӕ куд кувта, е: «Тухст гъудитӕ мин уодӕнцойнӕ ку нӕбал лӕвардтонцӕ, уӕд мин дӕ зӕрдӕфедаргӕнӕн дзурдтӕ рӕвдудтонцӕ мӕ уод». Динӕ загъта: «Йеговӕмӕ кувтон, цӕмӕй мин балӕдӕрун кодтайдӕ, мӕ бон ци ӕй кӕнун, цӕмӕй мӕ зӕрди рист фӕссабурдӕр адтайдӕ».

Динӕ ӕ хъауритӕ исаразта адӕнӕн ӕнхус кӕнунмӕ. Рӕстӕг ку рацудӕй, уӕд ӕй балӕдӕрдтӕй, ӕ цард саст къариндаси хузӕн ке ӕй. Къариндас ку басӕттуй, уӕд дӕр ма си фенгъезуй финсун. Уотӕ Динӕн дӕр ӕ бон адтӕй иннетӕн ӕнхус кӕнун кӕд зӕрдӕсаст адтӕй, уӕддӕр. Динӕ загъта: «Еу афони мӕмӕ багъардта, адӕнӕн Библий фӕрци ке ӕнхус кодтон, е мӕхецӕн дӕр уодӕнцойни хуасӕ адтӕй». Динӕ ӕхемӕ рафинста, Библий ци адӕни кой цӕуй, уонӕй устур маст ка бавзурста, уони нӕмттӕ. Динӕ загъта: «Алкедӕр си ӕдзох Хуцаумӕ кувта. Фал ма уой дӕр балӕдӕрдтӕн, ӕма Библи ӕхгӕдӕй ку дарай, уӕд дин Хуцау дӕ кувдтитӕн дзуапп нӕ ратдзӕй».

Динӕ Библи ке ӕртаста, уой фӕрци ма исахур ӕй фулдӕр сагъӕс кӕнун, ци адтӕй, уобӕл нӕ, фал федӕни ци уодзӕй, уобӕл. Устур уодӕнцойнӕ ин хӕссунцӕ Гъуддӕгти 24:15 финст дзурдтӕ: «Райгас уодзӕнцӕ рӕстгӕнгутӕ дӕр ӕма фудгӕнгутӕ дӕр». Цума Динӕ федарӕй ӕууӕндуй, Йеговӕ ин ӕ кизги ке райгас кӕндзӕй, уобӕл? Мӕнӕ ӕхуӕдӕг ци зӕгъуй: «Мӕ цӕститӕбӕл уайуй, мӕ кизгӕ куд райгас уодзӕй, е. Ци бон фембӕлдзиан, е мӕ уӕларвон Фиди „къӕлиндари“ нур дӕр бӕрӕг ӕй. Нур дӕр ӕй уинун, мӕ кизги хӕццӕ рӕзӕдони куд рацо-бацо кӕндзӕн, уой. Фиццаг хатт ӕй мӕ къохмӕ ку райстон, уӕд ибӕл куд цийнӕ кодтон, уой хуарз гъуди кӕнун. Ӕма ку райгас уа, уӕд дӕр ибӕл куд цийнӕ кӕндзӕн, е мӕ цӕститӕбӕл арӕх фӕууайуй».