Jiinsoongi Liin Waxabajjii 2025 irraa kaasee Kooriyaa Kibbaa keessatti hidhamee jira

Dhugaa Baatota Yihowaa Sababii Amantii Isaaniitiin Hidhaman—Biyya Biyyaan

BANI

Hanga Caamsaa 2026tti addunyaa maratti Dhugaa Baatonni Yihowaa 276 ol sababii amantii isaaniitiin hidhamaniiru jiru.

Waliigalteen Mirgoota Siivilii fi Siyaasaa Idil Addunyaa keeyyanni 18 akka jedhutti namni kamiyyuu wanta barbaade yaaduu fi wanta barbaadetti amanuuf, akkasumas waaqeffannaasaa geggeeffachuuf mirga qaba. Haa taʼu malee, biyyoota tokko tokkotti Dhugaa Baatonni Yihowaa mirgi isaanii kun sarbameera; amantaasaanii waan geggeeffataniif ykn tajaajila loltummaa kennuuf sammuun isaanii waan isaaniif hin heyyamneef hidhaa fi miidhaadhaaf saaxilamaniiru.

Raashiyaa

Ebla 2017 Manni Murtii Olaanaa Raashiyaa Dhugaa Baatonni Yihowaa finxaalessitoota jechuudhaan hojiisaanii dhorkeera. Kanaan kan kaʼe, mootummaan iddoowwan waaqeffannaa isaanii cufeera, dhaaleera, akkasumas barreeffamoota isaanii dhorkeera. Sana booda abbootiin taayitaa waaqeffannaa isaanii seeraan ala akka taʼetti ilaaluudhaan Dhugaa Baatota Yihowaa qorachuu, hidhuu fi ariʼachuu jalqaban. Poolisoonni yeroo manasaanii sakattaʼan isaan doorsisu, gara jabinaan isaan qoratu, akkasumas qabanii isaan hidhu. Yeroo ammaatti yoo xinnaate Dhugaa Baatonni Yihowaa 163 taʼan mana hidhaa hanga murtiitti keessa tursiifaman galaniiru, hojii humnaa akka hojjetan dirqisiifamaniiru, akkasumas hidhamaniiru.

Maqaa Dhugaa Baatota Yihowaa yeroo ammaatti sababii amantii isaaniitiin Raashiyaa keessatti hidhamanii buufachuuf liinkii kana tuqi.

Singaapoor

Singaapoor namoota sababii amantii isaaniitiif tajaajila loltummaa kennuu didaniif tajaajila kan biraa utuu hin qopheessin, seera dhiironni biyyattii hundi humna waraanaa keessatti akka tajaajilan dirqamsiisu baasteetti; namoonni tajaajila kanarratti hirmaachuu didan hidhaan hanga jiʼa 30 isaanitti murtaaʼuu dandaʼa. Dhaabbanni Mootummoota Gamtoomanii waggoota hedduudhaaf biyyattiin seera kana akka sirreessitu kan gaafate taʼus, Singaapoor ulaagaalee mirga namummaa idil addunyaa hojiirra hin oolchine. Yeroo ammaatti Dhugaa Baatonni Yihowaa dargaggoota taʼan sagal tajaajila loltummaarratti hirmaachuuf sammuunsaanii waan isaaniif hin heyyamneef hidhamanii jiru; isaan keessaa shan yeroo lammaffaadhaaf hidhaman.

Maqaa Dhugaa Baatota Yihowaa yeroo ammaatti sababii amantii isaaniitiin Singaapoor keessatti hidhamanii buufachuuf liinkii kana tuqi.

Kooriyaa Kibbaa

Onkoloolessa 26, 2020 Kooriyaan Kibbaa namoota tajaajila loltummaarratti hirmaachuuf sammuunsaanii isaaniif hin heyyamneef tajaajila bakka loltummaa kennamu qopheessite. Haa taʼu malee, tajaajilli bakka loltummaa kennamu jiʼa 36 [dachaa tajaajila loltummaa] waan dheeratuuf, namoonni tokko tokko qophiin kun adabbiidhaaf kan qophaaʼe akka taʼe isaanitti dhagaʼameera. Manneen murtii seera kana morman jiraatanis Manni Murtii Heeraa Kooriyaa Kibbaa bara 2024tti qophii kana deeggareera. Dhugaa Baatonni Yihowaa hedduun baayʼee ulfaataa taʼus tajaajila bakka loltummaa kennamu kana kennuuf filataniiru. Taʼus, hanga ammaatti obboloonni dargaggoonni 15 qophii kana fudhachuu didaniiru. Isaan keessaa tokko kan hidhame yeroo taʼu, kaanimmoo murtiisaanii eeggachaa jiru; isaanittis hidhaan murteeffamuu dandaʼa.

Maqaa Dhugaa Baatota Yihowaa yeroo ammaatti sababii amantii isaaniitiin Kooriyaa Kibbaa keessatti hidhamanii buufachuuf liinkii kana tuqi.

Yuukreen

Gara waggaa 30tiif Dhugaa Baatonni Yihowaa Yuukreen keessa jiran seera biyyattii namoota sababii amantii isaaniitiin tajaajila loltummaa kennuu didaniif tajaajila bakka loltummaa kennamu heyyamurraa fayyadamaa turaniiru. Waraana Guraandhala 24, 2022tti jalqabeen kan kaʼe yeroo lammiileen biyyattii humna waraanaatti akka makaman gaafatamanitti seerri kun hirʼina akka qabu ifa taʼeera; kanaan kan kaʼe, namoonni humna waraanaatti makamuu didan hedduun mana murtiitti dhihaatanii hidhaan isaanitti murtaaʼeera. Yeroo ammaatti Dhugaa Baatonni Yihowaa 11 hidhamanii jiru; 13 immoo mana hidhaa hanga murtiitti keessa tursiifaman galaniiru. Rippoortaroonni Addaa Dhaabbata Mootummoota Gamtoomanii sadi, Yuukreen namoota sababii amantii isaaniitiin tajaajila loltummaa kennuu didaniif tajaajila bakka loltummaa kennamu qopheessuu dhiisuun ishii akka isaan yaaddesse ibsaniiru.

Maqaa Dhugaa Baatota Yihowaa yeroo ammaatti sababii amantii isaaniitiin Yuukreen keessatti hidhamanii buufachuuf liinkii kana tuqi.

“Akkuma isaanii wajjin hidhamtanii jirtanitti ilaaluudhaan warra mana hidhaa keessa jiran yeroo hunda yaadadhaa.”—Ibroota 13:3.

Dabalataan Ilaali

GAAFFIIWWAN YEROO BAAYʼEE GAAFATAMAN