Isaayyaas 61:1-11
61 Hafuurri Yihowaa Gooftaa Ol Aanaa ana irra jira,+Sababiin isaas, Yihowaan garraamotaaf misiraachoo akkan labsu na dibeera.+
Warra garaan isaanii cabe* akkan walʼaanu,Warra boojiʼamaniif bilisa baʼuu akkan labsu,Ijji hidhamtootaa akka banamus akkan labsu na ergeera;+
2 Waggaa gaarummaa Yihowaa,Guyyaa Waaqni keenya haaloo itti baʼus+ akkan labsu,Warra gaddan hundumaa akkan jajjabeessu,+
3 Warra Xiyooniif gaddan akkan kunuunsu,Bakka daaraa shaashii,Bakka gaddaa zayitii gammachuu,Bakka hafuura gaddee uffata jajannaa akkan isaaniif kennu na ergeera.
Isaanis mukeetii qajeelummaa guguddaa taʼan,Warra akka ulfina isaaf kennaniif* Yihowaan dhaabe sana jedhamanii ni waamamu.+
4 Isaanis diiggaawwan bara durii deebisanii ni ijaaru;Iddoowwan durii warra onanii turan deebisanii ni dhaabu,+Magaalota barbadeeffaman,Iddoowwan dhalootaa hamma dhalootaatti onanii turan deebisanii ni ijaaru.+
5 “Warri ormaa kaʼanii bushaayeewwan keessan ni tiksu,Namoonni biyya ormaas+ warra isiniif qotanii fi maasii wayinii keessan keessatti hojjetan ni taʼu.+
6 Isin garuu, luboota Yihowaa jedhamtanii ni waamamtu;+Isaanis tajaajiltoota Waaqa keenyaa jedhanii isin waamu.
Isin qabeenya sabootaa ni nyaattu,+Ulfina* isaaniitiin kan kaʼes ni boontu.
7 Isin bakka qaanii gaʼee dachaa ni qabaattu,Isaanis bakka salphinaa qooda argatanitti ni ililchu.
Eeyyee, isaan biyya isaanii keessatti gaʼee dachaa ni dhaalu.+
Gammachuun bara baraas kan isaanii ni taʼa.+
8 Sababiin isaas, ani Yihowaan haqa nan jaalladha;+Saamichaa fi jalʼina nan jibba.+
Amanamummaadhaan gatii isaanii isaaniif nan kenna,Isaanii wajjinis kakuu bara baraa nan gala.+
9 Sanyiin isaanii saboota gidduutti,Ijoolleen isaaniis namoota gidduutti kan beekaman ni taʼu.+
Namni isaan argu hundi,Isaan sanyii Yihowaan eebbise taʼuu isaanii ni hubata.”+
10 Ani Yihowaatti baayʼee nan gammada.
Guutummaan eenyummaa kootii* Waaqa kootti ni gammada.+
Sababiin isaas, inni uffata fayyinaa natti uwwiseera;+Akkuma misirricha marata mataa isa kan lubaa fakkaatu+ marateetti,Akkuma misirroo faayawwan ishiitiin of miidhagsiteettis,Inni uffata* qajeelummaa natti mareera.
11 Akkuma lafti latiiwwan biqilchitutti,Akkuma iddoon biqiltuu wanti irratti facaafame akka latu godhutti,Yihowaan Gooftaa Ol Aanaanis,Qajeelummaanii+ fi ulfinni saboota hundumaa duratti akka latu ni godha.+
Miiljaleewwan
^ Ykn., “gadde.”
^ Ykn., “isa miidhagsaniif.”
^ Ykn., “Qabeenya.”
^ Ykn., “Lubbuun koo.”
^ Ykn., “qoloo.”
