Isaayyaas 13:1-22
13 Murtii Baabilon irratti dabarfamee+ fi Isaayyaas+ ilmi Amooz mulʼataan arge:
2 “Gaara qarsaa qullaa taʼe irratti mallattoo* dhaabaa.+
Gara karrawwan guguddootaatti akka seenaniifIsaan waamaa, harka keessanis raasaa.
3 Warran muude* sanaaf ajaja dabarseera.+
Ani dheekkamsa koo karaa isaanii ibsuuf,Loltoota koo warra boonuudhaan ol of qaban waameera.
4 Dhagaʼaa, sagaleen tuuta gaarota irra jiruu,Sagaleen sagalee namoota hedduu fakkaatu ni dhagaʼama!
Dhagaʼaa, iyyi mootummootaa,Iyyi saboota walitti qabamaniis+ ni dhagaʼama!
Yihowaan Gooftaan Raayyaa waraanaaf loltoota walitti qabaa jira.+
5 Yihowaanii fi meeshaawwan waraanaa dheekkamsa isaaGuutummaa lafaa irratti badiisa fiduuf,+Biyya fagoodhaa,+Andaara samiiwwaniitii dhufaa jiru.
6 Guyyaan Yihowaa waan dhihaateef gadoodaa!
Inni badiisa fiduuf Isa Hundumaa Dandaʼu biraa ni dhufa.+
7 Harki hundi kan naafatu,Garaan nama hundumaas sodaadhaan kan baqu kanaafi.+
8 Namoonni naʼaniiru.+
Akkuma dubartii ciniinsuu irra jirtuutti,Gaggabaa fi dhiphachaa jiru.
Fuulli isaanii dhiphinaan diimatee,Sodaa guddaadhaan wal ilaalu.
9 Biyyattii bakka sodaachisaa gochuuf,+Cubbamoota biyyattiis ishii keessaa balleessuuf,Kunoo, guyyaan YihowaaAarii fi dheekkamsa bobaʼuun gara jabinaan dhufaa jira.
10 Urjiileen samii fi tuutawwan isaanii*+Ifa isaanii hin kennan;Aduun yommuu baatu ni dukkanoofti,Addeessis ifa ishii hin ibsitu.
11 Lafattii hammina ishiitiif,+Hamootas balleessaa isaaniitiif isaan nan gaafadha.
Koora warra of bokoksan sanaa nan balleessa,Of tuulummaa cunqursitootaas nan salphisa.+
12 Namoonni warqii qulqulleeffame caalaa,Ilmaan namootaas warqii Ofiir+ caalaa muraasa akka taʼan nan godha.+
13 Aarii guddaa Yihowaa Gooftaa Raayyaatiin, guyyaa dheekkamsa isaa isa bobaʼaatti,Samiiwwan akka jeeqaman,Laftis iddoo ishiitii akka raafamtu kanan godhu kanaafi.+
14 Akkuma borofa adamsamuu fi akkuma bushaayee nama walitti isaan qabu hin qabneetti,Tokkoon tokkoon namaa gara saba ofii isaatti ni deebiʼa,Tokkoon tokkoon namaa gara biyya ofii isaatti ni baqata.+
15 Namni argame kam iyyuu ni waraanama,Namni qabame kam iyyuus goraadeedhaan ni ajjeefama.+
16 Ijoolleen isaanii ijuma isaanii duratti ni hurreeffamu,+Manneen isaanii ni saamamu,Haadhotiin manaa isaaniis dirqamaan ni gudeedamu.
17 Kunoo, ani namoota MeedonWarra meetii homaatti hin lakkoofne,Warqiittis hin gammanne isaan irratti nan kaasa.+
18 Iddaawwan isaanii dargaggoota ni caccabsu;+Isaan firii gadameessaatiif garaa hin laafan,Ijoolleedhaafis hin gaddan.
19 Baabilon ishiin mootummoota hunda caalaa ulfina qabeettii taate,*+Ishiin bareedina Kaladootaa taatee fi isaan ittiin boonan,+Akkuma Sodoomii fi Gomoraa warra Waaqayyo garagalche sanaa ni taati.+
20 Ishii keessa matumaa namni hin jiraatu,Dhaloota hundumaa keessattis bakka namoonni keessa hin jiraanne ni taati.+
Arabni dunkaana isaa achi hin dhaabu,Tiksitoonnis bushaayee isaanii achitti hin boqochiisan.
21 Uumamawwan gammoojjii achi ni ciciisu;Manneen isaaniis hurunguudhaan ni guutamu.
Guchiiwwan achi ni jiraatu,+Reʼoonni bosonaas* achitti ni burraaqu.
22 Uumamawwan caraanan masaraawwan ishii keessatti,Sardiidonnis manneen mootummaa ishii warra miidhagoo keessatti ni iyyu.
Yeroon ishii dhihaateera, guyyoonni ishiis hin dheeratan.”+
Miiljaleewwan
^ Ykn., “jirma mallattoo.”
^ Kal., “Warra naaf qulqulleeffaman.”
^ Kal., “Kasiilota isaanii,” Oriyoonii fi tuutawwan urjiilee naannoo isaatti argaman kan argisiisu taʼuu hin oolu.
^ Ykn., “ishiin faaya mootummootaa taate.”
^ Ykn tarii, “Jinniiwwan reʼee fakkaatanis.”
